vendredi 30 avril 2010

طبيب يتكشّف على فرفور مرتي؟


شوفو في جرّة قهوة، البشر آش ينجّم يقاسي

ولد بيرسا: أهلا ببشرة...، تي وينك يا خويا؟ أيّا برّا نشربو قهوة

بشير: هيّا برّا، أنا بيدي دايخ

شبيك؟

تي ماو المرا تولد الأيامات هاذوما و عندي شويّة قضيات نكمّل فيهم

أيا باهي، ربّي يوصّل بالسّالم... و لاباس، صحّتها مريقلة هي و البمبينو

لا الحمد لله...، في خير و نعمة

مشات للطبيب، قاللها كلّ شيء لاباس؟

إي ديما تمشي، أما توّا ماو الإيكو الإخّرة ما هزّيتهاش
( Echographie)

و علاش ما هزّيتهاش؟

أه؟؟؟ شبيك مهبول؟

لا مانيش مهبول...، أما علاش ما هزّيتهاش؟

بالحقّ، ما تعرفش؟

و الله ما نعرف

يا ولدي معروفة، ماو في الإيكو الإخّرة الطبيب يحطّلها ماكينة في فرفورها... نخلّي طبيب يتكشّف على فرفور مرتي؟؟؟ هاذاكا آش مازال

أه؟؟؟؟؟

تي ما تبداش تدهش عليّ، تخلّي انت واحد يشوفلك فرفور مرتك؟؟؟ تي هو في الإيكو النورمال، كيف يعرّيلها طرف من كرشها نبدى نقردحلو ماذابيّا نعطيه بونية

يا ولدي هاذا موش "واحد"... هذا طبيب!!!. قاري 11 سنا بعد الباك باش يشوف فمّاشي مرض...، فمّاشي عوج...، فمّاشي حاجة موش كيف ما يلزم. ياخي قتلك افرشهولها في القهوة أنا فرفورها؟

اسمعني، اسمعني... تعرف الماكينة هاذي لشنوّة تصلح؟ الماكينة هاذي، يحطّوها باش يشوفو بيها كان الشيء محلول قد ما يلزم و الاّ لا. كان موش محلول، أهوكا يوسّعلها في حزامها

اي باهي و كيف يطلع حزام مرتك موش محلول؟ تموت هي و الولد، نورمال؟ باش الطبيب ما يتكشّفش عليها؟

لا عاد... إيجا نفهّمك

إي نوّرنا يا بشرة.... نوّرنا

اسمعني مليح...، و خوذها قاعدة هاذي: فرفور المرا في الولادة يتحلّ بزوز أنواع. يا إمّا بالماكينة...، و الاّ بمتاع راجلها

أه؟؟؟؟؟ متاع شنوّة؟؟؟

إي إي إي يا سيدي...، يتحلّ بمتاع راجلها. أنا هاني نازل عليها توّا كلّ يوم، نحلّ فيها، باش نهار الولادة تلقى روحها حاضرة. مالصباح للّيل و أنا نازل عليها، عالأقلّ 3 مرّات في النّهار

تحلّ فيها؟؟؟ ياخي عندك ماكينة انت في متاعك و الاّ شنوّة؟ و الاّ ولّيت طبيب و ما قلتلناش؟

إي نعم يا سيدي، أنا طبيب مرتي. و الله حتّى ساعات نبدى ما عينيش و الاّ حاجة، نغصّب على روحي باش وقتلي تولد تبدى متفرهدة

اي ما عينكش، إي... لا ظاهر عليك و على الطّب متاعك! كان جاو الطّبّة الكل كيفك راهو البشر انقرض قبل الديناصورات
و بربّي سامحني. توّا نورمال انت، مرتك على ابواب ولادة و انت النهار الكل تخضّ فيها، قال شنوّا تحلّ فيها؟ ياخي ماخذ مرا و الاّ حكّة تنّ؟
و بالله في الولادة توّا؟ الطبيب يلزمو يلبس ماسك متاع لحام باش يولّدلك بدر البدور متاعك؟

لا أنا ولادة متاعك؟ تولّدها قابلة

يا سيدي واتات ولادة صعيبة...؟ و الاّ الطفل جاء مقلوب...؟ و الاّ يلزمها تولد بالعمليّة...؟ تموت باش الطبيب ما يشوفلهاش فرفورها؟؟؟ بالكشي عندها حاجة عجب مرتك موش كيف العباد؟

لا هاذاكا عاد الله غالب... حكم ربّي! مكره أخاك لا بطل

اسمعني يا بطل...، الطبيب يشوف في عشرين فرفور في النهار...، زعمة كان متاع مرتك مبدّع و الاّ مزيّن بالنقيشة؟ تي هو راو فادد الطبيب، ماذابيه نهار وحدة تقلّو هاو فمّي و الاّ صبعي يوجع، و هو هالنهار و طولو حالّينلو ساقيهم في خليقتو

يا خويا مبدّع و الاّ موش مبدّع. متاع مرتي لا
و اسمع، خوذها نصيحة من عندي: كان تعرّس و مرتك تحبل، ديما امشي معاها للطبيب. و أدخل معاها الداخل. كان قالّك استنّى البرّا هزّ مرتك و روّح...، هاذاكا الطبيب ناوي عالخنن و يحبّ يتكشّفلك عليها
قالّك اللّطف، فمّا حتّى الّي يخدّرو النساء و يستفعلو فيهم و رجالهم يستنّاو البرّا. موش يتفرّج و يمسّ برك

بشير....؛

نعم

تفرّجت البارح في طرح حمّام الإنف...؟ و الله فرحتلها، ما نحبّهاش تطيح....؛

................................................................

