ولــد بيـــــــــــرسا

أنا اخترت "دستورنا"...، و هاو علاش

2011-10-18T13:34:00.004+01:00

أوّلا على خاطرهم ناس ما يحايلوش: الّي فمّا فمّا. ناس يقولوا أفكارهم بكلّ وضوح من غير خطاب مزدوج باش يرضّي فلان، و ما يغشّشش فلتان، و ما ينبزش لاخر، و يرمي كلمة منّا لواحد، و يزلّق جملة أخرى لواحد آخر، الخ.... لا لا هاذا الكلّ ما فمّاش

ناس ديراكت، واضحين، صادقين، شجعان، و ما عندهمش هاك اللغة المضروبة متاع...، وذني
(pour ne pas dire autre chose)

هاذي حاجة

ثاني حاجة و الّي هي أهمّ ببرشا، البرنامج متاعهم: برنامج حداثي بالحقّ، ينجّم يخرّج البلاد مالوضع الغامض و الأعمش الّي هي حياتها كاملة عايشة فيه.

حياتنا الكلّ عايشين في حالة "حسب التّقريب"، في توازن هشّ
(équilibre fragile)
تمسّو منّا يطيح، تمسّو من غادي يطيح

حالة خلاّتنا ما نستعرفو كان بالتعليمات و العرف و الممارسة و العادة (السّرّية و العلنيّة) في بلاصة القانون و الحقوق

ديما و أحنا يا إمّا خايفين و الاّ حاشمين. حتّى لين الجّد متاع دين بونا تنحّى و أحنا باقي حاشمين. الدّنيا راكضة بيها فرس و أحنا ميّتين بالحشمة. لين رصّاتلنا يكف النّعام: روسنا في التراب و ملقــّين ترمنا للرّيح، و أحنا باقي حاشمين

جماعة "دستورنا" يمّـنوا بالحقّ بالحرّيّة الكاملة لكلّ فرد (بما فيهم الـ 80 في الميا متخلّفين ذهنيّا من الشّعب) و يضمنوا جدّيّا حقوق المواطين الكلّ، من أقوى مهندس عندنا في البلاد، حتّى لآخر بوجادي يتسهْوك بين ربوع الخضراء

البرنامج هاذا يضمن بالحقّ كوْنو البلاد ما تعاودش تاقع في أيّ نوع من أنواع الدّيكتاتوريّة، بما فيها الأوليغارشيا متاع "أصحاب المخالي"، و الّي يسخايلو الّي كيف الواحد يربّي لحية مشعّثة تقولش ملصّق قطّة معدنوس على منظرو، ديراكات يولّي طيّارة و ما ننطقو اسمو كان ما نصلّيوا عالنّبي 3 مرّات

البرنامج هاذا يحترم المرأة و ما يعتبرهاش كائن ثانوي، رديء التّكوين، ناقص عقل، منعدم الذكاء. ما يختصرهاش في بزّولتين و ترمة و طرف أرحام. البرنامج هاذا يعتبر المرأة بشر كيما الّراجل، و كيما عندها نفس الواجبات لازم تاخذ نفس الحقوق.
و الباقي متاع البرنامج هاو هوني، الّي يحبّ ينجّم يقراه (و أهوكا ماللّوطى بالعربي و بالسّوري، باش ما يكونش فمّا سوء فهم)

بالطبيعة ماهو الاّ مسودّة، مازال فيه برشا تعيدلات خاصة من تالا الشّكل و التحرير، لكن الأفكار العامّة و الخطوط العريضة واضحة، و ما فمّاش لا حيلة لا تشيطين

حاجة أخرى زادا بالنسبة للناس الّي يحبّوا التــّوارخ (و الّي شطرها مزيّفة اليوم) الناس هاذوما نظاف يللّشوا. بحيث مثلا وقتلّي جماعة مناظلين بودورو متاع ولت البارح راكشين و أخطى راسي و أضرب و البوليس متاع بن علي يصول و يجول، وحدة كيف زينب فرحات (الثانية في قائمة تونس 2) و جماعتها يعملوا في الإجتماعات بالسرقة، و يوعّيوا في العباد، و يوصّلوا في صوت المقهورين متاع البلاد (بما فيهم البهايم الّي توّا داروا عليها و علّي كانوا يدافعولهم على حقوقهم) و هوما البوليسيّة يحصّروا فيهم، مالتياترو، لهاك الفيلاّ الّي مقابلة بن يدر، للبرطمانات متاعهم، الخ...؛

معناها ناس تمّن بالحقّ بالحريّة و بالمساواة و بالعدل، موش كيف هاك الّي يمخوروا و يشمّوا، و يحكيوا لكلّ واحد الحكاية الّي يحبّ يسمعها و من بعد يدوروا عليه

و يا أخي أحنا وصلنا حتّى لهوني، موش باش ناقفوا في شطر الطّريق و نعاودوا نتكركبوا ألف عام لتالي

وأخيرا، كيما قال هاك الوليّد "المتنبّي"

إذا غامرت في شرف مروم ـــ فلا تقنع بما دون النّجوم

ولد بيرسا مع "دستورنا" و يحبّ البلاد تنقّز القدّام، موش توخّر بالتّوالي.

الّي مازال حاير و ما عندوا ثقة في حدّ، ينجّم يجرّب "دستورنا" ...، ما يخونوهش. كلمة رجال

Ech 3...Leena - آش عـ...لينا

2011-10-01T12:48:00.007+01:00

هاذي حكاية البلاد الحنينة، بلاد أهلنا و امّالينا، البلاد الّي بمحبّتها تبـلينا، الّي من خيرها شربنا و كـلينا، الّي على ترابها غنّينا و كفرنا و صـلّينا و حتّى في السنين الّي بنارها تصـلينا، و على أرضها بين ديارنا تضربنا و تذلّينا، تفركسنا و تفـلينا، قلنا هاذيكا أمّنا الحنينة، و حتّى كي تجير عـلينا نقولو ما ايلنا كان ليها و ما ايلها كان لينا، و ينعن بو الكلب الّي كان مبعّدها عـلينا

البلاد وقت الّي دارت عـلينا، وقت الّي تعبنا و مـلّينا ملّي كان هاردنا و خالينا، هزّينا درابّونا، للشارع هـلّينا، حرقنا عجالينا، صوتنا طلع، بالدّم تطلينا، و وقت الّي حدّ ما كان يستنّى فينا، من فوق عليهم طلّينا، قلنالهم: لحظة لولاد... اليوم هانا جينا

اليوم البلاد هاذي الّي غرامها مالينا، و الّي بيها هزّينا روسنا و في عين العالم حـلينا، و عملنا قدر و كبرنا و عـلينا، جاتها هديّة من بلاد غريبة عـلينا، و قالتلها: على خاطرك، على خاطرهم أنا نهديلك "نوبـلينا"؛

أما مانا زادا عرب، و الضّربة ما تجينا كان من حبيبنا و غالينا. اليوم كي البرّاني ضوى عـلينا، و شرّفنا و عطانا هديّة تواتينا، قاموا الوزّاكة الّي ديما مضيّقينها عـلينا، قالّك شنيّة هاذي؟ ماهاش منسوبة لينا، و هزّ الجايزة و خـلّينا، رانا من ريقكم كـلّينا. هاذي ماهاش منّا...، على خاطر لابسة القصير و عاملة برشا زينة

أما أحنا ناس لا يهمّنا في كلام يبـلينا، لا في الّي يحسدنا و يحبّ يبكّينا. اليوم نقولولهم هي بميترو و نصّ، و كلوة متسلّفة وصّلتنا لبقعة تعـلّينا، لا كان يحلم بيها لا تالينا لا والينا لا الّي حياتهم كاملة يخطبوا عـلينا

اليوم نقلّك يا للاّت البنات، يا بنت بلادي لينا، و كيما ناس بكري قالوا" ما تبقى كان صنعة يدينا" كمّل ثنيتك و ما يهمّك في المسلّط عـلينا...، و كيما قالت السّيدة نعمة....: آش علينا، آش عليــــــنا

