mardi 30 mars 2010

بين "التساوي في الحظوظ" المعلن و سياسة المظهر


ما فمّاش مقال و الاّ خطاب، رسمي و الا موش رسمي، ما يحكيش على "التساوي في الحظوظ" و "رفض الإقصاء" و هاك الكلام المزيان الّي استانسنا بيه توّا مدّة
أما كيف تجي تغزر بعينيك، آش تشوف؟
تشوف مثلا الدولة تبني في قناطر و كاياسات و هيلمان كبير في عين زغوان، بما قيمتو 9 مليارات و الاّ أكثر... معناها موجّهين لناس المزمّر فيهم شاري برطمان بـ 160 مليون
في نفس الوقت تشوف أولاد و بنات صغار في أحواز القصرين يضربو 6 و الاّ 7 كم على ساقيهم باش يخلطوا للمكتب... على خاطر نفس الدولة ما عندهاش فلوس باش تبنيلهم 4 أقسام يقراو فيهم، الّي كان خلات يتكلّفو 50 مليون
زعمة عندهم نفس الحظوظ الولد الّي يسكن في عين زغوان و الّي الدولة تكمّل تفرشلو كاياس بـ 9 مليارات، و هاك الطفل الّي ساقيه حفات من المشي و ما لقاش مكتب يقرى فيه؟؟؟
تشوف الّي بوه واصل تستنّاه الخدمة من قبل ما يكمّل قرايتو، و لا صفّ لا مطالب لا شيء
في نفس الوقت تشوف زادا الناس بايتة تحت القناطر يستنّاو باش يعدّيو مناظرة و يعرفوا مليح الّي هوما موش باش ينجحوا... على خاطر ولد سي فلان و بنت سي فلتان حجزو البلايص و هوما راقدين في الدار
و الدليل هوما الـ 35 و الاّ 45 ألف مترشّح الّي قدّموا مطالب للمناظرة متاع الضمان الإجتماعي
زعمة زادا عندو نفس الحظوظ السيد الّي يخدم سوجيقات و هو عندو إجازة في الحقوق و يجري من مناظرة لمناظرة، هو و ولد سي فلان الّي راقد في الدار و يختار آش يحبّ يخدم؟؟؟
موش معناها ما نبنيوش قناطر و ما نحسّنوش الكاياسات...لا، أما شويّة توازن في توزيع ثروات الدولة... على خاطر ما فمّاش علاش باش الغنيّ تزيد الدولة تبشبش بيه و تصرف عليه، والّي ما في حالوش تكمّل تكبّلو سعدو و تستخسر فيه طرف كاياس باهي و الاّ دار ثقافة باهية، و الاّ حتّى جرد مكتب يقرّي فيه صغارو
و الاّ زعمة كلامي موش صحيح؟

vendredi 19 mars 2010

ـ 19 مارس / 6 نوفمبر ... و الوطنيّة


للّي ما لاحظش، الأيّامات هاذوما قاعدين نعيشو في درس خشين ياسر من دروس الوطنيّة، الّي الدّولة قاعدة تقرّيلنا فيهم توّا مدّة

يا إمّا مباشرة في التّلفزة، و الاّ على طريق الأنترناتيّين الوطنيّين كيف ما يسمّيو في رواحهم

اليوم يا ناس 19 مارس...، معناها مازال نصّ نهار على عيد الإستقلال

ما فمّاش حدّ ما فطنش الّي ما فمّا حتّى شيء في الشارع يدلّ على أنّي هاذي بلاد تحضّر في روحها باش تحتفل بعيد الإستقلال متاعها

توّا العشيّة فين ريت أوّل مظهر من مظاهر الإحتفال، و الّي هوما عبارة على 5 شرايط معلّقين فوق الرّمبوان: زوز قصار حمر، فيهم علم تونس...، و ثلاثة موف فيهم تصويرة (مالأوّل مشى في بالي تصويرة بورقيبة و الاّ مصباح الجربوع و الاّ واحد مالّي صنعو الإستقلال...)، ياخي طلعت غالط

حاسيلو... لا علينا

قلنا امّالا النّاس الّي تعطي في دروس الوطنيّة، ما نعرفش فين مشات الوطنيّة متاعهم نصّ نهار قبل اليوم الّي الوطن تسمّى فيه "وطن" و الّي دمومات الوطنيّين (الّي بالحقّ موش المضرّحين متاع الأنترنات) مشات على خاطرو سواقي؟؟؟

(بربّي تفكّرو معايا نهار 6 نوفمبر في العشيّة (الّي هو يجي نصّ نهار قبل حفلة "وطنيّة" أخرى

و الاّ زعمة الوسّادة غلبت الولاّدة، و بنت 23 طيّحت على للاّتها بنت الـ 54؟؟؟

حاسيلو... محلاها الوطنيّة، و محلاهم النّاس الّي يقرّيو فينا في الوطنيّة