11 commentaires:

islam_ayeh a dit…

ههههه
الجهل مصيبة !
أما ماذبيك اتقلو إلي في أول إكو (أقل من شهر من بداية الحمل) الطبة اتحط عود في الفرفور باش اتشوف إذا الحمل في الرحم ولا لا !
زيد، الجماع في الشهر الأخير منصوح به من الكثير من الطبة لأنه يتسبب في ظهور انقباضات (contraction)
تؤدي إلى فتح عنق الرحم (col de l'utérus)
وبالتالي يسهل الولادة أما بالطبيعة موش بالطريقة متع صاحبك :)))))
المرأة ماذابيها تمشي برشة و تشرب مشروبات ساخنة !

في تونس هناك طبيبات مختصة في أمراض النساء والتوليد ذوات كفاءة عالية : على شكون ترضى، خاصةً في المصحات الخاصة ! لذا كان عليه من الأول إهزها لطبيبة ؛-)

ولد بيرسا a dit…

يوصل يا سيدي :-)

أما قتلو علاش ما هزّيتهاش لمرا مالأوّل و قصّ النزاع، قالّي ما فمّاش هوني، الكلّهم بعاد

أما ان شاء الله المرا تولد لاباس برك، توّا ما عادش فيها...، دزّو خوه

(و الاّ قول دزّو بوه...، و ان شاء الله ما يطيحش في الشربة) هههههه
:-)))

Roxie White a dit…

malla bachra malla! j'ai éclaté de rire en lisant ce texte. en plus, ça fait des années que j'ai pas entendu le terme "farfour"!!!

rabbi ywassel bessèlem w akahaw :D

Anonyme a dit…

alors là tu exploses tous les records Weldbyrsa !!!

Infinity a dit…

mamsat'ha kilmit farfour .. c'est très enfantin .. j'espère que tu as inventé cette histoire .. parce que franchement on peut comprendre qu'il y ait des mecs aussi con pour croire qu'il peut en la baisant élargir le vagin de sa femme .. mais aussi con pour raconter ça dans un café .. ou pour ne pas savoir qu'il y a des femmes gynéco .. c'est quand même grave.

ولد بيرسا a dit…

eh bien je n'ai pas inventé un seul mot, tout est vrai malheureusement
c'est bien grave oui!

bella_ragatsa a dit…

j'ai pas cessé de rire en lisant le post. kothr lham itha7ik kima y9oulou.
le mot farfour aussi me faisait marrer:ppp
la pauvre, ech t9assi, 9alou élargie son vagin en la baisant mdr.
walahi, jouer le macho, c'est pas une chose étrange dans la tunisie mais être à ce point con, là je reste perplexe:pp

ولد بيرسا a dit…

toi qui es plongée dans l'univers de akram et de ghada, des gars comme ça peuvent te paraitre des extraterrestres :-P
entre la banalité des "farfour" chez toi et la gravité de la chose chez lui, il y a tout u monde :-)
pourtant ce dont je parle n'est que la pure réalité

Anonyme a dit…

لو كان لا يقدر يمرض بالمصرانة لزائدة، تو موش يتكشفولو على ن برك أما يدخلولو صبع بالفازلين

لاعب النرد a dit…

هههههههههههههه
شيختني ضحك يا صاحبي... الله يهلك الفرافير اللي مدخلين العباد في حيط..ـ
هذا مشكلته مع فرفور مرته... المشكلة في اللي أوصياء على فرافير البشرية الكل.ـ

Unknown a dit…

Dans un cabinet privé rien n'est trop grave. Il n y'aura que le medecin et son infirmière qui vont regarder le "farfour" :)

Mais imaginez vous dans un hopital universitaire! Il y'aura tout le staff du service concerné, les assistants, les infimier(e)s, les éleves-medecins en stage, et meme les hommes/femmes de ménages, et meme les autres patients parfois, vont tous regarder "le farfour", et là sa devient vraimant génant, pour les femmes comme pour les hommes.

D'ailleurs les medecins eux-memes n'acceptent pas que leurs femmes soient denudées d'une façon pareilles dans les hopitaux.

Dans les hopitaux les medecins traitent le patient comme un machin mécanique, ils ne font pas attention a ces choses là, sauf s'il sagit d'une proche (sa femme, sa soeur, sa mère, ...).