ولد بيرسا متضامن مع زياد الهاني

السّاعة أوّل حاجة، للّي ما يعرفوش، زياد الهاني ولد بيرسا
لذا: أنا و أخي على ابن عمّي، و أنا و ابن عمّي على الغريب

هي في الحقيقة الحكاية متاع زياد عجبتني مالأوّل، على خاطر الشّجاعة الّي عندو و الذّكاء متاعو خلاّوه يجلب انتباه النّاس الكلّ من غير ما يسبّ حدّ و الاّ يثلب و الاّ يستعمل طرق معوّجة باش يوصل لغايتو
لكن الّي جلب انتباهي أكثر، هي ها الحملة متاع النّبّارة و المرتزقة الّي عملوها ضدّ زياد قال شنوّا إثارة و تحقيق مآرب ذاتيّة و هاك اللّغة الصّفراء الّي مستانسين بيها

زياد الهاني هذا، و بالرّغم من أنّهم أفكارو السّياسيّة ما يعجبونيش ياسر، مثال متاع تربية و أخلاق .... معناها وقتلّي يقلّك صباح الخير يحشّمك على روحك على ماهو متربّي و متخلّق
و أيّ واحد ينجّم يعمل دعسة لبيرسا و يسإل على أخلاق زياد الهاني و يشوف بعينيه؛

هاذي حاجة

حاجة أخرى توّا: توّا زياد شنوّا عمل؟ مشى للمحكمة و قام بقضيّة ضدّ وكالة السّلامة المعلوماتيّة على خاطرها حجبت فايسبوك، و استدعى رئيس الجمهوريّة كشاهد على خاطرو لاحظ الحجب هاذا و الحكاية خرجت في الجرايد
آش معناها؟ معناها طالب بحقّو، بحرّيتو، ....... و رفض الغضوع و الإذعان كيف هاك الزّنوس الّي يقفّفو بكلّ جوارحهم، و الّي ديما مع الواقف ... يتبّعو تتبيع

لذا أنا نقول أنّو المواطن عندو الحقّ يطالب بحرّيتو، و الّي يحبّ يعبّر بصوت عالي ما يتسمّاش مهرّج، و الّي حرّية التّعبير ماهاش مزايدة مبتذلة

و نختم بكليمتين متاع شاعرنا علي لسود المرزوقي

ليّام راهي قــــلال ----- يتغيّرو على ألف حال و حال
...................
قدّ ما يطول الوقت زاد إطوال ----- لازم زرارع زرعكم تجناها
أنا معاك غير مكبّلتني غلال ----- و الأفكار كان الله يعلم باها