... سي الطّيّب

2011-09-16T10:31:00.002+01:00

ماو الناس الكلّ فرحانين توّا بجيّان القائد الأكبر، عمّك " طيّب رجب أردوغان" و خاصّة جماعة النّهقت الّي يسخايبوه حامي الحمى و الدّين و يسخايبوه "سي الطّيّب" بالحقّ

سي الطّيب، و رغم احترامي لشخصو و لمبادئو المعلنة، ماهوش المهدي المنتظر كيف ما يحبّو يصوّروه

و قبل ما يجي يساندنا و يدعّمنا و يعطينا بعض دروس...، أنا نقلّو "يا طبيب العينين، برّا داوي عينك العورة"

على خاطر أنا واحد مالناس تصعب عليّا باش نتلقّى درس من عند واحد قاعد يجزّر في العباد و هو مصوّر تبسيمة على وجهو

على خاطر للّي ما في بالوش، سي الطّيّب (كيف الّي قبلو) قاعد يقتّل في الأكراد من غير رحمة و لا شفقة...، و قيّد عالإرهاب

على خاطر الأكراد في تركيا و العراق و ايران و سوريا بكلّ بساطة، ما عندهمش الحقّ في الحياة

على خاطر في تركيا و الا في العراق، كردي = مجرم! و من غير ياسر كلام

على خاطر في تركيا الأكراد ما عندهمش الحقّ لا في لغتهم، لا في تاريخهم، لا حتّى في أساميهم ساعات

على خاطر النفاق متاع سي الطّيّب و التّسطيكة متاع المتلقّين توجع الرّاس: بحيث كيفاش يعمل السّيّد؟ يمشي لكردستان، يفشّخها بالقنابل و بالكرطوش، بوه على خوه، و أولاد و بنات صغار موتى و كذا...، و وقتلّي يبداو الناس يتكلّمو و هيومان رايتس ووتش تنبح من غادي، يخرج عمّك الطّيب و يقلّك غزّة! أحنا باش نحميوا غزّة و باش نعملو و باش نفعلو، و باش، و باش، و باش...، يتلهاو العباد في مشاريعو البطوليّة، و برّا شكون مازال يتلفّت للأكراد

و العباد في تونس الحبيبة يبوسولو في يديه و ماشين يستقبلو فيه في المطار كبطل

حاجة أخرى: بالكشي سي الطّيب جاي لتونس محبّة و الاّ معزّة و الاّ متوحّش قهوة في سيدي بو سعيد؟

ماهوش جاي ناوي باش يدخّل الشركات التركية لتونس زعمة؟؟؟ ماهوش جاي باش الشركات كيما "تاف" تكمّل تخرى عالخدّامة التوانسة كيف ما تحبّ و تجبد مالبلاد حتّى للعظم؟ جايب معاه 250 رجل أعمال، زعمة باش يفرّجهم في المناظر الخلاّبة متاع تونس و ليبيا؟

حاسيلو قدّاشنا فوكات و برّا !!!؛

أنا فرحان ياسر بالثورة

2011-09-16T10:21:00.003+01:00

أنا فرحان ياسر بالثورة

آه لا، أنا باش نموت بالفرحة بالثورة متاعنا

أنا فرحان و فخور، على خاطر أحنا في بلادنا ثرنا على كل شيء

على خاطر أحنا ثرنا على حاجات عمرو ما ثار عليهم حدّ من قبل

أحنا مثلا ثرنا على الضوء الأحمر! اي نعم...، بعد ميا و آش و أربعين سنا من اختراع الضوء الأحمر، و بعد يجي 90 سنا من التّعسّف متاعو علينا، ولّينا كلّ ما يشعل الضوء الأحمر، على الأقل، ما شاء الله، 5 كراهب يحرقوا! و بقدرة ربّي من هوني لـ 5 و الا 6 شهر تو نولّيوا ما عادش نعبّروه جملة. ديما الفترة الإنتقالية صعيبة شويّة، أما أحنا و لله الحمد ماشين في الثنية الصحيحة. الضوء الأحمر ماعادش باش يقلّـقنا بالكلّ

أحنا نحّينا بن علي و يا مندراك، موش باش تحكم فينا جرد أمبوبة! أحنا عملنا ثورة متاع كرامة و حرّية، و أبسط الحرّيات أنّك تتعدّى منين تحبّ و وقت الّي تحبّ

لا لا، أنا فرحان ياسر بالثورة

في ميدان الطرقات ثرنا زادا على الكلينيوطان. أحنا فهمنا أخيرا الّي كيف تحطّ كلينيوطان باش تدور و الاّ باش تدوبل، راك عامل مزيّة على النّهج الكل. أما الحمد لله اليوم فقنا على رواحنا و ما عاد حتّى حدّ يستعملو

اليوم فهمنا الّي كلّ واحد لازمو يسوق أورد راسو...، زعكاوي...، الّي يقلّك عليه مخّك أعملو، لأنّنا نرفضو كلّ شكل من أشكال الوصاية و العمالة، و... و... و...؛

لا لا، ما تقلّيش ... الحمد لله على ها الثورة ما أبنّها و ما أحلاها

اليوم زادا ثرنا على كلّ نوع من أنواع كرّاسات الشروط!

أي نعم...، ديقاج يا خماج. كراسات الشروط متاع النظام البائد أحنا ما نستعرفوش بيهم.

بحيث...، اليوم، و لله العزّة و المجد، فهمنا الّي انّجمو مثلا نبنيوا في الكاياس...، انّجمو ندخّلو المادّة للقهاوي باش يتوسّعو فيها...، انّجّمو ننصبو بالحوت في وسط مونوبري (و الّي يسكنو شيرة مونوبري الكرم يعرفو على شنوّة نحكي)...، انّجمو نصطادو في المحميّات الطبيعيّة...، انّجمو نصبّو دالّة فوق المادّة على بوطو متاع الستاغ...، الخ...؛ تي يا ولدي طيّارات رانا

تي لا لا...، و ما تحكيلي حتّى حكاية زادا! أنا فرحان ياسر بالثورة

تي أحنا، براس أمّك، حتّى مالزّيقوات الّي هوما زيقوات...، ثرنا عليهم و ولّينا نلوّحو فيهم في الحصالة (مثلا الكانيفو الّي في القنطرة متاع مونبليزير)؛

لا لا، أنا الحقيقة فرحان برشة بالثورة متاعنا

تي يا معلّم، راهو على مانا طيّارات ولّينا نعملو في إضرابات عمرهم ما خطرو على بال بشر...؛

المدّة الّي فاتت مثلا، خدّامة الأونو (ديوان الخدمات الجامعيّة) أضربو على خاطر فمّا منهم زوز، ولادهم ما خذاوش التوجيه الّي يحبّو عليه في الباك

تي لا لا، أنا يا أخي فرحان بالثورة متاعنا

يا خويا حتّى تقلّي مازال ما وصلناش للمستوى المثالي، أما الحمد لله قطعنا شوط باهي ياسر نحو أعلى درجة من درجات التّحضّر الثّوري و الكمال الفكري...؛

تحيا تونس بلد الفرح الدّائم...، و يحياو كلّ تشي قيفارات تونس الحبيبة

... فاطمة

2011-08-03T01:25:00.005+01:00

فاطمة تخدم. فاطمة تحبّ تخدم. فاطمة لا تكذب لا تحايل، فاطمة لا يهمّها في قوايل، لا في ليل لايل، لا في ماء مطر هابط سبايل...، فاطمة

فاطمة مرّة يكون منها العقل، و مرّة يكون منها زايل...، مرّة يحلّ معاها الوقت، و مرّة تحسّو عليها بايل...، و ساعات تلقفها و هي طايرة، أما الأكثريّة تحلم و تستخايل...، فاطمة

بالرغم الّي فاطمة ماهاش صغيرة، و الشيبات في شعرها بدات تظهر كثيرة، فاطمة في وسط الليل سمعت كلام الغيرة، و من غير حديث و الاّ شيرة، بين جديد الأيام و حرارة الدمعة الغزيرة، طبقت وراها الباب وهربت... فاطمة

