vendredi 28 août 2009

توريست: مرحبا.... عربي: حنك الباب! ممنوع


بحكم خدمتي الّي تستوجب أنّي نتنقّل برشا، قمت نهار الاربعاء الصباح، على أساس باش نمشي لمدنين و نرجع (معناها باش نعمل حكاية 1000 كيلومتر فرد نهار)

خرجت السبعة متاع الصباح مالدار و شدّيت الثنيّة: طرف موسيقى باهية...، و الأوتوروت

خلطت لصفاقس، حسّيت بروحي ترهوجت شويّا و مانيش ياسر في فورمة...
تكّيت في البيياج، عملت نصيّف ساعة نوم و قمت. قلت توّا واحد يعمل قهيوة و يكمّل.

قعدت نثبّت فمّاش قهوة محلولة... بالطبيعة لا... و كان باش ندخل نفركس على وتيل باش نضيّع برشا وقت...

كيف خلطت للمحرس، بعد البلاد نشوف في كيران التوريست واقفين، و أبناء عيسى يشربو في الڤازوز و ياكلو في الڤلاس (هاذي نقطة تو نرجعلها مرّة أخرى، على خاطر الطريقة الي هوما يشربو بيها في الڤازوز و الّي ياكلو بيها في الڤلاس عمري ما ريتها...، حتّى في أفلام الرّعب) حاسيلو...

أيّا قلت سلكت...

دخلت للقهوة: السّلام، السّلام

خويا باللاّهي قهوة

غزر لصاحبو... شفتو جاوبو براسو معناها: لا

قالّي: لا خويا، قهوة لا

شنوّة لا؟ علاش لا؟

قالّي: ڤيد انت؟ تابع التّوريست؟

قتلو: لا خويا، مانيش تابع التّوريست... تابعك انت، تونسي كيفي كيفك

قالّي: سامحني خويا، قهاوي للعرب لا

خرجت.....

100 ميترو بعد، فمّا قهوة أخرى (لاصقة منطقة الحرس) كيف كيف، تفغّم بالتوريست. وقّفت الكرهبة و هبطت

السّلام، السّلام... خويا قهوة

قعد يغزرلي شويّا، و من بعد دار للماكينة باش يعمل القهوة. جاه صاحبو يجري، درا آش وتوتلو، و تلفّتو شيرة الباب و من بعد جاوني يغزرولي بكلّ أسف

قالّي: سامحني صاحبي، ممنوع

ممنوع؟؟؟

قالّي: ممنوع منعا باتّا باش نسربيو قهاوي للعرب... منبّهين علينا، الّي يبيع لواحد عربي يتحمّل مسؤوليتو

ملاّ حكاية!!! باهي و دبّوزة ماء؟ ممنوع زادا و الاّ مسموح؟

قالّي: شيء.... الله غالب. ماذابيّا أنا نبيعلك و نخدم على روحي، أما و راس خويا لا انّجّم

معناها توّا أنا قايم السّتّة متاع الصباح، عامل يجي 300 كيلومتر، و مازلت باش نعمل 700 أخرين، و ممنوع عليّ باش نشرب قهوة نحلّ بيها عينيّ، في قهوة محلولة و تخدم، و تسربي في التّوريست في بلادي و أنا نتفرّج؟؟؟

قالّي: الله غالب

قتلو خويا ربّي يعينكم، و خرجت

و أنا خارج (و وقتها فهمت علاش هوما تلفّتو للباب) نلقى واحد حرس هاكلّي زعما زعما سيفيل، شادد جنب الباب و يڤردحلي، و قعد يتبّع فيّ بعينيه حتّى لين شقّيت الكاياس و ركبت في الكرهبة و مشيت.

ممنوع جديد تزاد للممنوعات الّي نعرفهم الكلّ: ان شاء الله بالعمار و طول العمر في بلاد الفرح الدّائم

أما زعما توّا كان الواحد يمشيلهم لبلادهم هاك التوريست... فمّاشي حتّى ربع امكانيّة باش تلقى روحك متمتّع بحاجة ممنوعة عليهم هوما؟؟؟

و أحنا حتّى شربة الماء ممنوعة علينا في بلادنا



30 commentaires:

Zorbouzara a dit…

ولــد بيـــــــــــرسا طلع دغفة، بريمو فاش جاء السلام عليكم ؟ سوقوندو حقك مشيت على جمل باش يعرفو الي انت على سفر ( وفعدة من أيام أخر) ايجل لخوك نعملك ستاج قراتوي :) أوكي

