dimanche 29 mars 2009

هاو علاش هوما خير منّا و باش يقعدو ديما خير منّا



الڤورّة و الاّ النّصارى و الاّ الكفّار و الاّ الفجّار و الاّ الرّدّة و الاّ كيف ما تحبّو تسمّيوهم... خير منّا

اي نعم... خير منّا

خير منّا، أحنا العرب، المسلمين، الّي عندنا الحقائق المطلقة الكلّ و الّي الجنّة تستنّى فينا فاتحة لنا صدرها و ذراعيها على وسعها

"الكفّار" النّصارى، وقتلّي جاهم البابا متاعهم و قاللهم الّي "الواقي الذّكري" ما يحميش من السّيدا، قوّمو عليه الدّنيا و ما قعّدوهاش، و مظاهرات و الدّنيا مقلوبة و شيّخوه بالسّباّن و بالتّقشتيل.... علاش؟

موش على خاطر عازز عليهم ياسر البريزارفاتيف و سخّفهم حالو .... لا



على خاطر البابا قال حاجة منافية للعلم... منافية للمعقول... منافية لمخّ البشر

على خاطر هوما الدّين يعيّطولو دين، و رجل الدّين يعيّطولو رجل دين... موش عالم، و علاّمة و درا شنوّا

الدّين حاجة و العلم حاجة

على خاطر هوما كلّ حاجة عندهم يلزمها تاخذ بلاصتها

وقتلّي رجل الدّين يبدا يخرم و يهزّ و ينفض، يقولولو: يا بوها، حدّك حدّ المسقــّي

عندك دينك، أحكي عليه كيف ما تحبّ، أما الأمور الّي خاطيتّك خلّيها لامّاليها لعزيز

موش كيفنا أحنا، كلّ شيء يحبّو يدخّلو فيه خشوماتهم..... قالّك، مثلا كان الطّبيب حكم عليك بحاجة لازم تشاور "عالم متاع دين"



هاو (هنا) كان موش مصدّقينيّ.... معناها كان قالّك اشرب دواء في رمضان، لازم تمشي تسإل، بالكشي الطّبيب يحبّ يكعبرلهالك و الاّ حاجة ... ؟؟؟!!!! مازالشي؟

و الفرق يا "إخواني و أخواتي" الّي في بلاصة حتّى أحنا نخدّمو طاسة مخاخنا و نتكلّمو و نقولولهم يا ولادي احشمو، تلهاو في أموركم و خلّيوا العلم لأهل العلم... لا... أحنا حتّى هوما نسمّيوهم علماء و نعطيوهم فرد قدر هوما و العلماء الّي بالحقّ و نصدّقوهم حتّى أكثر منهم....؛

و من بعد نقولو شبيها هاربة بينا...!!!

و اضرب يا الحمدي !!!....؛

7 commentaires:

Ashistic a dit…

يا ولدي ثمة شيخ نسيت إسمو اما عندو لحية حمراء صابغها بالحنة، قال اللي هو إكتشف دواء السيدا... اما ما حبش يسيبو على خاطرو خايف لا الشركات تاخذ الدواء و تبدل فيه شوية و تسميه بإسمها و يرجع الربح الكل ليهم....
توة شيخ اش مدخلو في السيدا...و كيفاش شيخ يخمم عالدنيا و ناسي اجر الاخرة كي ينشر الدواء (ومن أحياها فكأنما أحيا الناس جميعا)...

يا امة ضحكت من تبلفيطها الامم

tunisianblogger a dit…

اهلا بيك حبّيت نزيد كلمتين حول حكاية البابا! على خاطر اللّي قالو تمّ تحريفوا نسبيّا يعني وقفوا عند "ويل للمصلّين" كيما نقولوا وكبّشوا و ماتو في حكاية البرزرفاتيف اللّي خرّجوها على اطارها نوعا ما والحملة العلامية ازّمت الامور خاطركيف قالها ربط بامور اخرى ...! هاو آش قال:

"Je pense que ce qui est plus efficace, plus présent et plus fort dans la lutte contre le sida, c'est justement l'Église catholique, avec ses structures, ses mouvements et ses communautés (...) On ne peut pas régler le problème du sida seulement avec de l'argent (...) Et on ne peut pas régler ce drame avec la distribution de préservatifs, qui au contraire augmentent le problème. La solution peut être double, l'humanisation de la sexualité et une vraie amitié envers les personnes qui souffrent. "

http://www.corriere.it/esteri/09_marzo_17/in_viaggio_col_papa_intervista_vecchi_5239ba9c-131b-11de-8994-00144f02aabc.shtml


ملاحظة: اللّي قوّموا القيامة في فرانسا راهم اغلبهم جماعة اللاّئيكية والالحاد يعني بلغة اخرى كيف حكاية القرضاوي في تونس ؛) يمشيش في بالك حاجة اخرى مع انّي ضدّ رجال الدّين اللّي طالعين كيف القفاع ويفتيو في فتاوى تضحّك واللّي يحك راسو يولّي عالم...

3amrouch a dit…

cher weld byrsa
vous faite de drôle de raccourci
je parie que vous n'avez pas lue, vous même,le discours du pape soit,
ses propos ont été un peu déformés et mal interprétés car finalement tout le problème est là. Le pape ne dit pas qu’il est pour ou contre le préservatif mais que les campagnes fondées uniquement sur le don d’argent et la distribution de préservatifs aggravent le problème. Un problème dont l’Afrique n’a pas le monopole et que l’occident promeut si fort : la philosophie du je-baise-donc-je-suis. lisez. Écoutez.la foi est drôlement politiser en France et le sujet du préservatif est beaucoup plus compliquées que ça.
sinon je suis d'accord sur la séparation entre homme de science islamique et médecins et je condamne fermement toute interruption de l'un dans le domaine de l'autre .

عاشور الناجي a dit…

يا للهول عمروش يدافع على قداسة البابا


في بالك فوق الستين في الميا من الكاتوليك في فرنسا ، كاتوليك موش ملحدين ، ضد البابا هذا بالذات و مواقفه الاصولية و خصوصا بعد حكاية رتزنغر و الطفلة البرازيلية و أمها ،

الاجهاض ذنب أما الاغتصاب ميسالش ،

ثمة ناس طلبت تخرج من الكنيسة بسبب ها المواقف المخزية

و ثمة زادة كاتوليك متطرفين ساندوه ببهامة لأنه ظل الله على الارض معناها التخلف في كل بقعة أما عنا احنا زايد شوية و بره ان شاء الله ما يدوم حال

عاشور الناجي a dit…

.

3amrouch a dit…

مادافعتش على البابا
مزلت منسيتلوش فازة السيف الي حكى عليها
لكن حبيت نفتح افاق اخرى للتفكير تتجاوز مجرد الحملة على الباب لمعرفة الاسباب الحقيقية للهجوم عليه
الان جوبي خرج من صمتو وقال انو البابا ولاى يمثل مشكلة حقيقية
موش بوبلاش الشيء وزيد قرب موعد الانتخابات الاروبية
كل شي جائز
وزيد للي يقرا بالقدى كلام البابا تو يعرف انو كلاموا بدلوهولو

3amrouch a dit…

وحكاية الاجهاض للي يؤمن بالحق يعرف انها ارادة الله تعالى ان تحمل والله لا يقدر الا الخير يعنى بمعزل عن حادثة الاغتصاب وماتقولوليش بدنها مايستحملش