هربت فاطمة. هربت فاطمة و سكّرت وراها باب الدار. هربت فاطمة لا وصيّة لا تلفيتة و لا خلفت آثار، فمّها عليه تبسيمة و قلبها شاعل بالنّار... فاطمة

دموعها حيار و هي تجري فاطمة. تجري فاطمة و تبكي عالعمر الّي عليها جار. صدّقت الأسرار فاطمة...، صدقت كلام اللّيل، جدّ عليها التحليل، و الّي جاء البارح خذا بلاصة الّي مطرّد ذليل، و ندمت على كلّ ما صار، فاطمة...؛

ندمت على كلّ ما صار، فاطمة. ندمت فاطمة، لعنت الأقدار، و الّي كان سبب في خبث الأفكار، و اللّسان الأرطب الّي يعمي الأبصار، و دموع البلاّر الّي تزيّف الأخبار...، فاطمة

سكتت. تعبت فاطمة...، تعبت و تحبّ تغزر لقدّام فاطمة. تعّبها حديث البارح، و الكلام الجارح و الليالي الي خلات عقلها سارح، و الّي باش يحمي ظهرو يحفر لأصحابو ضوارح، و الّي ما يهمّو في حدّ، الفايدة يبات فارح...، فاطمة

هربت فاطمة...، هربت من تركينة في وسط السّوق، من حديث بالدّرڤة وراء باب مشقوق، لجوجمة البطاحي و العياط بالبوق...، فاطمة

هربت بقلب محروق، حبّت تغزر للعالم من فوق و من طعمة عيشتهم تذوق، أما...، ماهاش هكّا فاطمة. ماهاش منهم فاطمة

فاطمة ما تاكلش المسروق...، فاطمة كيف قصّت الرّاس ما نشفوش العروق

فاطمة اليوم بدّلت المعشوق. فاطمة اليوم اختارت باش تعيّط في البوق. فاطمة اليوم قالتلكم بيناتنا صندوق

قالتلكم في بلاصة السكاكن في الظهر، نهار 23 ارشقوا ورقة في الصّندوق

فاطمة اليوم لاهية في الصندوق... فاطمة اليوم حطّت كلّ شيء في صندوق

فاطمة اليوم كيف قصّت الرّاس...، ما نشفوش العروق

فاطمة.....؛

... عدّل القدر

2011-07-28T12:52:00.007+01:00

بحقّ لون الجنان خلف الجفون...؛
بحقّ روح الجنين ملء البطون...؛
بحقّ جرس الجنون قبل السكون...؛

بحقّ سحر البروق وسع الديار...؛
بحقّ ذاك البريق خلف الستار...؛
بحقّ ركض البراق نحو الدمار...؛

بحقّ نور الشرق فورا تغيب...؛
بحقّ نير العنق يغوي الحبيب...؛
بحقّ نار الشّوق تحمي اللّهيب...؛

بحقّ دور العذارى وسع الجيوب...؛
بحقّ دير النصارى بعد الغروب...؛
بحقّ دار الاُسارى صهرى القلوب...؛

بحقّ كون السّرايا يخشى الصّدى...؛
بحقّ كيْن الصبايا شوقا ندى...؛
بحقّ كان البقايا ندما ردى...؛

بحقّ كلّ صلاة تغازل القدر
بحقّ كلّ حبّات مياه المطر
بحقّ كلّ دموع عشّاق القمر
بحقّ كلّ كؤوس روّاد السّهر

بحقّ كلّ ما كان .........، عدّل القدر

التقييد... أمارة أخرى الّي المتخلفين ذهنيّا ماهمش كان في منّوبة

2011-07-26T13:30:00.005+01:00

إي ماو هو جاء ويكاند طويل شويّة، و الطقس مِرْوح، و وفى علينا موسم العروسات (في انتظار دورة التدارك الّي في سبتمبر)..... قلت برّا نمارس طرف مواطنة و نقعد ندور على أولاد الحومة و الأحباب و الأصحاب فمّاشي ما نقنع منهم كعبات باش يمشيوا يقيّدو

هزّيت معايا صاحبي و بديت نتمشّى

أوّل واحد عرضنا خليفة الطّوليي. متّكّي في وسط كرهبة مغفّصة، بلاّرها مقلّع و يتفرّج في الكاياس:

صحّة خلفون...، صحّة ولد بيرسا... ؛

آه خلفون...، تي هاك معلّق البلاكة "أنا قيّدت" عالباب...، و الله يعطيك الصّحّة

هههههه أي ريت مبنّها؟ آش قولك؟

أي لا حلوّة، أنا بيدي هاني عندي منها

هههههههه ملاّ حالة...، قالّك قيّد و رويّق

أه؟؟؟ صار ما قيّدتش انت؟

نقيّدلهم؟؟؟ هاذاكا آش مازال... ڨالّه نقيّدلهم...؛

تي شكون هوما الّي باش تقيّدلهم؟ باش تقيّد لروحك راهو، ماك مقيّد لحدّ

تي يا ولدي ما لقيت ما نعمل ياخي؟ نزمّر بيهم أنا

يا ولدي شكون هال "هوما" الّي تحكي عليهم؟ ما فمّاش "هوما" راهو...، ماعادش فمّا "هوما"...، فمّا انت، و أنا، و هو، و هي، و كلّ فرد عندو نفس القيمة قدّام الصندوق

و خذا عليّ صاحبي الكلمة و عملّو درس صغير في آش معناها ها التقييد هاذا و علاش يلزمو يقيّد، الخ....؛

حاسيلو شيّحلو ريقو و في الإخّر قالّو: باهي باهي...، تو غدوة

أوّل فشل...؛

شويّة آخر دخلت للكيوسك

نلقى طفل قرى معايا في الثانوي عندي سنين ما ريتوش. أهلا بسي علي، أهلا ولد بيرسا، آش عامل، شنيّة الخدمة، وقتاش نفرحو بيك، شكون تشوف مالأولاد....الخ، و هاك تشقشيق الحناك هاذاكا الكلّ....، و رميتهالو: آه قيّدت و الاّ مازال؟

هههههه تي أنا نقيّد متاعك؟

و شبيها ضحّكتّك ياسر الحكاية؟

تي يا ولدي حكاية فارغة، شيء ماهو باش يتبدّل. كي البارح كي اليوم كي غدوة، جدّ عليك انت ديمقراطية و درا شنوّة؟ يتمنيكو علينا و قالّك أحزاب و كلام فارغ

هزّيت، حطّيت....، قلت منين باش نبدى مع جدّ بوه ها الكازي هاذا؟

علولو....، برّا معاك ربّي، يلزمني نمشي أنا الدار يستنّاو في الخبز. نشوفوك عاد

ثاني فشل...؛

دخلت للدار نلقى الجزيرة في التلفزة و روبورتاج على تونس كيفاش العباد ما يحبّوش يقيّدو في القوائم الإنتخابية

جاء فرّادي، مدّ وجهو للكاميرا، و بدا ينقش: مانيش باش نقيّد على خاطر مانا فاهمين شيئ من الأحزاب. ميات حزب و شيء ماهو واضح....، الخ

تي آش تحبّ يعملولك براس أمّك؟ ينظّمولك جامعة صيفيّة تقرّيك، و الاّ يفرّقو كاساتات، و الاّ يدقّو عليك باب الدار: انت الّي موش فاهم، هانا جينا باش نفهّموك، و الاّ شنوّة؟؟؟

و كمّلو عادا واحد يتحّي و واحد يزكّي....، الّي يقول: ياخي صوتي آش باش يزيد، و الّي مافيبالوش جملة بالحكاية، و الّي قالّك أنا ما عندي ثقة في حدّ علاش باش نقيّد....، حاشيلو شيئ يطيح الماء في الركايب

ثالث فشل...؛

في الليل أنا و صاحبي متاع الصباح مشينا نعملو في قهوة (باش نروّحو على النفس) نلقاو زوز صحابنا أخرين يشيّشوا (واحد عندو أستاذية في التصرف و الأخر ماستار من أمريكيا)؛

في هات كلمة و خوذ كلمة تجبد موضوع التقييد. دار السيّد الي قاري في أمريكيا قال: تي ياخي جدّ عليكم توّا تقييد و بلادة و ركاكة؟ تي الحكاية هي هي