ولد بيرسا a dit…

الله غالب :-))) طلعت زكيم، آش تحب تعمل...
المرّة الجاية تو نمشي على جمل و نلبس كشطة فمّاش ما يروفو عليّ بشربة ماء

Big Trap Boy a dit…

ملا مهازل، شي يوقف المخ

بلاد التخلف الدائم وديما لتالي ليس القدّام

حاجة ما يصدقهاش العقل

ولد بيرسا a dit…

يظهرلي نهارة الّي نفهم سبب ها "الممنوع" هاذا، باش نكون فهمت كل شيء في حياتي...؛

Amel a dit…

Comment ça se fait que dans la majorité des grandes villes les cafés soient ouverts à tout le monde et que dans d'autres petites villes ou villages on n'ait pas le droit de prendre un café dans une station pour les voyageurs visiblement. Je suppose que c'est un ijtihad de la part des policiers de cette région et qu'il ne faut pas mettre ça sur le compte de l'état en parlant de lois.

En tout cas j'espère que t'es arrivé à destination sans incidents (plutôt sans autres incidents) et la prochaine fois prévoit le nécessaire pour la route.

عجبتني كيف قالك إنت ڨيد؟ ياخي الڨيد موش عربي؟ و إلا كيف يبدى مسافر معاهم ميسالش (يعني تابعهم) و كيف يبدى مسافر وحدو لا!!!

ART.ticuler a dit…

كان بودي التصويت لتدوينتك مرتين ! فماش ما العباد تفيق البلاد فين ماشية!

ولد بيرسا a dit…

@ Amel:
Je suis bien arrivé à destination, merci :-) j'ai pu prendre un café dans un hôtel à Medenine. j'en ai emporté un autre et une bouteille d'eau avec moi pour la route (trabbit 3ad :-D)
je suis arrivé à la maison à 21h20 après avoir fait 1012 km :-S
ce qui est révoltant, ce n'est pas le fait que les cafés sont fermés, mais qu'ils soient ouverts et qu'ils refusent de me servir en voyant ma gueule... le délit de faciès par excellence!

ولد بيرسا a dit…

@ ART.ticuler:
شكرا صديقي :-)
أما كان جاء التصويت ينفع رانا فقنا بيه عندنا برشا
كيما قالّك البيق، البلاد كيف بول الجمل، ماشية لتالي ليس لقدّام
و نقعدو ننبحو من هنا لغدوة؟ شيء... ما تتحرّك حتّى شعرة... كيف هاك الّي يحفر في الماء

Amel a dit…

آنا لاحظت حاجة. إلي يصوم يشوف في القهاوي و الشوارع معبية بالفطارة . و إلي ما يصومش يشوف في القهاوي مسكرة و إلا محلولة و ما تسربيش العرب و الحالة هاذي بش تلقاها يلزم تبعد لأعماق تونس و تكون بعيد على المناطق الحية.

يعني بش ننستنجو مل الحكاية هاذي تعميم من نوع "البلاد توخر كيف بول الجمل" يقعد استنتاج غير موضوعي ما ينبني على حتى أساس من الصحة.

Le verre est soi à moitié plein soi à moitié vide selon la personne

ولد بيرسا a dit…

@ Amel
قبل، كانو برشة قهاوي محلولين
الّي يحبّ يدخل يدخل، و الّي صايم يتعدّى... من غير ما حتّى واحد يسبّب أي مشكلة للآخر
الّي صايم ماهوش باش يتقلّق برشا كيف يرى قهوة محلولة، لأنّو الصيام ماهوش مجبور عليه، أما هو اختيار شخصي

أما أنّك تحلّ، و تعمل القهاوي و الكسكروتات، و تبرّد الماء و القازوز، و ما تبيعهم كان للتوريست... هاذا نسمّيه رجوع إلى الوراء، على خاطرو تنقيص من نسبة الحرّية الي يتمتّع بيها التونسي في بلادو، و الّي هي محسوب ما قعد فيها شيء

عاشور الناجي a dit…

زمن طالبان

تي حتى شرعا مسافر فوق 80 كيلو تفطر ، و بالك مريض ؟ شعب عمال يرجع لتالي، زعام كان يشطحوا بمناسبة تقديم ملف الترشح

عنصرية ضدنا في بلادنا

هاذي البداية برك

زمن طالبان

ART.ticuler a dit…

شفت ماهو يا عاشور و إنت تقلي باش نخرج من تن بلوغ؟ إذا كان 100 تدوينة تعطي الأمكانية باش ولد بيرسة فقط يشرب قهوة فين يحب أنا مستعد نكتب 100 تدوينة

ولد بيرسا a dit…

@ عاشور

يا ولدي مريض و الاّ صحيح... عطشت، نحبّ نشرب!!!!
مازالشي؟
حتّى آش يحطّ الواحد في كرشو محكوم فيه

تره برّا قلّهم يكلّموهم هوما الّي يدقّو في البيرّة مالصباح للّيل في الأبو نوّاس... في بلادنا... و في رمضان زادا!!!

