vendredi 23 janvier 2009

... يا تاكسي الظّلام


أي موش خوكم ولد بيرسا عندي مدّة توّا كرهبتي عند الصّلاّح
عاد قاعد نتنقّل الأكثريّة بالتّاكسيات (هذا كان ما رسكيتش مع واحد مالأحباب)؛
أيّا اليوم، قاصد ربّي ماشي نخدم السّبعة و نصّ متاع الصّباح، وقّفت تاكسي، .... طفل يمكن يعمل عمرو 28 و الاّ 30 سنا

ـ صباح الخير
ـ نهارك زين
ـ خويا البلفيدار


أي شدّينا الثّنيّة، ساكتين (و أنا بطبيعتي ما نحبّّش نحكي في التّاكسي، على خاطر نعرف الّي حكاياتهم و آش باش يقول فمّي كيف كيف) و الرّاديو محلول على الإذاعة الوطنيّة، فيه غناية علي الرّياحي "زينة يا بنت الهنشير" قاعدة تتعدّى

فمّا مقطع في الغناية هاذي يقول: "حسّيت ڤلبي ولّى عصير، بيديك تعصر في الخمرة" و يتعاود مرّتين
إي عاد هو تعدّى، و هاك شيفور التّاكسي: طرررطــــــااااااااڨ... شويّة لا دخّل صبعو في التّابلو....: "استغفر الله يا ربّي، استغفر الله يا ربّي، بففففففففف ...."

غزرتلو، نلقاه يتّكرم وحدو و يستعوذ ......؛
أنا حلّبت بيه، أما قلت خلّي نتبهلل عليه شويّا و نرمي طرف دهشة؛

قلتلو: شنوّا؟ شبيك؟ آش قالو؟؟؟

قالّي: على ها الأغاني الّي يعدّيوا فيها هالصّباح،.... أستغفر الله يا ربّي، ياخي ما فمّاش رقابة في ها الرّاديو متاع وذني؟؟؟ ..... قلّة التربية....؛

قلتلو: (و ديما في إطار التّبهليل و الدّهشة) ياخي موش غناية تونسيّة كانت تتعدّى توّا؟ سامحني كنت سارح و مانيش نسمع

قالّي: تي هاذيكا المصيبة،... تونسيّة... (و هو يعيّط قريب يطرّشني، تقولش مانيش قاعد بحذاه) ما سمعتوش قالّك تعصر في الخمرة و درا شنوّا؟ يعجبكشي ؟؟؟؟

قلتلو: آآآآآه ... إي أوكي فهمت ... سا فا خويا هوني بحذا "السّي.آن.آس.آس." يرحم والديك

أهوكا ........؛
باش نتعلّم نستحفظ على كرهبتي

5 commentaires:

عياش مالمرسى a dit…

هذا ما يُسمى آثار راديو الزيتونة.. راو يسمع في عمّك المشفّر (وشخص يتزاد تشفير على تشفير) نهار كامل، كيفاش تحبّو يطلع.. راو حتى علي الرياحي نساه شكون...

lina ben Mhenni a dit…

ya tounes ya meskina.

Anonyme a dit…

nooooooormal, il voulait te tester et voir si tu allais dire "oui tu as raison, vive les 5wenjeyyas" et ainsi te dénoncer par la suite aux 7nouchas :)

Amira Yaakoubi a dit…

bien dit el manchou!!!

Anonyme a dit…

ouiiii bien sur et on est tous sous la surveillance de la CIA, pistés par les agents du Mossad et la moitié du peuple c'est des EX KGB....
Méskin Taxiste jahél hédhéka 7ad
mo5ou, Zaffroulou fih 9am yo5tob
3la weldbyrsa...C tt
5ouya, Rabbi M3ak féch T9assi !!!