ما قيّدتش انت؟

تي أما تقييد بربّي؟ تي شبيك ياخي؟

قلت أش مازلت باش نسمع زادا نهار اليوم؟ لا ما بيّ شيئ، علاش يا بابا ما تقيّدش، تره؟

اسمعني نقلّك

مرحبا...، كلّي آذان صاغية

تعرف البلاد هاذي شكون يحكم فيها؟ تحكم فيها أمريكيا. و الّي باش تحطّو أمريكيا هاذاكا الّي باش يربح

بجاه والديك؟

اي، التصويت الإلكترونيك عملوه بالعاني باش ينجّمو يكُنتروليو الأمور من غادي، و عاملين سيستام يكتبو فيه الّي يحبّو، كيف ما عملو لبوش مع أل غور

تي هاك و قيل تتفرّج ياسر في الأفلام...، علاش ما تجرّبش تكتب سيناريو لرمضان. عندك موهبة غولة

اسكت اسكت، تي ها ضايع فيها انت. استنّى نكمّلّك

آه مازال صارا؟؟؟

آه ، على خاطر توّا الجزائر تحبّ تفكّ المرشي متاع ليبيا...، و فرانسا ما يساعدهاش تولي فمّا ديمقراطية في تونس على خاطر أمريكيا كيف......ـ

و يقصّ عليه صاحبي متاع الصباح: لحظة لحظة برحمة بوك...، لحظة. ولد بيرسا، هيّا قوم نمشيو نعملو كاس الفوق

هو ما كمّلش كلامو يلقاني قدّامو...، قمنا خلّصنا و هربنا نجريوا

بففففففف

رابع فشل...؛

دخلنا للوتيل، قعدنا مقابلين بعضنا، و قعدنا نحكيوا على ها المصيبة الّي كنّا نسمعو فيها

الكاس الأوّل...، الكاس الثاني...، تفرهدنا شويّة. قتلو أي توّا تعرف لشكون باش تصوّت؟

قالّي بالطبيعة نعرف

شكون؟

النهضة

هههههه... لا بالحقّ بالحق، لشكون باش تصوّت؟

و رحمة بابا للنهضة

تي يا همّ تعرف آش معناها النهضة؟ تحبّ نرجعوا ألف سنا التالي؟ ماكش فاهم الذي هوما ينافقو عالعباد و يشريو فيهم بالفلوس؟

يا خويا أنا نحبّ نجرّب و نشوف

آش باش تشوف ربّك؟؟؟ تي لواش يقرّيوا فينا أحنا، و الدولة صارفة علينا دمّ قلبها؟ ماو باش نتعلّموا ندرسو الحاجات و نفهموهم عالورق قبل ما نجرّبوهم
لتوّا لا فهمتها ها المصيبة متاع النهضة؟
و زيد آش مدخّلك في ها الدعازق انت: لا تصوم، لا تصلّي، كرشك ميترو قدّامك مالبيرّة و انت تقلّي نهضة؟

يا ولدي هاذاكا هو. أنا يا خويا عندي ثقة في عبد الفتاح مورو و في راشد الغنوشي و نحبّ نشوف البلاد و الشطوط و الوتلة الّي معبّين بالكرايك آش باش يصير فيهم كيف النهضة تشد الحكم

شوف مازال يقلّي نجرّب و ما نجرّب....، تي شبي د.....، اسمع اسمع: قوم نروّحو

تي شنوّة توّا؟ شبيك خدمت عليّ؟ موش قلت حرّية و ديمقراطية و كذا...؟

أي نعم يا سيدي، حرّية و ديمقراطية و كذا، و أنا حرّيتي و ديمقراطيتي و كاذايا قالولي قوم روّح توّا

خامس فشل...؛

ياسر عالجّحيّش في نهار واحد

و مختصر الحديث...: المتخلفين ذهنيّا ماهمش كان في منّوبة

و يرحم والديكم برّاو قيّدو يصلح رايكم...، و كان تحبّوا تزيدو تخرجوها ما تصوّتوش للنهضة

رجل بظلّين

2011-06-30T15:30:00.006+01:00

عهدته سريعا، منضبطا، مراعيا لمواعيده، حريصا حتّى على الركيكة منها

لم يتخلّف يوما عن لقاء تعهّده

كلّ أوقاته دقيقة حتّى الملل....، دقيقة حتّى الملل

لكنّه اليوم و كغير عادته تأخّر عن موعد قهوته المسائيّة

عدّة دقائق مرّت هذا اليوم، و لم يأتي

ساعات مرّت هذا اليوم، و لم يأتي

أيّام مرّت...، أسابيع...، شهور طويلة مرّت هذا اليوم و لم يأتي

سنوات مرّت هذا اليوم، و لم يأتي

سنوات مرّت هذا المساء، و لم يأتي

كلّ ندل الحانة يترصّدون قدومه خلف السّتار

كلّ حرفاء المقهى المجاور يترصّدون قدومه تحت الجدار

حتّى من موظّف التّأمين و خدم النّزل و سائق المركبة، و حتّى من صاحب المركبة....، يترصّدون قدومه حذو الجدار

مرّت خمس سنوات، و اقتربت شمس هذا اليوم الأزليّ من الفناء....، و فجأة لمحته يقترب من الباب الخلفيّ للحانة

لمحته كغير عادته، مرهقا، و كأنّه يحمل وزرا ثقيلا على صدره

لمحته و قد رسمت له شمس المساء المنخفضة فوق جدار شركة التّأمين ظلّين متباينين

ظِلٌ منحني، منكسر، شاحب، يكاد ينصهر داخل الجدار أو يسقط تحت بلاط الرّصيف

و ظِلٌ مرتفع، فاتل لعضلاته، موقد لنظراته، يحاول جاهدا أن يطمس آثار توأمه خجلا و كبرياءً

لم يتبيّن جلّ الحضور إعياءه...، واصل المشي حتّى عتبة الباب الخلفيّ للحانة

وقف عندها منهكا، مرهقا، خائر القوى...، و قد تبيّن لي سرّ ظلـّيه

تبيّن لي منقسما إلى نصفين....؛

نصف يحترق، و نصف يكسوه الجليد

أتذكّر أنّه نبس ببعض كلمات يحصي فيها كم من خمس سنوات يعدّ اليوم...؛

نظرت إليه بعدها عاملة التنظيف و كأنّها تعلمه باهتمامها بشأنه

ضرب لها موعدا تعهّد أن يسرّها خلاله ما خفي عنها من أقاصيصه

حان وقت الموعد، و لكنّه حتّى يومها لم يأتي....؛

لم يكن بعيدا، لكنّه لم يأتي...؛

بقي فقط يجرّ ورائه ظلّيه...؛

ظلّ النصفِ الذي يحترق....، و ظلّ النصفِ الذي يكسوه الجليد

باب بلاّر

2011-05-17T23:22:00.004+01:00

تسكّروا البيبان، تحلّوا القيود

في حلمة، في كلمة، في سبايل الظلمة... وراء دوامس الحدود

في كذيبة بكتيبة، في وقفة على عتيبة... في حديث مقصود

في سلام بالرّعشة، في محبّة بالبرشة... في دلال موجود

في غفوة، في صحوة، في منى بالنسوة... في جواب مفقود

من ضحكة بالدمعة، لليالي على شمعة... في قلب معقود

تسكّروا البيبان، تحلّوا القيود...، و تولدت الأحزان و تغسلوا الخدود

-------------------

و في ليالي قصار، يتردموا الأسرار، وراء باب بلاّر... تغزرلو مردود

نكتب و الاّ نسكّر الكتاب...؟

2011-02-08T00:07:00.005+01:00

نتكلّم و الاّ نسكت...؟

نكتب و الاّ نسكّر الكتاب...؟

لا...، اكتب و من بعد سكّر الكتاب

و الاّ كان تحب، قول كلمتين و من بعد سكّر الكتاب...، و اسكت

باهي ميسالش...، خلّيني نسمع

اي أسمع و اسكت...، اسمع بوذن وحدة و اسكت...، و ما تنساش باش من بعد تسكّر الكتاب

باهي، هاني نسمع...، تفضّلوا

يا عميل، يا بطل، يا مسهْوك، يا غدّار، أعطيني بوسة، وجهك و الاّ قفاك، توحّشتك، نحبّك، شكون تسخايب روحك، تي أنطق، كان سكتّ خير، أقعد اللّوطى، منّي أنا الّي نحكي معاك، هات نشعّل، يا هايشة، يا خيبة المسعى، ديقاج، قدّاش يخلّصو فيك، يا...؛

بربّي سامحوني...، ماكم تراو فيّ نسمع بوذن وحدة...، تنجّموا تتكلّموا بالواحد بالواحد؟

تي موش قلنالك اسكت؟؟؟

اي أما عندي الحق نسمع....، بوذن وحدة أما نسمع

تراه، أبدى انت

باهي اسكت...؛

............

