vendredi 27 mars 2009

فلسفة الحكم لدى... ولد بيرسا


اي، شبيكم بهتّوا؟؟؟

فلسفة الحكم لدى ولد بيرسا .... نعاودها و نقولها: فلسفة الحكم لدى ولد بيرسا

عاد شبيه؟

قعدت كان أنا ما عنديش فلسفة؟

هاي كلّها ولاّت فلاسفة... آش بيني أنا؟ آش ناقصني؟

خلّي نعمل فلسفة كي العباد، و اسمي يولّي يتكتب في كتب التّاريخ و الجغرافيا و التربية المدنيّة و العربيّة و الموسيقى و العَروض و الأنڤليزيّة، و كلّ شيء.... و الاّ ما نحطّ والديه حتّى في كتب المات و الفيزيك

آه امّالا؟؟؟ ساهلة هي الفلسفة؟

حتّى أنا ابتداء من اليوم باش نولّي فيلسوف

و الاّ الفلاسفة الأخرين خير منّي؟

لا يا بابا... الفلسفة متاعي هاذي باش تولّي تتقرّى حتّى في الخارج (صلامبو، درمش، أميلكار، و يمكن حتّى سيدي بو سعيد)

آه؟؟؟ تقول انت و على أنا حكم تحكي؟

اي، انّوركم، موش مشكل: اليوم أنا ولّيت نحكم... اي نحكم!!! و الّي موش عاجبو أهوكم الحيوط

أيّا سيدي أه.... هاي فلسفة الحكم لدى ولد بيرسا بالنّقطة بالنّقطة:

1- التّحدّيات الإقتصاديّة

× التّرفيع في أجر ولد بيرسا بنسبة 157 % (و من غير لا علاش لا كيفاش... التّرفيع و أكاهَو)

× بناء قصر ملكي جديد لولد بيرسا (فوق هضبة بيرسا) حتّى يتمكّن من مراقبة كلّ مصالح الشّعب (جمع مْصَلْحة)

× المحافظة على غلاء سعر المواد الأوّليّة لتنمية اقتصاد ولد بيرسا (ماو قدّ ما يبدى ولد بيرسا منفنف، قدّ ما شعبو يبدى متفرهد)

× إنشاء سواقي و حنفيّات عموميّة مجّانيّة، تستمدّ مياهها مباشرة من البحر، و ذلك حتّى يشرب منها الشّعب كلّما تعطّش لحرّيته

× إنشاء صندوق لجمع التّبرّعات بكلّ أنواعها (جوامع، سبيطارات، جمعيّات، ...) و تنزّل مباشرة في الحساب الخاصّ لولد بيرسا، لأنّه الرّجل الأجدر بالتّصرّف في الأموال العموميّة

2- التّحدّيات الثّقافيّة

× قطع كلّ وسائل الإعلام و الإتّصالات و خاصّة الأنترنات، و ذلك لتشجيع شباب بيرسا على الحوار و الإبداع الفنّي و التّكاثر (لمن استطاع إليه سبيلا)

× منع كلّ أنواع المسرح، باستثناء المسرح الصّامت (الّي يحلّ فمّو، ا**** ***، سافا)

× تسخير كلّ جبال البلاد للفنّ، و ذلك بمنح كلّ مواطن مطرقة و إزميلا (زنزير) و تشجيعهم على النّحت (أنقش للصّباح)

× التشجيع على استعمال الآلات الموسيقيّة الإيقاعيّة (بندير، دربوكة، طار، دف، طبل،... أما خاصّة البندير) و ذلك لإحياء تراثنا الوطني و الإقليمي و الإبتعاد عن التّطبيع المنجرّ عن آلات مثل الجرمانة و البيانو و الباسّ و غيرها

3- التّحدّيات الرّياضيّة

× إقامة بطولات وطنيّة في كلّ شيء (كرة، زرابط، بيس، شكبّة، ديمينو، شيش بيش، خربقة، تلاطيخ، تزغريط، الخ.....) المفيد الناس يبداو يتعاركو على حاجة

× رصد جائزة هامّة لكلّ رياضي يحمل صورة ولد بيرسا بعد المسابقة (حتّى و إن تحصّل على المرتبة الأخيرة)

4- التّحدّيات الإجتماعيّة

× لكلّ رجل الحقّ في الزّواج من 5 نساء (4 من عند ربّي و وحدة من عندي أنا) من إمكانيّة التّرفيع في هذا العدد إلى 6 أو 8 (7 لا، و ما تقولوليش علاش) و ذلك عن طريق مطلب يقدّم بإسم ولد بيرسا و يتضمّن وجوبا إمضاء الزّوجات الخمسة و مبيّنا قدراته الفنّيّة في هذا المجال (هكّاكا الشّعب يلقى فاش يتلهى)

× تسخير عون أمن لكلّ مواطن لتنبيهه كلّما نطق بمصطلح يتنافى و دستور بيرسا (مثلا حاشاكم: ديمقراطيّة، و الاّ حرّيّة .. أعوذ بالله، و الاّ نقابة، و الاّ اللّطف عليكم معارضة، الخ...)

