jeudi 25 décembre 2008

نقشة من نقشات فنّان بنفسجي




توّا و أنا مروّح على الطّريق رقم 9 ، حالل الشّوفاج، ندفـّي في سويقاتي، و موخّر الكرسي عامل كيف، متمتّع بالمناظر الطّبيعيّة الخلاّبة متاع باراجات البوليسيّة عاليمين و عاليسار، و أحنا تقولش علينا في افغانستان، و حالل إذاعة المنستير قلت نطيحشي بغناية مالتّراث هكّا تعدّيلي الثّنيّة

نلقى برنامج يظهرلي إسمو "سكن اللّيل" متاع البُخاري بن صالح
أيّا سي المنشّط متاع البرنامج جاب فنّان تونسي معروف (باش نعطيه إسم مستعار بالطّبيعة.... ، نقولو أحنا إسمو شكري بوزيّان)، يسأل فيه على أسباب نجاح أغنية "دوّرتني في صباعك"، و هاني باش نحاول نعاود الحوار الّي جرى بيناتهم بكلّ أمانة:

المنشّط: و كان تفسّرلنا أسباب النّجاح الباهر الّي لقاتو الغناية، خاصّة و أنّك ما كنتش معروف ياسر وقتها؟

شكري بوزيّان: و الله وقتها الغناية حملت نوعيّة جديدة متاع ألحان، و إيقاعات موش مستانسين بيها العباد، (بلا بلا بلا، بلا بلا بلا...) أما خاصّة ما ننساوش الّي الغناية وقتها تزامنت مع التّغـييــر الّي كان سبب رئيسي في نجاح الأغنية...؛

المنشّط: أه؟؟؟ آآآ ... ممممم .... احم، احم

شكري بوزيّان: آه امّالا ؟؟؟ وقتها عام 87، النّاس فرحانة بالتّغيير، و قبلت النّوع الجديد متاع الموسيقى هاذي و كان فمّا جوّ متاع فرحة و بهجة بالتّغيير تخلّي النّاس تقبل نوع الألحان هاذوما و هاذاكا علاش الغناية لقات رواج كبير


خمّمت، خمّمت، خمّمت، هزّيت، حطّيت، قستها بالطّول، بالعرض، درتلها مالتالي، روّمتها بالسّياسة، غدرتها على جنب، قلبتها سافيها على عاليها ...... شيء
ما فهمتهاش الحكاية
و يظهرلي زادا كان تقوّملها أينشتاين مالقبر، إي لا يفهم من دين أمّها كعبة

المفيد هو أنّو صاحب الغناية مقتنع بأسباب نجاح غنايتو و يحكي عليها كيف ما يحبّ
أما سؤال برك ......؛
توّا كان يحبّ يعمل غناية جديدة ناجحة، آش يعمل؟
يستنّى التّغيير الجّاي زعمة، و الاّ كيفاش؟؟؟؟

9 commentaires:

onsor العنصر a dit…

Normalement !!!

L'AsNumberOne a dit…

tji tefhem edou5 edou5 ma3at tefhem chay...
bof je pense q c plus fort que nous!!!

subjectif a dit…

فكرتني في حكاية اكا لعزوزة الي سالوها على وجيعة الركايب يا خي قالت مالتغير وهاي جاي نقصت لوجيعة برشا

Daddou a dit…

:-)))))Ya3tik douda ya weldbyrsa
9taltni bédho7k 3assbé7 wéna ma
3inich fih...:-)

bacchus a dit…

حتى هو ملحن كان ما يلحنش لروحو في هالظروف ما يتسماش ملحن

pink_panther a dit…

ti chbik?
C évident!
enti ma 7assitech betta5yir elli jralek wa9t etta5yir?
Ena nethbet 3lih thbout sogr ya 7asra;
ema echchay be9i jeri el maf3oul;
ou dima 3la 9oddem!
bonne année 2009 :)

MeTaLLisTiC a dit…

حتى غنايتو كارها : قفف لسيدنا الزين , الف قفّة ما تكفي...

Emma Benji a dit…

non
bélléhi
il est sérieux????

Anonyme a dit…

:)))))) mouch mennou men dharbet el bistouri wel botox li ya3mel fihom