عصفور سطح

كي صدح

زلّط ما نجح

يعوي و كالكلاب نبح

بهيـّم يعوي على برّاحو

××××××

ضايق و كلح

قدح

بالضّو فرح

ملكْون في اللغة ما فصح

جنان شطر أوراقه شاحو

إليـــــــــــــــاي..... و إليــــــــــــــــــاي....... و إليـــــــــــــــــــــاي.... وُوْ وُوْ وُوْ وُوْ وُوْ

شكون مركا؟ هرب؟ آه آش صار؟ قطّع قطّع...، هدّوا أولاد الجبل؟؟؟

تي لا، العصفور تكلاشى

آه أوكي، باهي...، فجعتني. أكاهو؟ هاذيكا هيّ؟

أيّا الّي بعدو

أنا الذكر الفتيّ الذي --- أجامعكم بقلمي لا أجفر

اُملي لكم مبادئي و قد --- نفرت ذكائكم الأبتر

أضحكتني يا من خمّن --- يقين مراهق لا أكثر

أواسيك بحججي التي --- عمّرت طوال ثلاثة أشهر

و انّي عليك لمشفق --- و .....ـ

استنّى، استنّى...، قدّاش قتلي؟

قتلك: " ثلاثة أشهر "؛

صار؟؟؟ باهي امّالا استنّى غادي حتّى يوفى موسم الرّجال، تو نعيّطولك

فمّا شكون مازال يحبّ يتكلّم؟

على خاطر أنا ما عندي الحق كان نسمع

Oui oui oui, j’arrive !

Oh, p’tain le flop !!! ça me fait trop marrer….

Quelle foirade ce mec…, chui morte de rire…

Bon, bon Ok…, continue à rigoler, nous on a d’autres choses à faire. On ne veut pas déranger

باهي الحاسيلو...، مازالشي فمّا شكون يحبّ يقول حاجة؟

الكلمة مازالت في اللّسان، و هي دخلت.....، لاهي طويلة لاهي قصيرة، لاهي صغيرة لاهي كبيرة، لاهي غنيّة لاهي فقيرة، تنجم تراها ألف مرّة، الداخل و الاّ البرّة، في موت و الاّ في مسرّة، و فين تعرضك، تغيب عليك التصويرة، و تقول: زعمة فين ريتها آخر مرّة؟

و قبل ما تبدى التنظيرة...، صوت يقرب و يغنّي....؛

الهدرة ماهاش ملام، ماهاش قصيدة مرشومة على زمام، و الاّ شعار تتفكّرو مرّتين في العام، و تقول هاذي بلادي

الحكاية عمرها ما كانت كثر سلام، و ضرب بالأقدام، و ساعات تكليكي "جام" على تصويرة و زوز أفلام، و تبات عالتعليق تدادي

الحكاية راهي بالدوام، في الصحوة و الاّ في المنام، الّي هازز خبزة و شاقق وسط الزحام، و الّي مخيّط فمّو و حالف على جميع الطعام، و الذي مشيّعينو ملفوف في الأعلام، و الّي سنين ياكل مالزبلة و يقلّك مخبّي العسل لأولادي

الحكاية حكاية أعوام، بكّات نساء و خلّفت أيتا......؛

يبعد الصوت...، و تبعد هي في جرّتو...؛

ماعادش فمّا حتّى صوت...؛

سكّرت الكتاب...، و سكتت

تدوينة غير أخلاقية تحرّض على العنف و الكراهية

2011-01-24T00:25:00.004+01:00

إي نعم يا سيدي..، اليوم قرّرت باش نكتب تدوينة غير أخلاقيّة !!!

و على كلّ حال، تدويناتي الكلّ تنجّم تتحسب غير أخلاقيّة، على خاطر أخلاق المدوّنة تتنافى تماما مع أخلاق الحكومة، و أخلاق السيّد الّي يحكم على أخلاق المواقع و المدونات و البشريّة

المدوّنة هاذي يا بابا غير أخلاقيّة، لأنّها موش من أخلاقها تكذب و تتبلعط عالعباد كيف الحكومة الّي نصّبت روحها وصيّة على الشّعب...، و حتّى كان جات منتخبة

المدوّنة هاذي يا بابا غير أخلاقيّة، لأنّها موش من أخلاقها ضرب العباد بالكرطوش في الظهر

المدوّنة هاذي غير أخلاقيّة، على خاطر أخلاقها ما تخلّيهاش تطلع تعطي دروس للعباد و هي يديها ملطّخة بالدّم

إي نعم يا بابا...، المدوّنة هاذي غير أخلاقيّة

المدوّنة هاذي زادا تحرّض على العنف و الكراهية، و بكلّ حزم

المدونة هاذي حياتها كاملة تحرّض على كره التجمع الدستوري الديمقراطي مثلا...، و على طحّانة التّجمّع، و على "مناضلي" التّجمّع، الّي على ما حبّوا يرفعو التّحدّيات، لقاو رواحهم ماهم رافعين كان ساقيهم و الرّيح يزفـّر بيناتهم

المدوّنة هاذي تحرّض على كره المجرمين الّي ضربوا العباد بالرصاص و هوما ملفوفين في علم تونس

المدوّنة هاذي تحرّض على العنف زادا...، لكن موش العنف متاعهم

تحرّض على العنف الّي توصّل بيه صوتك بالسّيف...، العنف الّي يتناقض مع الرطابة متاع طحّانتهم...، و قلّة إيدامهم

العنف الّي بيه هرب بن علي، و الّي باش يهرب بيه كل واحد باش يحاول يتعقرب عالبلاد و يمصّ دمّ الشعب

هذه المدوّنة إذا غير أخلاقيّة...، و كلّ شرفها أنّ أخلاقها غير أخلاقكم...ـ

رسالة إلى صحفيّ قرأ نشرة الأخبار...؛

2011-01-12T15:12:00.002+01:00

سأخاطبك بنفس الضمير الغائب الذي خاطبت به زميلك الشرطي

نعم، زميلك...، لأنّ المجرم و المتستّر عن الجريمة سيّان...، يا ضميرا غائبا

سأخاطبك و أسائلك أن تخبرني...؛

فأخبرني عمّا يدور في صدرك و أنت تقرأ الورقة الملطّخة بالدّماء المرشوقة أمامك

أخبرني يا ضميرا غائبا، عن لون الدماء التي تطعم شرايينك و أنت تمرّر مسرحيّة عادل إمام صباح يوم تسفك فيه دماء مواطنيك

أخبرني بربّك عن إحساسك و أنت تتفكّه بنكت ركيكة و النيران تشعل أراضي وطنك

أخبرني بربّك يا ضميرا غائبا عن الوازع الذي يشحنك و أنت تلطّخ أوراق جريدتك محاولا تبرير دماء شهدائنا الطاهرة بحبر قلمك السمج الوسخ

أخبرني بربّك...، هل تعلم أنّ حبر قلمك و الرصاص المغروس في رؤوس الشهداء سيّان يا ضميرا غائبا؟؟؟

هل تعلم أنّ صوتك الذي يصلنا عبر التلفزة أو المذياع أبشع من صوت دويّ الرّصاص، يا ضميرا غائبا؟

فلتترك قلمك و مصدحك، و لتحمل رشّاشا مكانهما...، فحتّى إن كان الجرم واحدا، لعلّك بهذا تدّخر ذنوب النّفاق....، يا ضميرا غائبا

