jeudi 7 août 2008

عمادة المهندسين المعماريّين:...... عملتو العار و نقبتو الطّار


كيف ما نعرفو الكلّ، أحنا في بلاد ديمقراطيّة، و سيادة الشّعب هي الكلّ و حتّى شيء ما يتقرّر بلاش مشاورة و بلاش انتخابات.
هذاكا علاش كلّ عامين من زمان تصير جلسة عامّة انتخابيّة يتعيّن فيها مجلس جديد باش يمثّل المهندسين المعماريّين في ها العامين هاذوما.
و ماو زادا نعرفو الّي الكرسي، ينعن بوه، محلاه. و الّي يقعد عليه ماعادش يحبّ يتحلحز
آش جاء عمل سي رئيس الهيئة؟
اسّاعة درا كيفاش تصرّف باش يعمل ليستة على كيف كيفو. فيها أسامي المجلس الحالي الكلّ، و معاهم شويّة عرايس من جماعتو، أهوكا عل عين، قال شنوّا انتخابات و ديمقراطيّة و درا شنوّا
و من بعد ظاهرة باش ينجحو ب 80 و الاّ 90 في الميا من الأصوات و يقولو ملاّ أحنا، قدّاش يحبّونا المهندسين

الحاجة الثّانية: توّا الانتخابات حياتها كاملة تصير في أخر ماي و الاّ في أوّل جوان، في بلاصة مذخمة هكّا، تليق بالمهنة
جاو حطّوها نهار 23 أوت، معا ماضي تلاثة متاع العشيّة في مدينة العلوم...... آش معناها؟
معناها في غرغور القايلة، الشّمس تنقب الرّاس، في بلاصة كلّها شوانط و زفت و غبابر، باش هكّاكا ما يجيهم حدّ، و ينتخبو رواحهم وحدهم، و يقرّرو وحدهم شرعيّتهم و يكمّلو يخرمو و تيمنيكو عالنّاس في راحة تامّة

و طبعا المتضرّرين في الحكاية هوما المهندسين المعماريّين
أمورهم ماشية و تتدهور. مشاكلهم ما يتلفّتلهم حدّ، عايشين بقانون عندو 30 سنا ما تبدّلش
مطالبهم ما غزرّلهم حدّ، ريقهم شاح و هوما يطالبو: يا ولادي أعملولنا بارام جديد للمشاريع الخاصّة، أفرضو عالمؤسّسات الوطنيّة باش تخلّصنا حسب الجدول، خوذو شويّا مواقف من توزيع المشاريع،..... شيء
الجّماعة يعملو في البوليتيك (بكلّ ما في الكلمة من معاني، و خاصّة المعنى الشّعبي متاعها)ـ
شويّة فواياجات
برشة تصفيق و مناشدات و مساندات
النّهار الكلّ يقوّدو بالمهندسين للفيسك، لين بالعمل ولاّلهم ستراس آخر مع القباضة و السّي آن آس آس
يعدّيو 4 و الاّ 5 مالنّاس على مجلس التّأديب
و هاذيكا هي الخديمة
و الرّسمي يجيبو ربّي

ان شاء الله في 2010 يجينا خبيّر باهي

4 commentaires:

أرابيـكا a dit…

احنا قمة في الابداع الديمقراطى ما تتخيلش انو الترافيك هذا بمعناه الشعبوي يصير كان في عمادة المهندسين المعماريين بل بالعكس في كل المنظمات والهياكل والعمادات والنقابات والقايمة طويلة نكبة العمر انو مجموعات منتخبة وبين قوسين منتخبة () تدخل في علاقة عشقية مع الكراسي متاعها ولكن شيء غير مستبعد اذا كانو قارين درس الديمقراطية والتداول على السلطة عند اش يقولولو

ولد بيرسا a dit…

ههههههه
!!!!!و الله عندك الحقّ يا أرابيكا

pink_panther a dit…

les architectes fi tounes ma3roufin eb machakelhom;
j'en ai une petite idée, j'ai étudié à l'enau...
les grands veulent monopoliser essou9,
ettma3, ach tnajjem ta3mel m3ah...
ti 7atta ken jaw yekhdmou fi 7ajet 7louin!!!
ils massacrent l'esprit tunisien,
l'empreinte architecturale tunisienne se dissipe!
ils produisdent une architecture insipide dénudée de tout art...
khsara!

ولد بيرسا a dit…

أحسن ما عملت كيف بدّلت القلم يا بينك
المشاكل الّي صايرة كلّها في جرّة الشّيء الّي نحكي فيهم
و ما قلت شيء راهو، خاطر شيء يحشّم و بالحقّ يعمل العار للبلاد