بحكم خدمتي الّي تستوجب أنّي نتنقّل برشا، قمت نهار الاربعاء الصباح، على أساس باش نمشي لمدنين و نرجع (معناها باش نعمل حكاية 1000 كيلومتر فرد نهار)
خرجت السبعة متاع الصباح مالدار و شدّيت الثنيّة: طرف موسيقى باهية...، و الأوتوروت
خلطت لصفاقس، حسّيت بروحي ترهوجت شويّا و مانيش ياسر في فورمة...
تكّيت في البيياج، عملت نصيّف ساعة نوم و قمت. قلت توّا واحد يعمل قهيوة و يكمّل.
قعدت نثبّت فمّاش قهوة محلولة... بالطبيعة لا... و كان باش ندخل نفركس على وتيل باش نضيّع برشا وقت...
كيف خلطت للمحرس، بعد البلاد نشوف في كيران التوريست واقفين، و أبناء عيسى يشربو في الڤازوز و ياكلو في الڤلاس (هاذي نقطة تو نرجعلها مرّة أخرى، على خاطر الطريقة الي هوما يشربو بيها في الڤازوز و الّي ياكلو بيها في الڤلاس عمري ما ريتها...، حتّى في أفلام الرّعب) حاسيلو...
أيّا قلت سلكت...
دخلت للقهوة: السّلام، السّلام
خويا باللاّهي قهوة
غزر لصاحبو... شفتو جاوبو براسو معناها: لا
قالّي: لا خويا، قهوة لا
شنوّة لا؟ علاش لا؟
قالّي: ڤيد انت؟ تابع التّوريست؟
قتلو: لا خويا، مانيش تابع التّوريست... تابعك انت، تونسي كيفي كيفك
قالّي: سامحني خويا، قهاوي للعرب لا
خرجت.....
100 ميترو بعد، فمّا قهوة أخرى (لاصقة منطقة الحرس) كيف كيف، تفغّم بالتوريست. وقّفت الكرهبة و هبطت
السّلام، السّلام... خويا قهوة
قعد يغزرلي شويّا، و من بعد دار للماكينة باش يعمل القهوة. جاه صاحبو يجري، درا آش وتوتلو، و تلفّتو شيرة الباب و من بعد جاوني يغزرولي بكلّ أسف
قالّي: سامحني صاحبي، ممنوع
ممنوع؟؟؟
قالّي: ممنوع منعا باتّا باش نسربيو قهاوي للعرب... منبّهين علينا، الّي يبيع لواحد عربي يتحمّل مسؤوليتو
ملاّ حكاية!!! باهي و دبّوزة ماء؟ ممنوع زادا و الاّ مسموح؟
قالّي: شيء.... الله غالب. ماذابيّا أنا نبيعلك و نخدم على روحي، أما و راس خويا لا انّجّم
معناها توّا أنا قايم السّتّة متاع الصباح، عامل يجي 300 كيلومتر، و مازلت باش نعمل 700 أخرين، و ممنوع عليّ باش نشرب قهوة نحلّ بيها عينيّ، في قهوة محلولة و تخدم، و تسربي في التّوريست في بلادي و أنا نتفرّج؟؟؟
قالّي: الله غالب
قتلو خويا ربّي يعينكم، و خرجت
و أنا خارج (و وقتها فهمت علاش هوما تلفّتو للباب) نلقى واحد حرس هاكلّي زعما زعما سيفيل، شادد جنب الباب و يڤردحلي، و قعد يتبّع فيّ بعينيه حتّى لين شقّيت الكاياس و ركبت في الكرهبة و مشيت.
ممنوع جديد تزاد للممنوعات الّي نعرفهم الكلّ: ان شاء الله بالعمار و طول العمر في بلاد الفرح الدّائم
أما زعما توّا كان الواحد يمشيلهم لبلادهم هاك التوريست... فمّاشي حتّى ربع امكانيّة باش تلقى روحك متمتّع بحاجة ممنوعة عليهم هوما؟؟؟
و أحنا حتّى شربة الماء ممنوعة علينا في بلادنا