رسالة إلى شرطيّ طبّق "التعليمات"...؛

2011-01-12T13:49:00.003+01:00

أخاطبك و لم أجد كلمة أناديك بها...؛

فلا أقدر أن أناديك "صديقي" لأنّك أبعد ما تكون عن ذلك

لا أقدر أن أناديك "أخي" أو "خويا" كما كنت قد ناديت كلّ من أعرف أو أجهل أو أحبّ أو حتّى من أكره

لا أقدر أن أناديك حتّى "يا سيّد" أو "يا شسمك" أو أيّ كلمة يُخاطَب كائن بشريّ لأنّك في نظري لست منهم...، لأنّك في نظري لست منّا

سأخاطبك بضمير غائب كضميرك، كرحمة قلبك، كإنسانيّتك، كذكائك، كغبائك، كحزنك، كفرحك، ككلّ إحساس بشريّ في نفسك

أخاطبك و أتمعّن في عمق عينيك و قد تحوّل لونهم الخضراويّ إلى آخر لم أر أبشع منه في حياتي من قبل

أخاطبك الآن و قد نزعت مدرّعاتك و تركت جانبا سلاحك الحربّي الذي نازلت به "إرهابيّي" وطنك

أخاطبك الآن و أنت تجالس نفسك بعد أن قمت "بواجبك" تجاه مشغّلك، و أثبتّ نجاعتك الكاملة...: قتيلان برصاصة في الرّأس...، بعض الجرحى، عدد منهم قد يشفى و آخرون قد يحملون آثار رصاصك بقيّة حياتهم...، لتران أو ثلاثة من دموع أمّهات ثكلى و أيتام ملتاعين...، الآن سوف أخاطبك

أخاطبك و أسألك

أسألك يا ضميرا غائبا عمّا تشعر و أنت في زيّك المدنيّ بعد أن قطفت، أو قصفت الثمار التي أمرك "مشغّلك" بجمعها؟

هل تعي يا ضميرا غائبا بأنّك الآن ترتدي لباس المجرمين و سفّاكي الدماء؟

هل تعي يا ضميرا غائبا بأنّك اقترفت جرائما لا تغتفر؟

هل تعي يا ضميرا غائبا بوجع أمّ دفنت ابنها الذي استشهد تحت رصاص سلاحك؟

هل تعي يا ضميرا غائبا بمعنى أن تضغط على زناد سلاحك الحربيّ و تولج رصاصه في صدر رجل ملتحف بعلم الوطن؟

هل تعي يا ضميرا غائبا بمعنى أن تريق دماء من عرّض صدره لنيرانك مطالبا بحرّيته و حرّيتك؟

هل تعي يا ضميرا غائبا؟

هل تحسّ يا ضميرا غائبا؟

هل تحسّ يا ضميرا غائبا....؟

... صاحبك

2010-11-16T23:20:00.004+01:00

و يجي نهار تلقى روحك وحدك...، تصويرة...، خيال على حيط حجر

و الّي البارح بجنبك، يضحكلك و بغزرة من عينو مشعّل في كنانك جمر

في لحظة غاب و هجر...، ذاب...، قطرة في وسط البحر

تستنّى...، تتمنّى...، و تكفر بالزمان الّي بيك غدر

أما تعرف صاحبك الّي بعيد عالنظر، و الي خذاتو الأياّم و فسّختلو الأثر

الّي تتفكّرو في حلمة في ليالي المطر، و الاّ مع دمعة وقت الّي يطول بيك السّهر

صاحبك....،من غير ما يسمع صوتك، قلبو يردّلو الخبر، و يطفيلك الوجيعة و يبنيلك في خيالك قصر

ما هوش ببعدو نساك و الاّ لأيّامكم نكر، أمّا كان غاب الكلام، أراهو بالحقّ عالكلمة ما قدر

صاحبك...، كيف تغمّض عينك و تسكّر الشّفر، تجيك تصويرتو و تسمع صوتو...، نسمة على حرف البحر

و حتّى كان بعدو سيّلّك من عينك قطرة، تعرف الّي ضحكة من فمّو تزيدك في عمرك الشطر

درس في الثقافة الغذائيّة للأطفال

2010-11-13T13:08:00.002+01:00

المكان: حانوت لبلابي في باب الخضراء

الزمان: نهار السبت الثمنية غير درجين متاع الصباح

الشخصيّات: راجل عمرو في الأربعين و في حجرو بنتو عمرها يجي أربعة سنين، و قرابة 20 راجل غاطسين في اللبلابي و العظم و زيت الزيتونة

الراجل: ايّا كولي عيش بنتي

البنيّة: ما نحبّسسس

دبّري راسك...؛

مغرفتين و الا ثلاثة من بعد

أيّا باش تاكلي و الاّ لا؟ هاذا اسمو لبلابي، كعبة و كاس..، كعبتين و كاس...، فهمتي؟؟؟

أه؟

أهوكا قالّو..، سمعتيه؟ كعبة و كاس..... هههههه.......، كعبة و كاس....، هههههههه

:-O ........................

تي هيّا جرّبيه عاد (و طفّ، يحشيلها مغرفة قدّ راسها في فمّها)

ما عجبكش؟

تفففف، تففف...، ممممممم.....، آهاأه...، ما حبّسسس بابا

أڨعدي.....؛

مغرفتين أخرين، و يعمل هكّا يلطخلها عقاب كعبة بولو قدّامها

باهي كمّلي البشكوطو متاعك

مممممم....، ما نحبّس

أيّا امّالا و الله لاني شاريلك الشكلاطة...، و الاّ ما نهزّك للبلفيدار نخلّيك بحذا الڨرد و نروّح

وعععععععع....، ما نحبّس الڨرد بابا....، وعععععععععععع

تي أسكتي ينعن د...، تي أسكتي عليّ ها الصّباح

وععععععععع.....، وععععععععععع

الراجل يكمّل يلحس الصحفة، و يحمّل الطفلة و هي تنوّح مسكينة، و يمشي

ربّي معاها و برّا....؛

حائط مبكى - فيلم وثائقي لـ "إلياس بكّار"ـ

2010-09-02T16:17:00.006+01:00

هو واحد من بين مئات سبقوا

هو ليس أوّلهم، و لن يكون حتما آخرهم...، و لكنّه شهادة أخرى تروي آلام شعب يعاني إيذاءات الظلم المكتوم علنا

هو شريط وثائقي يروي المآسي التي خلّفها انتصاب الجدار الإسرائيلي في نفوس الفلسطينيين الذين شاء قدرهم أن يولدوا في أحواز بيت لحم، و رام الله، و الخليل، و غيرها من مدن فلسطين

عمل رائع و موجع، يبيّن القهر الذي احتلّ نفوسهم، و سمّم قلوبهم، و أطفأ براءة أطفالهم الذين لم يعودوا يشبهون أيّ طفل آخر من أطفال العالم

عمل ترى فيه من خلال ستائر دموعك عمق الجراح التي خلّفها اختلاط أطفال فلسطين مع "جارهم" الجديد، و مع بنات "الغاليل" اللّواتي تخطفن بعضهم من وقت لآخر

أدعوكم لمشاهدة هذا الشريط، و أن تلتمسوا من خلاله شجاعة رجل لم يتردّد في الإحتكاك برصاص العدوّ حتّى يوصل للعالم صورا لعيون أطفال، قد تجنّب اللسان أحيانا عناء الكلام

حائط مبكى – إلياس بكّار

مسرحية "قصر الشوك" : رائعة فنّيّة تضاف للمسرح التونسي

2010-07-17T04:31:00.003+01:00

مسرحيّة استثنائية، تروي واقعا أليما يدركه كلّ من من رافقت بعض لياليه أروقة المستشفيات البيضاء الباردة

مسرحيّة تروي الآلام المخفيّة، المحجوبة خلف ستار الزمن و أشرعة النسيان

تروي آلام المرأة الباحثة عن حبّها المفقود...، المرأة المرهقة خلف حبيب عازف و قلب نازف و عجز موجع