و الاّ معانا أحنا رجال، و معاهم هوما يولّيوا نوع آخر؟

أرتيكولي @

ههههههههه
يعيّشك يا خويا
موش لازم اتّعب روحك... هوني كاينّك تحرث في البحر
أتو نعمل نسكافي في الدّار و برّا... كيف قدّر علينا ربّي
:-))))

Amel a dit…

@ ART.ticuler:
إنت بالذات تدون بش لعباد يولي يكرهوكم موش يتسامحو معاكم. ابدى إنت تسامح مع الصايمين و احترم دينهم أتوة يحترموك. و اللي يسمعك تحكي يقول القهاوي في تونس مسكرة في رمضان و انت و شلتك الوحدين الفاطرين يعني أقلية في المجتمع مسكينة مهضومة الحقوق. جاب ربي جرابة صافي فيه البلوڨسفير (يعني توانسة صافي) و الكل نعرفو واقع رمضان في تونس

ART.ticuler a dit…

@amel
تعليقك ناقض للوضوء ومبطل للصيام

Anonyme a dit…

أتذكر اليوم الأول الذي راودتني فيه فكرة إنشاء هذه الصفحة، فيتملكني الفخر بأنني أول من أنشأ صفحة مساندة لسيادة الرئيس زين العابدين بن علي. صفحة جمعت بعد ذلك عشرات الآلاف من المساندين لسياسة الحكم الرشيد لهذا العهد السعيد.

أريد أن أقص عليكم الظروف و الأسباب التي دفعتني لإنشاء هذه الصفحة.

بدأت القصة عندما دخلت على هذه الشبكة الإجتماعية منذ عام تقريبا، رغم قلة التونسيين في ذلك الحين الذي لم يكن يفوق خمسة عشر ألف، مقارنة بالعدد الحالي الذي بلغ تقريبا نصف مليون على حدّ قول السيد أمين عام إتحاد منظمات الشباب في اجتماع في جربة.

قبل عام، كان "الفايس بوك" يعج بكل أشكال الكذب و تشويه الحقائق و الإساءات إلى صورة وطننا الحبيب قيادة و شعبا. و الأدهى و الأمر أن تصدر هذه الإساءات عن فئة من التونسيين باعت ضمائرها و أصبحت تكيل الإتهامات بدون دليل.

و كنت أرد بعفوية عليهم، إلى أن فقدت الأمل في إيجاد مناخ صحّي للحوار، و لكم أن تتخيلوا الكمّ الهائل من الشتائم و التهديدات، فوقع قرصنة مدونتي الأولى (مع بن علي 2009)، و تزوير "بروفايلي" على "الفايس بوك" من قبل المدعو "فريد باي"، الذي تحداني ذات مرّة و قال لي بأن كلّ رؤساء العالم لهم صفحات مساندة، ما عدا سيادة رئيس الدولة.

فأنشأت هذه الصفحة على الفور، و كان مفاجأة صادمة له و لأمثاله حيث وصل عدد المساندين إلى خمسة آلاف في ظرف وجيز جدا.

إلى أن وصل عدد المساندين الآن واحد وعشرون ألفا و القادم أفضل.

و ستبقى هذه الصفحة خير دليل على اعتراف التونسيين لصانع التغيير و صانع مستقبل تونس.

Hamadi a dit…

آش يهمهم صايم و إلا فاطر تونسي و إلا هنداوي أما تحونيش فارغ

Anonyme a dit…

1, t'aurais pu prévoir un thermos de café; 2, tu serais passé par Sfax, t'aurais pu prendre ton café.
Non Mr veut tout, rien a cirer des millions d'idiots qui jeunent, une minorité qui veut imposer son "tunisian way of life", et quoi encore ?
t'inquiètes vous passerez pas ni vous (cette minorité de laïcs ni ces khwanjyas) !!!
il est très facile de trouver un compromis mais non on préfère la confrontation gratuite, eh bien vous pouvez vous entretuer !
3aber

Al-Hallège a dit…

ان كنت قيدا او على سفر في صحراء الربع الخالي فعدة من أيام أخر

ولد بيرسا a dit…

@ Hamadi:
أما قلّي شكون يفهمك...

