ولد بيرسا قرّر باش يحلم

اليوم قرّرت باش نحلم

و نحبّكم تحلموا معايا، مادام الحلم مازال بلاش، و ما يعاقبش عليه القانون و كيف "ترتكبو" الحاكم ما يقلّكش علاش؟

.

اليوم قرّرت باش نحلم بروحي في زمان آخر و في مكان آخر

.

باش نحلم بروحي في بلاد بلاش قوادة، بلاش مصامر مصدّدة، بلاش عرك، بلاش تكعبير، بلاش محاكم، بلاش بوليسيّة، بلاش حكومة، بلاش نقابة، بلاش كرطوش

.

بلاد بلاش ديانات، بلاش رسل، بلاش ربوبة، بلاش وليا، بلاش فتاوي، بلاش شعوذة

.

بلاد يسوى فيها البشر بقيمة أفعالو، من غير ما يسفّلوه و الاّ يعظّموه من قبل ما يخرج من ركايب بوه

.

بلاد تعمل فيها النّاس الخير،من غير ماهي خايفة لا من جهنّم لا من منكر لا من نكير، من غير لاهي طامعة لا في سواقي شراب لا في غلّة لا في صبايا لابسة الحرير

.

بلاد ما يتحقرش فيها الإنسان خاطرو أسمر و الاّ خاطرو قصير و الاّ خاطرو فقير و الاّ خاطر بوه جاي من بلاد الغير

.

بلاد لا فيها وشام، لا لحيّ، لا صليب، لا نجوم صفر

بلاد لا فيها ليتوال، لا ادريس، لا الشّرميطي، لا منجي بحر

بلاد لا فيها رشاوي، لا اكتاف، لا تصمصير، لا تطيح قدر

بلاد تقول فيها تقول فيها كلمتك من غير ما تاكل كفّ و ما تذوق المرّ

.

الزّمان الّي نحلم بيه لا فيه سيدي بن غالبة لا سيدي بالنّصر لا للاّ صالحة

المكان الّي نحلم بيه تخرج فيه قصع الكسكسي للزّواولة من غير ما يكون حدّ عمل حادث و الاّ حدّ يحبّ يطلب الرّحمة من عند للاّ خديجة و الاّ سيدي بالحارث

في الزّمان الّي نحلم بيه عرق الجّبين يسوى أكثر مالنّسب، العقل أكثر من الوجه، و التّربية أكثر مالصّياغة و الذهب

.

اليوم هاني حلمت ........ حلمت ........ حلمت

و كيف فقت.........ـ

فقت على صوت بوليس يكفر في ربّي على واحد لابس مريول ليتوال، و هو يطلب في السّماح براس سيدي الجّبلي

برشا حكايات....... راسي وجعني من الأحلام ....... و فطنت الّي مازال فمّا ليتوال، مازال فمّا بوليسيّة، مازال فمّا ربوبة، مازال فمّا وليا، مازااااااااال

.

و في الإخّر ما ....... زال: كان الحلم