آلام المنسيّ الذي لم يشك يوما أحد في أحاسيسه و وجعه و حبّه و كرهه و مواقفه و معاناته و عواطفه و...، و...، و...؛

آلام الأخت التي اختلطت في ذهنها حدود الحياة و الموت، حدود الحبّ و الكراهية، حدود عزّة النفس و احتقارها، حدود الأنا و الهي، و عدّة حدود أخرى تدرَك دون أن توجد كلمات تفسّرها أو تشرح معانيها

آلام الرجل الذي جمّد حبّه تحت جليد الأيّام و النسيان

مسرحيّة تروي عدّة آلام أخرى، تُحَسّ دون أن تقدر الكلمات عن وصفها

كلّ هذا يروى داخل مزيج أنيق ممتاز من الصوت و الإضاءة، حيث تأخذك الحكايات إلى دوامة من الأحاسيس و الآلام لتنتزع من عيونك عبرات لم تشكّ يوما في وجودها داخل نفسك

مسرحية "قصر الشوك" هي عبارة عن تحفة نادرة الوجود، قد تنسينا المحاولات البائسة و اليائسة التي "أتحفنا" بها المسرح التونسيّ هاته السنة، و قد ترجع لهذا الفنّ قيمته و هيبته التي تلاشت تحت وقاحة البعض و غرور البعض الآخر

فشكرا نعمان، و جميلة، و غازي، و منعم، و أمينة، و صبري، و ميش، و الصادق، و كلّ من شارك في إنتاج هذا العمل. فالتاريخ سيدوّن حتما نجاحكم، و عيوننا لن تنسى أبدا اليوم الذي أسلتم منها أحرّ دموعها

... سأعود

2010-07-12T19:36:00.003+01:00

لا تفتقدوني...، لن أطيل انتظاركم، سأعود

سأعود لأتنفّس معكم الدخان الأسود الذي تنفثونه من أعماق حناجركم

سأعود لأتقاسم معكم سعة بطونكم و أسبح معكم في مستنقعات الغدر و برك الشماتة...؛

سأعود بينكم

دعوني وحدي للحظات، أكفّن فيها جثث طيبتي و لطفي...، أدفنها سريعا و أعود

دعوني أدفن بواقي سذاجتي و شظايا أوجاعي في أعمق هوّة في الكون، و أعود

دعوني أودّع بقايا الإنسانيّة العالقة داخل ضلوعي، و أعود

أريد أن أشبهكم حين أعود

يجب أن أشبهكم حين أعود

فقدري أن أعيش بينكم و لا خيار لي سوى أن أشبهكم حين أعود

لن أطيل انتظاركم...، و لكن إحذروا...؛

لأنّي سوف أعود

Le blog Weld Byrsa censuré - حجب مدونة ولد بيرسا

2010-05-24T23:43:00.003+01:00

Ammar continue son cirque...

طبيب يتكشّف على فرفور مرتي؟

2010-04-30T23:27:00.003+01:00

شوفو في جرّة قهوة، البشر آش ينجّم يقاسي

ولد بيرسا: أهلا ببشرة...، تي وينك يا خويا؟ أيّا برّا نشربو قهوة

بشير: هيّا برّا، أنا بيدي دايخ

شبيك؟

تي ماو المرا تولد الأيامات هاذوما و عندي شويّة قضيات نكمّل فيهم

أيا باهي، ربّي يوصّل بالسّالم... و لاباس، صحّتها مريقلة هي و البمبينو

لا الحمد لله...، في خير و نعمة

مشات للطبيب، قاللها كلّ شيء لاباس؟

إي ديما تمشي، أما توّا ماو الإيكو الإخّرة ما هزّيتهاش

( Echographie)

و علاش ما هزّيتهاش؟

أه؟؟؟ شبيك مهبول؟

لا مانيش مهبول...، أما علاش ما هزّيتهاش؟

بالحقّ، ما تعرفش؟

و الله ما نعرف

يا ولدي معروفة، ماو في الإيكو الإخّرة الطبيب يحطّلها ماكينة في فرفورها... نخلّي طبيب يتكشّف على فرفور مرتي؟؟؟ هاذاكا آش مازال

أه؟؟؟؟؟

تي ما تبداش تدهش عليّ، تخلّي انت واحد يشوفلك فرفور مرتك؟؟؟ تي هو في الإيكو النورمال، كيف يعرّيلها طرف من كرشها نبدى نقردحلو ماذابيّا نعطيه بونية

يا ولدي هاذا موش "واحد"... هذا طبيب!!!. قاري 11 سنا بعد الباك باش يشوف فمّاشي مرض...، فمّاشي عوج...، فمّاشي حاجة موش كيف ما يلزم. ياخي قتلك افرشهولها في القهوة أنا فرفورها؟

اسمعني، اسمعني... تعرف الماكينة هاذي لشنوّة تصلح؟ الماكينة هاذي، يحطّوها باش يشوفو بيها كان الشيء محلول قد ما يلزم و الاّ لا. كان موش محلول، أهوكا يوسّعلها في حزامها

اي باهي و كيف يطلع حزام مرتك موش محلول؟ تموت هي و الولد، نورمال؟ باش الطبيب ما يتكشّفش عليها؟

لا عاد... إيجا نفهّمك

إي نوّرنا يا بشرة.... نوّرنا

اسمعني مليح...، و خوذها قاعدة هاذي: فرفور المرا في الولادة يتحلّ بزوز أنواع. يا إمّا بالماكينة...، و الاّ بمتاع راجلها

أه؟؟؟؟؟ متاع شنوّة؟؟؟

إي إي إي يا سيدي...، يتحلّ بمتاع راجلها. أنا هاني نازل عليها توّا كلّ يوم، نحلّ فيها، باش نهار الولادة تلقى روحها حاضرة. مالصباح للّيل و أنا نازل عليها، عالأقلّ 3 مرّات في النّهار

تحلّ فيها؟؟؟ ياخي عندك ماكينة انت في متاعك و الاّ شنوّة؟ و الاّ ولّيت طبيب و ما قلتلناش؟

إي نعم يا سيدي، أنا طبيب مرتي. و الله حتّى ساعات نبدى ما عينيش و الاّ حاجة، نغصّب على روحي باش وقتلي تولد تبدى متفرهدة

اي ما عينكش، إي... لا ظاهر عليك و على الطّب متاعك! كان جاو الطّبّة الكل كيفك راهو البشر انقرض قبل الديناصورات

و بربّي سامحني. توّا نورمال انت، مرتك على ابواب ولادة و انت النهار الكل تخضّ فيها، قال شنوّا تحلّ فيها؟ ياخي ماخذ مرا و الاّ حكّة تنّ؟

و بالله في الولادة توّا؟ الطبيب يلزمو يلبس ماسك متاع لحام باش يولّدلك بدر البدور متاعك؟

لا أنا ولادة متاعك؟ تولّدها قابلة

يا سيدي واتات ولادة صعيبة...؟ و الاّ الطفل جاء مقلوب...؟ و الاّ يلزمها تولد بالعمليّة...؟ تموت باش الطبيب ما يشوفلهاش فرفورها؟؟؟ بالكشي عندها حاجة عجب مرتك موش كيف العباد؟

لا هاذاكا عاد الله غالب... حكم ربّي! مكره أخاك لا بطل

اسمعني يا بطل...، الطبيب يشوف في عشرين فرفور في النهار...، زعمة كان متاع مرتك مبدّع و الاّ مزيّن بالنقيشة؟ تي هو راو فادد الطبيب، ماذابيه نهار وحدة تقلّو هاو فمّي و الاّ صبعي يوجع، و هو هالنهار و طولو حالّينلو ساقيهم في خليقتو

يا خويا مبدّع و الاّ موش مبدّع. متاع مرتي لا

و اسمع، خوذها نصيحة من عندي: كان تعرّس و مرتك تحبل، ديما امشي معاها للطبيب. و أدخل معاها الداخل. كان قالّك استنّى البرّا هزّ مرتك و روّح...، هاذاكا الطبيب ناوي عالخنن و يحبّ يتكشّفلك عليها

قالّك اللّطف، فمّا حتّى الّي يخدّرو النساء و يستفعلو فيهم و رجالهم يستنّاو البرّا. موش يتفرّج و يمسّ برك

بشير....؛

نعم

تفرّجت البارح في طرح حمّام الإنف...؟ و الله فرحتلها، ما نحبّهاش تطيح....؛

................................................................