@ Anonyme:
في بالي الّي كنت انّجّم ندخل لصفاقس، أما كنت باش نضيّع ساعة على الأقلّ و أنا ما يساعدنيش.
أما كان قريت مليح الحكاية، ماهاش هاذيكا مشكلتي... مشكلتي الّي كوني القهوة محلولة و تسربي في التّوريست و أنا لا
و سامحني، أما باقي الحكاية متاع الخوانجيّة و الأقلّيّة و الأغلبيّة و درا شنوّة، مانيش باش نجاوبك عليها على خاطر تضييع وقت و باش نوجع راسي معاك في الفارغ

@ Al-Hallège:
حتّى هاذي ما تنفعش معاهم :-)))

ولد بيرسا a dit…

@ الأنونيم الّي جاي يطحّن عندي

يا ولدي فاش جاي تخرم براس بوك؟؟؟
آش راحلي فيك أنا، انت و الطّحّانة متاعك؟
ياخي لتوّا ما فهمتو الّي أنا ما نحبّكمش و ما نحبّش التّجمّع متاعكم و ما نحبّش الطحين متاعكم الّي يجيبلي الرّدّان و يدوّرلي خواطري؟؟؟
كان فمّا كذّابة في الدّنيا هاذي راكم انتوما... لذا يرحم امّك، ها المدوّنة هاذي ما عادش تحطّ فيها كسرتك.
أهيكا الأنترنات واسعة و عريضة، طحّن فيها لين اتدوخ... هوني لا

wa7ed mel cha3b a dit…

الله لا يسامحك إنت و الفطارة و الكفار إلي معاك


توا تتذكر الكلام هذا نهارة إلي تبدا تتقلى في جهنم إنت و ال بيغ تراب إندرا شنوا

الله لا تربحك

ولد بيرسا a dit…

باهي، امّالا براس أمّك نهارة الّي تراني نتقلى في جهنّم، موش لازم تجي تحامي عليّ... خلّيني تو نتصرّف وحدي

Amel a dit…

ديما تفتي علينا يا ارتيكيلي

mgarb3a a dit…

wallahi pa la peine de s'afficher kont tnajjem ta9dhi oumourek men 3and ayy 3attar ou toftor discrétement fi karhabtek
bel 7a9, eux ils ne respectent pas ema 7atta enti makech 5sayyes ou ghalet barcha zeda!

ولد بيرسا a dit…

@ mgarb3a

wallahi si les "3attara" vendaient du café, je n'aurais pas hésité une seconde.
et puis je ne sais pas ce que ça veut dire "s'afficher" quand on est au milieu de nulle part et qu'on a besoin de boire un café pour continuer la route!!!
en résumé, tu aurais dû trouver autre chose ou alors te taire... ça aurait été vachement mieux!

Anonyme a dit…

اساليب كيما هاذي خدمو بيها من خمسين عام التالي ولحد توّا مواصلين بنفس الوتيرة.
المقال فى ظاهرو مقال عادي يحكي على واحد جيعان(مسكين)فى السفر.لكن حقيقة المقال هو انو ياتى فى نطاق حملة منظمة ومدروسة ومهيكلة ومعد لها مسبقا وبكل خبث لاجتثاث الروح الدينية من المجتمع عبر التزلّف المفضوح للنصوص القانونية والالتواء حول فصول القانون لهدم عقيدة الناس.ولا اظن اننى بحاجة لتذكير القراء باسماء المشاركين فى كتابة التعاليق عن المقال فكل عارف بعالم التدوين لا تنطلي عليه مؤامرات عصابة الالحاد وهو امر لا تختص به بلادنا على كل حال.فكل ارجاء العالم الاسلامى بما فى ذلك الافتراضية تعج بامثال هؤلاء.لكن عزاءنا انهم شبعوا صفعا من كل من هب ودب

ولد بيرسا a dit…

@ dernier anonyme:

انّجّم نجاوبك ببرشا طرق في ما يخصّ عقليّة المؤامرة هاذي متاعك و الحملة ضدّ درا شنوّا و التّزلّف متاع "العصابة" و كذا... أما في بلاصة باش نقلّق روحي و نوجع راسي معاك، قرّرت باش نعمل حاجة أخرى...

