مسرحية "الناس الأخرى" : إنتحار توفيق الجبالي

بعد السّيف علّق منجل...، و بعد العزّ و التّدليل ولّى فرّاشة زنبيل....؛

هاذوما أمثلة شعبيّة ينطبقو على مسرحيّة توفيق الجبالي الجديدة الّي شفتها البارح في التّياترو
الّي شفتو البارح شيء انّجّم نقول عليه أنّو عيب... ما يجيش


مسرحيّة كاينّي يـبصم فيها توفيق الجبالي، حسب رأيي (الفنّان المسرحي الكبير و واحد من أكبر زوز مسرحيّين مع الفاضل الجعايبي) على "حجّة وفاتو" الفنّيّة

حجّة الوفاة هاذي فيها برشا فقرات

الفقرة الأولى هي إستعمال توفيق الجبالي لممثلين هاوين (و هاوين زادا في أعمق هوّة فنّيّة ينجّم يتصوّرها البشر): معناها كاينّو الواحد لمّ ثمنية فروخ من أوّل زنقة عرضتّو و عمل بيهم مسرحيّة

ما فهمتش كيفاش واحد جنّ متاع مسرح كيف توفيق الجبالي ينجّم يخدّم معاه ممثّلين في المستوى الهزيل متاع الممثلين الّي شفتهم البارح؟؟؟

ممثلين من غير حتّى عمق فنّي، صوتهم ما يوصلش، ما ينجّمو يوصّلو حتّى إحساس، حتّى شعور، حتّى شيء... قالشي الدّزيري: والو

و هذا شيء متوقّع، على خاطر موش بلاش الممثلين المحترفين يقراو 4 سنين بعد الباك باش يوصلو يقنعو و يفرضو رواحهم، و شوف و شوف

في بالي الشيء وضاح و تفهم مع مسرحيّات أخرين الّي استعملو ممثلين هاوين و طلعو كي الحنّة في ساق البغل، لكن مع الأسف ظهر بالكاشف الّي الدّرس مازال ما تفهمش مليح

الفقرة الثانية من "حجّة الوفاة" هي الفرق الكبييييييير بين الحضور الرّكحي متاع واحد معلّم كيف توفيق الجبالي و جماعة ببّوش بو مصّة كيف الأخرين الكلّ.

معناها حسب رأيي، توفيق الجبالي طيّح قدرو و لطّخ مسيرتو الكلّ بها الخدمة مع ناس مع عندهم من التمثيل كان الكلام

يقول القايل كان عطى دورو لواحد هاوي و خلاّها كلّها وزّاكة تتشاطح فوق الركح و هو يسيّر من بعيد، و الله تنجّم تتعدّى. راهو الواحد دخل و خرج و نسى الهدرة بعد ربع ساعة.

أما برجوليّة هكّا ضرّ روحو برشا برشا برشا

و الاّ بربّي آش فيها كان جاب 8 ممثّلين محترفين، راهم خدمولو خدمة على قاعدة، و كل حدّ زاد فيها شويّة من الروح الّي عندو، و حتّى كان فمّا طرف ضعف يتخبّى و يتصقل و كذا...؟؟؟
برّا حوّس تفهم؟؟؟؟

الفقرة الثالثة، و الّي تدخل شويّة في محتوى المسرحيّة، هي نصّ الدّور متاع توفيق الجبالي: كلام سمعناه ألف مرّة، قالو في ألف مسرحيّة قبل، ضحكنا عليه مئات المرّات قبل.... لكن .... يزّي، فدّينا، مساطت الهدرة الزّح.

علاش يقلّك:

كلّ ما قد فات لا ردّ له ... فلتكن عن ذاك مصروف الطّمع
أيعود الحسن من بعد الصّبى ... قلـّما أدبر الشّيء فرجع

فرد تفدليك، فرد لعب عالكلام، فرد حركات، فرد كلّ شيء... معناها الواحد قاعد يسمع في نفس الجمل و نفس الكلام في مسرحيّات ما عندها حتّى علاقة ببعضها

و الّي يقلّق أكثر من هكّا، كوْنو الكلام هذا، الّي كان قبل يوجع و يوصل بيك حتّى لأعمق مستويات النقد و العواطف الّي تنجّم تتصوّرها، ولّى سطحي، خفيف، كاينّو يتبّع في النّسمة

فمّا الّي يقول: توفيق الجبالي وفالو و بابورو زفـّر... أنا نخيّر نقول لعلّ عثرة، و الأيّام توّ تورّينا الصحيح

الفقرة الرابعة من "حجّة الوفاة" هي الدّيكور و الجوجمة

ديكور معبّي برشا، ثقيل، يخبّل العينين، و زيد مع الممثلين الّي ما يفرّقوش بين العطاء و المجهود على الرّكح و بين التسوفيج و التخلويض...، مع الجوجمة متاع الصّوت، مع الكلام الّي يتعاود 40 مرّة...، حاسيلو تخرج راسك مفولغ...، كاينّك متكيّف و الاّ ماكل طريحة

و ماو ناس بكري قالو زادا: الّي مستانس ياكل من يدّك، كيف يراك يجوع

خيبة أمل كبيرة من مبدع كيف توفيق الجبالي، على خاطر الّي يسنّسك بطقاطق كيف كلام اللّيل، و هنا تونس، و مذكّرات دينصور، و خاصّة المجنون، الخ... ما تنجّم تستنّى منّو كان خير من هكّا

حتّى الجمهور كيف صفّق، صفّق ماخذة في الخاطر، بتربية لا أكثر و لا أقلّ. و على كلّ حال الممثلين فهمو الّي الناس ما عجبتهمش الخدمة و الّي كانو يستنّاو في حاجة خير بياسر من هكّا. التحيّة كانت باردة ساردة، كاينّي أربعين موش مسرحيّة

في الوقت الّي الفاضل الجعايبي مكسّر الدّنيا بخدمة صحيحة، مع ممثلين صحاح، و العروض الكلّ تتعمل قدّام صالة متكّمة بالعباد و يلزمك تعربن قبل بثلاثة أيام باش تلقى بقعة...، توفيق الجبالي قاعد يحاول في محاولات يائسة مع جماعة خلواضة يهزّو و يسبطو، قال شنوّة هانا نعملو في المسرح.... مسهلو

على كلّ الشيء هاذا الكلّ من اختيارو، حدّ ما ضربو على يديه و قالّو اخدم مع جماعة بو دورو

ان شاء الله توفيق الجبالي يلقى طريقة باش يلقف بيها روحو، على خاطر هكّا أكيد مأكّد أنّو باش ياكل كبّوط عمرو ما راه

و ان شاء الله زادا يكون الّي عملو هذا ما يكون كان كبّوط برك، و موش عمليّة... انتحار