mercredi 24 septembre 2008

عصام البرهومي بطل العالم بفضل السّياسة الحكيمة الّتي رسّخها سيادة الرّئيس......؛


توّج الرّياضي التّونسي عصام البرهومي ببطولة العالم لليوشو كونق فو، و ذلك بفضل السّياسة الحكيمة الّتي رسّخها سيادة الرّئيس في تأطير الشّباب و الرّياضيّين، .......الخ (فمّا شويّة جمل أخرين سمعتهم أما ما شدّيتهمش، خاطر لعبت عليّ شويّا دوخة، أما محسوب فرد معنى)؛
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
هاذا خبر سمعتو توّا في الأخبار.............؛
هو في الحقيقة ما يهمّش عصام هزّ و الاّ ما هزّش، أبري تو يهزّ و الاّ يقعد، لاهو أوّل واحد لاهو آخر واحد يهزّ بطولة، المهمّ أنّو كيف يهزّ....... يلزم نعرفو علاش هزّ؟؟؟؟؟
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
و أهوكا كان فيكم واحد مازال ما فيبالوش أهوكا توّا الكلّ في بالكم
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
و إلى اللقاء في أخبار حكيمة و رشيدة أخرى

lundi 22 septembre 2008

Ramadan, je te hais....

Le mois de l’hypocrisie, des mensonges, le mois où tout va de travers.

Le mois de l’anti-travail, anti-amour, anti-réussite, anti-progrès.

Le mois où tout le monde prend des gants, tout le monde joue aux gentils, alors qu’ils n’en ont même pas besoin.

Qu’est ce qu’il est lourd ce mois, qu’est ce qu’il est antipathique… !!!!! Ses journées sont des interminables, l’ambiance de ses nuits pue la fausseté et l’imposture au peuple.

C’est le mois de tous mes maux, tous mes ennuis, toutes mes douleurs.

Qu’est ce que je te déteste saint Ramadan, qu’est ce que je te méprise…

mardi 16 septembre 2008

دعوة للمشاركة في استفتاء صغير

توّة مدّة و أنا نتبّع في الأفلام و المسلسلات التّونسيّة الكلّ
فمّا برشا حاجات عجبوني، برشا حاجات ما عجبونيش
و نظرا لسذاجة المواضيع الّي ديما تتطرح، عمري ما لقيت صعوبة باش نفهمهم و نحلّلهم و نعطي فيهم رأيي كيما النّاس الكلّ
أما فمّا حاجة وحدة مازلت ما فهمتهاش بالكلّ، و ما دخلتش لمخّي جمــــــلة......و هاذيكا هي موضوع الإستفتاء
لذا مرحبا بيكم، و تعملو مزيّة عاونوني على الإجابة خاطرني برجوليّة حرت.......؛
(أهوكا الإستفتاء عل اليمين، فوق المنقالة بالظّبط)؛
.
.
و شكرا

lundi 8 septembre 2008

ولد بيرسا قرّر باش يحلم



اليوم قرّرت باش نحلم

و نحبّكم تحلموا معايا، مادام الحلم مازال بلاش، و ما يعاقبش عليه القانون و كيف "ترتكبو" الحاكم ما يقلّكش علاش؟

.

اليوم قرّرت باش نحلم بروحي في زمان آخر و في مكان آخر

.

باش نحلم بروحي في بلاد بلاش قوادة، بلاش مصامر مصدّدة، بلاش عرك، بلاش تكعبير، بلاش محاكم، بلاش بوليسيّة، بلاش حكومة، بلاش نقابة، بلاش كرطوش

.

بلاد بلاش ديانات، بلاش رسل، بلاش ربوبة، بلاش وليا، بلاش فتاوي، بلاش شعوذة

.

بلاد يسوى فيها البشر بقيمة أفعالو، من غير ما يسفّلوه و الاّ يعظّموه من قبل ما يخرج من ركايب بوه

.

بلاد تعمل فيها النّاس الخير،من غير ماهي خايفة لا من جهنّم لا من منكر لا من نكير، من غير لاهي طامعة لا في سواقي شراب لا في غلّة لا في صبايا لابسة الحرير

.