(شوف البوست الّي بعد هاذا تو تفهم آش باش نعمل)؛

anti rhoutt a dit…

لا صديقي ولد بيرسا..موش انتى المقصود بالمؤامرة نعرفك تونسي بن تونسي وتحب تونس يمكن اكثر مننى زادا..لكن المشكل انك ضحية..ضحية قاعدين نشوفو فيك كل يوم تغرق وما نقدرولك على حتى شي..المؤامرة تستدعي حاجات ما تتوففرلكش..مؤهلات وامكانيات ضخمة يعجز اي فرد وحدو باش يوففرها..لكن مع الاسف انتى اداة..اداة استعملوك عن غير وعي منك..هاذيا دول ومنظمات بميزانيات ضخمة ومفكرين ومهندسين وعلماء واستراتيجيا بكللهم يعملو على مدار الساعة باش ينججموا يتصيدوا ضحايا من امثالك..وانتى للاسف حصلت ..حصلت واصبحت تعمل معاهم عن طواعية وبرضاك وببرمجة عن بعد والاهم هو انك تقدم خدمات رهيبة وعملاقة لكن مجانية..ومن غير ماتشعر..مبننج..انيستيزي درجة عالية..ورد بالك تقللي ان الجهات هاذيا انتجها خيالي المريض وووو الخ..انا موش قاعد نحكيلك على استنتاجات وانما نحكي حاجات صادرة من عندهم بصفة رسمية ومعلنة وعلى رؤوس الاشهاد..على عكسك انتى..هوما عداءهم للدين الاسلامي ما يخببيوهش..بل هو معلن وحتى مخططات المواجهة يعلنوها كيف كيف لا حشمة ولا جعرة..ولذلك عقلية المؤامرة حكاية بيدونة..نحكيو على مخطط معلن موش مؤامرة..والان انت والالاف من امثالك اللذين سقطوا فى شراكهم..اصبحتهم جزءا من الية تنفيذ المخطط..مخخطط اجثثاث العقيدة..تقول انتى علاش اجتثاث العقيدة ..هونى الاجابة تصعب..موش هي صعيبة لكنك انتى تصعب عليك..ما تتقبلهاش وما تفهماشس..لانك صايي..مبرمج..مفرمط..والاعراض متاع ارهاصاتك قاعدين نقراو فيها فى البلوغ متاعك..وانتى عامل نددابة على فطور رمضان..اشكون جا قاللك صوم بالسيف..ولو باش تعمل بالوعة فى فممك انتى حر..ماتبططلش ماكلة..اشرب الشراب وكى تعطش ارخيك مالماء..اشرب البيررة..لكن بكللو تنججم تعملو باحترام جيرانك والناس اللي يعيشو معاك وهوما صايمين..نقصد المجتمع اللي انتى احد افراده..المجتمع هذا اللي هوما نججمو يعملو منك عدو ليه..هو اللي يطللعك وهو اللي يهببطك..وحتى فى علم الطب..وتنججم تسال عليها الطبة المعلومة..حتى طبيا..المجنون او المريض النفسي من اهم علامات الاصابة عندو هي عدم القدرة على التواصل مع المحيط..يعنى ببساطة اي بشر يحس روحو عدو لمحيطه ومجتمعه ويعمل على التصعيد معهما فهو قطعا فى طريق الجنون او الاصابة النفسية..وارجو ان لا تكون من هؤلاء..رغم بعض الاعراض البارزة فى المدونة..اذا ولد بيرصا..انت الان داخل الة كبيرة تسير بك نحو المجهول وانت تنعم بسعادة الدوران اللولبي داخل الماكينة لا تنسى ان فى نهاية الطريق محطة ستندم على النزول بها وسيصعب عليك الرجوع او التراجع..مانيش باش نقللك اهبط من الماكينة..نعرف اللي ماتنججمش لانها تدور بسرعة لا تسمح لك بالقفز او النزول..وبما انك فى حالة دوران قصوى فعلى الاقل قر بذنبك واستغفر لنفسك..لعلك تريح ضميرا تمككن به المرض..ولانهم سيضحكون عليك بعد استعمالك وستضحك على نفسك كثيرا لانك لن تجني من عدائك للاسلام والمسلمين سوى الدماء اللتى ستلطّخ راسك..وعندها ستعرف انك كنت تناطح الصخر..والعزة للله ولرسوله وللمؤمنين..وسحقا للخضوع

Anonyme a dit…

koul ilba5s ma7léha fik