× إقامة انتخابات دوريّة كلّ 25 عاما، يقع التّرشّح لها عن طريق مطلب يقدّم باسم ولد بيرسا، كالعادة، و يقع البتّ فيه بعد 5 سنوات على الأقلّ و 26 عاما على الأكثر (أه؟؟؟ فمّا شكون موش عاجبو؟.... اممممم، نسخايب) ... باهي، نواصلو

× يقع رفض كلّ تلميذ في امتحانات آخر السّنة (مع السّجن مدى الحياة و الجلد 80 مرّة في اليوم) إذا لم يتحدّث عن السّيرة الذاتيّة الرّسميّة لولد بيرسا، و ذلك في كلّ الاختبارات (حتّى المات و الفيزيك و البيولوجيا)

× يحمل علم بيرسا اللّون البنّي (هكّاكا تتفكّروني على الأقلّ مرّة كلّ نهارين ... انتوما و آش كليتو ليلتها)

أيّا برجوليّة؟ ..... آش قولكم في فلسفة الحكم لدى ولد بيرسا؟

فيلسوف غول و الاّ لا؟

أيّا و قولوا ولد بيرسا موش باهي عاد !!!! هههه

19 commentaires:

لاعب النرد a dit…

يا خويا برجولية برافو...هذي الفلسفة والال لوح .أنا من اليوم باش نعمل شعبة في حومتنا و جمعية مائية و باش نبعثولك برقية مساندة....(:ـ

MeTaLLisTiC a dit…

اول دكتاتور يعمل الكيف
انا عجبتني هاذي (4 من عند ربي و وحدة من عندي انا...)
لوول

بـانـدي...خـمـيّـس بـانـدي a dit…

بـايـعـتـك يـا ولـد بـيـرسـا... !
(شـوفـلـي بـلاصـة مـعـاك عـادا ... حـتـى وزيـر فـيـه الـبـركـة و مـا عـنـدك كـان الـبـانـديـة !) هـيـهـهـهـه !!!!

Al-Hallège a dit…

نشاءالله تطلع صادق في وعودك ...موش كي الفلاسفة اللي سبقوك...و إلا بالحرام لا عاد نأمن حتى أي فيلسوف

ferrrrr a dit…

معناها ولد بيرسة بالمِنجدْ و موش مدلس، نوافقك وليدها، و "الباندية" يلزمهم شكون "يتلها" بيهم، انهنيك عليهم، ما عندك كان الفرررر و خوه

chanfara a dit…

بالروح بالدم نفديك ولد بيرصة
يحيى ولد بيرصة يحيى ولد بيرصة
ولد بيرصا رئيسنا و تجمع بيرصة حزبنا
الورقة البنّي في الصندوق و ولد بيرصا ديما الفوق

الصعاليك بكلها معاك سيدي الرئيس

هذي أحسن فلسفة حكم ريتها في حياتي

عاش فيلسوفنا الرشيد و أمير المؤمنين ولد بيرصة

يحيى ولد بيرصة يحيى ولد بيرصة

شعبة أحباء الرئيس ولد بيرصة بإسبانيا تساند ترشح مرشحنا الوحيد الزعيم الواحد، العالم، الفيلسوف العلامة ولد بيرصة

ولد بيرسا a dit…

هههههههههههههههههههههه
مرحبا ، مرحبا بيكم الكلّ :-)))))) نوّرتونا ، زارتنا بيكم البركة... شفتو ماو أنواع الفلسفة الّي تمشي؟
آش ناقصني عالفلاسفة الأخرين؟

يا لاعب النّرد: مرحبا بيك و بحومتك كيف فهمتوا الفلسفة الرّشيدة متاعي... و كان تحبّ انّجمو نعملو توأمة بين بيرسا و حومتك :-))))

ميتاليستيك: يا ولدي لازم الفيلسوف، و قبل ما ما ينشر أفكارو، يعرف الشّعب باش يخمّم هههههه

خميّس: مرحبا بيك، ... أنا قرّرت باش نسمّيك وزير النّفط متاع بيرسا. أهوكا غدوة إلبس كوستوم بنّي و صبّح في بيرسا.... عالضّالّين آمين

الحلاّج: تي شنوّا صادق؟؟؟ كان ما جيتش صادق أراني مشيت هجّيت لفرنسا و الاّ ألمانيا .... هاذي وعود باش نطبّقها 100 فيل 100... تهنّى :-))))؛

فرررر: عاد أنا ما نقلّك و انت ما يخفى عليك :-))) و نقلّك حاجة؟ ... الفلاسفة ما يقدّهم حدّ... صاحبك راجل

الشّنفرى: ههههههههههههههههههههههههه
هاو الشّعب الّي نحبّو... هاو آش يلزم
زايد معاك يا ولدي... تعجبني
:-))))))))))))))

citoyen a dit…
Ce commentaire a été supprimé par l'auteur.
AntikoR a dit…

ya wild birsa, rak me9oltilnech chniya awlawiat awlawietik w chniya el 7ajet elli ta7dha bi Fe2i9 3inaytik w win yansabb ihtimemek siyedtik w 3inaytek issamiya w 3la chnouwa enti 7aris kolla el 7irs !!

w ta3mel mziya ta3tini isma el madame bech nhabbat annonce fi jarayed birsa el koll bimounesebet tawalli fakhamtek il 7okm.