بلاد ما يتحقرش فيها الإنسان خاطرو أسمر و الاّ خاطرو قصير و الاّ خاطرو فقير و الاّ خاطر بوه جاي من بلاد الغير

.

بلاد لا فيها وشام، لا لحيّ، لا صليب، لا نجوم صفر

بلاد لا فيها ليتوال، لا ادريس، لا الشّرميطي، لا منجي بحر

بلاد لا فيها رشاوي، لا اكتاف، لا تصمصير، لا تطيح قدر

بلاد تقول فيها تقول فيها كلمتك من غير ما تاكل كفّ و ما تذوق المرّ

.

الزّمان الّي نحلم بيه لا فيه سيدي بن غالبة لا سيدي بالنّصر لا للاّ صالحة

المكان الّي نحلم بيه تخرج فيه قصع الكسكسي للزّواولة من غير ما يكون حدّ عمل حادث و الاّ حدّ يحبّ يطلب الرّحمة من عند للاّ خديجة و الاّ سيدي بالحارث

في الزّمان الّي نحلم بيه عرق الجّبين يسوى أكثر مالنّسب، العقل أكثر من الوجه، و التّربية أكثر مالصّياغة و الذهب

.

اليوم هاني حلمت ........ حلمت ........ حلمت

و كيف فقت.........ـ

فقت على صوت بوليس يكفر في ربّي على واحد لابس مريول ليتوال، و هو يطلب في السّماح براس سيدي الجّبلي

برشا حكايات....... راسي وجعني من الأحلام ....... و فطنت الّي مازال فمّا ليتوال، مازال فمّا بوليسيّة، مازال فمّا ربوبة، مازال فمّا وليا، مازااااااااال

.

و في الإخّر ما ....... زال: كان الحلم

lundi 1 septembre 2008

تونس بين الشّعوذة و حجب فايسبوك

.

لاحظنا الكلّ الّي فايسبوك تسكّر

باهي، يعطيكم الصّحّة..... عملتو عملة باهية ياسر

أما باش ناقف لحظة و نعمل بعض الملاحظات

:

فايسبوك الّي هو كان أداة تواصل و تعارف و فضاء للنّقاش و التّنمية الثّقافيّة، تسكّر..... في المقابل تحلّ جريدة، تلقى فيها على الأقلّ 10 إعلانات، الصّغير فيهم ماخذ ربع صفحة، ينشرو في الشّعوذة و الكذب و التّبلعيط

هاو الأستاذ الورتاني يداوي في العجز الجنسي بالأعشاب، هاو سي العليبي يداوي في السّرطان بالقرآن، هاي للاّ زمّارة تعالج في الصّفراء و تجيب في الأرزاق و تفرّق في الفيزاوات لفرانسا، الخ......ـ

.

هاذوما؟

لا..... ما نحجبوهمش

باهيشي؟؟؟؟ حرّيّة تعبير و كلّ حدّ مسؤول على كلامو

أما فايسبوك؟..... لا !!!!! ، هذاكا كلّو قلّة حياء و بلادة و ركاكة و يلزم نسكّروه باش نحافظو على الشّباب و على نقاوة أفكارهم

.

حاسيلو ما فهمتش البلاد فين ماشية.... ؟؟؟؟؟

الطّرف حرّيّة الّي كنّا نفيّسو بيها و نبهبرو على أشقّائنا العرب الأخرين قريب تندثر

أ تو إنّحي جدّ بوه الإشتراك متاع أنترنات و نولّي نقرى في الصّريح و الإعلان و الحدث و أخبار الجمهوريّة في انتظار أنّو ها العباد الّي شادّة الدّمان متاع البلاد يرجعلها شاهد العقل و تفهم الّي تونس في خطر و قاعدة توخّر بالتّوالي بسرعة رهيبة في جرّة ها العمايل الكلبة متاعهم

.

بربيّ نداء أخير لأصدقائي الّي يصلّيو: َ

بعد صلاة التّراويح اليوم، تفكّرو باش تدعيوا دعيوة لتونس فمّاش ما نراوها تعاود تاقف على ساقيها و نعاودو انّجّمو نهزّو ريوسنا، و نفيّسو على أشقّائنا العرب و نضربو على صدورنا و نعاودو وقتلّي نقولو: أحنا توانسة .....ـ