بعض الكلمات ...... تعقيبا على البوست متاع إيما بانجي

بعد البوست متاع "إيما بانجي" البارح، و الّي عجبني برشا، جاوني في مخّي بعض الكلمات الّي حبّيت ننشرهم. الّي عجبني في البوست هاذا هي فكرة أنّهم النّاس الكلّ يلزمهم يتلقّاو فرد معاملة و ما يخلّصوش أغلاط غيرهم. و موش على خاطرك يهودي معناها باش تسخّفني أكثر من غيرك و الاّ على خاطرك مسلم يلزمني نقدّرك أكثر مالّي تستحقّ.
أما توضيح برك: أراهو معنى الكلمات هاذوما ماهوش إزدراء في الأديان و إلاّ تحقير، إنّما هو تعبير على قيمة الوطن و الّي تقعد ديما أعلى من أيّ إنسان كان، و موش مهمّ أنّو يكون مسلم، مسيحي و الاّ يهودي.
ـــــــــــــــــــــــــــــــــــــــــــــــــــــــــــ

سرّتلي تـونس في المنام وصيّة
خلّت دموع الحسرة سايلة على خدودي

قالت و غصّة مسكّرة قراجمها:
"أولادي تقسمو و ما خذوا بمقصودي

اخوات عندي فرّقتهم ناس
كسرو المحبّة و ذبّلولي ورودي

انتم أسودي عرينكم مهاب
انتم خوات ما دمتو وسط حدودي

التّونسي حبّه في قلبي سْوَى
قرآن كتابه، إنجيل، أو تلمودي

موش تونسي الّي تكبّر على أهاليها
و موش تونسي الّي كان قلبه حقودي"

وجعني بكاها و كلّ ما غيّرها
و هديتها عهدي و جميع وعودي

علجال تونس، الكتب ننساها
و نطلق فداها كراطشي و بارودي

التّونسي الّي حبّ الأرض و امّاليها
و ما همّته كلام للبغايض يودي

نصافحه و نخمس عليه بيدّي
ما يهمّني مسلم و ما يهمّ دينه يهودي