7asilou mezilt ne9is chwaya moumersa , ama el base mawjouda w Birsa bayna ayedi amina !

bent 3ayla a dit…

أيها البيرسيون، أيتها البيرسيات،

إنّ شعبنا بلغ من التخلف و السذاجة ما يمنع كل أبنائه وفئاته من المشاركة البناءة في تصريف شؤونه في ظل نظام استبدادي يولي الاكتاف مكانتها ويوفّر أسباب الدكتاتورية اللا مسؤولة وعلى أساس سحق الشعب كما نص عليها الدستور الذي يحتاج الى مراجعة تأكدت اليوم، فلا مجال في عصرنا لتداول على لرئاسة بل لخلافة آلية لا دخل فيها للشعب .

فشعب بيرصا جدير بحياة سياسية متخلفة و غير منظمة تعتمد بحق وحدة الأحزاب السياسية والتنظيمات الشعبية .

وإنّنا سنعرض قريبا مشروع قانون لالغاء للأحزاب ومشروع قانون لتعتيم للصحافة يوفران استفرادا أوسع بنظام ومسؤولية في الاستحواذ على بيرصا ودعم استملاكها .

وسنحرص على إلغاء القانون و حرمته فلا مجال الا للظلم والقهر كما سنحرص على إفقاد الدولة هيبتها فلا مكان الا للفوضى والتسيّب ونتيح السبيل لاستغلال النفوذ و التساهل في أموال المجموعة ومكاسبها .


أيها المواطنون، أيتها المواطنات،

إنّه عهد جديد نفتحه معا على بركة الله بجد وعزم

لتحيا بيرصا،

لتحيا الدكتاتورية،


جيتك بشفاعة سيدي بلحسن ولا بوسعيد الباجي خدمني كاتبة دولة متع حويجة م الحاجات، ماكش بش تحير فيا»

tunisianblogger a dit…
Ce commentaire a été supprimé par l'auteur.
tunisianblogger a dit…

2009ولد بـيـرسـا

ولد بـيـرسـا 2009

ولد بـيـرسـا 2009

ولد بـيـرسـا 2009

daddou a dit…

Hédha él koll paceke tu as dit le mot magique : Polygamie !!! après ça tu peux les conduire en enfer, ils te suiveront:-)
Rit mahou éttwansa dahom Féch ???
éy 3ad ma9oltélnéch Monsieur le président a le droit à combien de femmes ou hommes si ça te branches ? loooooool

eddou3aji a dit…

هههههههه
أكهو أعمل كيف جارك و إلّا بدّل باب دارك هههه

ولد بيرسا a dit…

شكرا، شكرا ... شفتو محلاكم كيف تشدّو الثّنيّة؟
:-))))

أنتيكور: ميسالش، تو الباقي يجي وحدو، ابدا بتصويرتي الساعة توّا حتّى تخلط المادام تو نخلّطوها خلوط :-))))؛

بنت عايلة: تعجبني في الكلام الباهي متاعك (أما ما نعرفش فاش يفكّرني، كاينّي سمعتو قبل) ... حاسيلو
أيّا امّالا هاك من توّا كاتبة دولة متاع الإعلام (و كان عجبتّك حاجة أخرى زادا هزّ، ما نشدّش عليك، حتّى وزيرة كان تحب) المفيد عينك على هاك الكرسي متاعي، ردّ بالك تقربلو.... أما كانش نتغشّش، تفاهمنا؟؟؟

تونيزيان بلوقور: شكرا، شكرا، ... و تنجّم تبدى تعيّط على 2014 من توّا زادا... على بكري خير

ددّو: أنا عندي الحقّ في 11، أما ماني ماخذ كان وحدة برك... ما يلزمنيش نتلهى برشا باش تقعد ديما عيني عليهم

الدّوعاجي: هو جار؟ هوما 2؟ هوما 10؟ الكلّهم هكّا... قعدت كان بيرسا؟
:-)))

Le Décalé du Cosmos a dit…

The Byrcian community in the USA supports Wild Byrsa!!
Wild Byrsa in the brown house!! YES WE CAN!!

ولد بيرسا a dit…

hahahahahaha
THE BROWN HOUSE!!!!

J'adooooore :-D

Anonyme a dit…

bravo citoyen !!!
heureux pour toi, la formule (weld byrsa) t'a apparemment rapporté beaucoup de succès, par rapport à ta formule citoyen (lèche-bottes de Imed Lahbib) félicitations !!!

ولد بيرسا a dit…

@ Anonyme:
و انت شبيك حاشم باش تقول هويتك و تتكلّم باسمك؟ و الاّ خايف لا نهنتلك قدّام العباد؟؟؟
على كلّ مانيش باش نجاوبك، على خاطر ها الرّيق هاذا متاع حطّ روحك أنونيم و سبّ قدّ ما تحبّ ما يعجبنيش بالكلّ و ما نستعملوش.
كيف تولّي راجل تو نعرف كيفاش نجاوبك