تدوينة ورديّة... مسالمة

2010-04-29T16:27:00.006+01:00

اليوم لن أتحدّث عن الفنّ

لن أتحدّث عن الفنّ خوفا من أن يكشف سخفي و يتعرّى غبائي، و يتبيّن جهلي لعلماء وطني

لن أتحدّث عن الفنّ تجنّبا لأن يحوّل كلّ فنّان جدار "فايسبوكه" إلى حائط للمبكى ينتحب فيه ذكرى ضحايا "الإرهاب الإعلامي"؛

لن أتحدّث عن الفنّ حتّى لا ألطّخ وجه فنّ وطني البلّوري بعباراتي البذيئة و أفكاري القبيحة

لن أتحدّث عن الفنّ

لن أتحدّث أيضا لا عن سياسة و لا عن حرّيّات

لن أتحدّث عن الحرّيّات حتّى لا يمارس "عمّار" حرّيّة إلحاقي بقائمة الـ 404 المباركة

لن أتحدّث عن الحرّيّات حتّى أجنّب نفسي الملاحظات البنفسجيّة الخشبيّة

لن أتحدّث عن الحرّيّات خوفا من أن تلقّح كلماتي زهور المرناقيّة المتفتّحة دوما

لا... لن أتحدّث عن الحرّيّات

لن أتحدّث اليوم كذلك عن الدّين

لن أتحدّث عن الدّين حتّى لا يهدر دمي و يصيبني رذاذ "الفليتوكس" الخانق

لن أتحدّث عن الدّين حتّى لا أتحمّل انفصام المتديّنين الذين يخاطبونك بأدب مخجل علنا، ثمّ يشبعونك شتما في رسائل خاصةّ مقرفة

لن أتحدّث عن الدّين لأصدّ عن أذنيّ النظريّات الساذجة و المفاهيم المتخلّفة الحمقاء

لن أتحدّث عن الدّين

اليوم لن أتحدّث... اليوم قرّرت أن لا أتحدّث

اليوم قرّرت أن أغنّي.....؛

لكن....؛

بل حتّى غنائي قد يزعجهم....، لن أغنّي....، سوف أترك الآخرين يغنّون مكاني

لن أغنّي.... بل سوف أعطي فقط الـ "لاّ"....؛

Alain… chante !

مسرحية "الناس الأخرى" : إنتحار توفيق الجبالي

2010-04-24T04:43:00.003+01:00

بعد السّيف علّق منجل...، و بعد العزّ و التّدليل ولّى فرّاشة زنبيل....؛

هاذوما أمثلة شعبيّة ينطبقو على مسرحيّة توفيق الجبالي الجديدة الّي شفتها البارح في التّياترو
الّي شفتو البارح شيء انّجّم نقول عليه أنّو عيب... ما يجيش

مسرحيّة كاينّي يـبصم فيها توفيق الجبالي، حسب رأيي (الفنّان المسرحي الكبير و واحد من أكبر زوز مسرحيّين مع الفاضل الجعايبي) على "حجّة وفاتو" الفنّيّة

حجّة الوفاة هاذي فيها برشا فقرات

الفقرة الأولى هي إستعمال توفيق الجبالي لممثلين هاوين (و هاوين زادا في أعمق هوّة فنّيّة ينجّم يتصوّرها البشر): معناها كاينّو الواحد لمّ ثمنية فروخ من أوّل زنقة عرضتّو و عمل بيهم مسرحيّة

ما فهمتش كيفاش واحد جنّ متاع مسرح كيف توفيق الجبالي ينجّم يخدّم معاه ممثّلين في المستوى الهزيل متاع الممثلين الّي شفتهم البارح؟؟؟

ممثلين من غير حتّى عمق فنّي، صوتهم ما يوصلش، ما ينجّمو يوصّلو حتّى إحساس، حتّى شعور، حتّى شيء... قالشي الدّزيري: والو

و هذا شيء متوقّع، على خاطر موش بلاش الممثلين المحترفين يقراو 4 سنين بعد الباك باش يوصلو يقنعو و يفرضو رواحهم، و شوف و شوف

في بالي الشيء وضاح و تفهم مع مسرحيّات أخرين الّي استعملو ممثلين هاوين و طلعو كي الحنّة في ساق البغل، لكن مع الأسف ظهر بالكاشف الّي الدّرس مازال ما تفهمش مليح

الفقرة الثانية من "حجّة الوفاة" هي الفرق الكبييييييير بين الحضور الرّكحي متاع واحد معلّم كيف توفيق الجبالي و جماعة ببّوش بو مصّة كيف الأخرين الكلّ.

معناها حسب رأيي، توفيق الجبالي طيّح قدرو و لطّخ مسيرتو الكلّ بها الخدمة مع ناس مع عندهم من التمثيل كان الكلام

يقول القايل كان عطى دورو لواحد هاوي و خلاّها كلّها وزّاكة تتشاطح فوق الركح و هو يسيّر من بعيد، و الله تنجّم تتعدّى. راهو الواحد دخل و خرج و نسى الهدرة بعد ربع ساعة.

أما برجوليّة هكّا ضرّ روحو برشا برشا برشا

و الاّ بربّي آش فيها كان جاب 8 ممثّلين محترفين، راهم خدمولو خدمة على قاعدة، و كل حدّ زاد فيها شويّة من الروح الّي عندو، و حتّى كان فمّا طرف ضعف يتخبّى و يتصقل و كذا...؟؟؟
برّا حوّس تفهم؟؟؟؟

الفقرة الثالثة، و الّي تدخل شويّة في محتوى المسرحيّة، هي نصّ الدّور متاع توفيق الجبالي: كلام سمعناه ألف مرّة، قالو في ألف مسرحيّة قبل، ضحكنا عليه مئات المرّات قبل.... لكن .... يزّي، فدّينا، مساطت الهدرة الزّح.

علاش يقلّك:

كلّ ما قد فات لا ردّ له ... فلتكن عن ذاك مصروف الطّمع
أيعود الحسن من بعد الصّبى ... قلـّما أدبر الشّيء فرجع

فرد تفدليك، فرد لعب عالكلام، فرد حركات، فرد كلّ شيء... معناها الواحد قاعد يسمع في نفس الجمل و نفس الكلام في مسرحيّات ما عندها حتّى علاقة ببعضها

و الّي يقلّق أكثر من هكّا، كوْنو الكلام هذا، الّي كان قبل يوجع و يوصل بيك حتّى لأعمق مستويات النقد و العواطف الّي تنجّم تتصوّرها، ولّى سطحي، خفيف، كاينّو يتبّع في النّسمة

فمّا الّي يقول: توفيق الجبالي وفالو و بابورو زفـّر... أنا نخيّر نقول لعلّ عثرة، و الأيّام توّ تورّينا الصحيح

الفقرة الرابعة من "حجّة الوفاة" هي الدّيكور و الجوجمة

ديكور معبّي برشا، ثقيل، يخبّل العينين، و زيد مع الممثلين الّي ما يفرّقوش بين العطاء و المجهود على الرّكح و بين التسوفيج و التخلويض...، مع الجوجمة متاع الصّوت، مع الكلام الّي يتعاود 40 مرّة...، حاسيلو تخرج راسك مفولغ...، كاينّك متكيّف و الاّ ماكل طريحة

و ماو ناس بكري قالو زادا: الّي مستانس ياكل من يدّك، كيف يراك يجوع

خيبة أمل كبيرة من مبدع كيف توفيق الجبالي، على خاطر الّي يسنّسك بطقاطق كيف كلام اللّيل، و هنا تونس، و مذكّرات دينصور، و خاصّة المجنون، الخ... ما تنجّم تستنّى منّو كان خير من هكّا

حتّى الجمهور كيف صفّق، صفّق ماخذة في الخاطر، بتربية لا أكثر و لا أقلّ. و على كلّ حال الممثلين فهمو الّي الناس ما عجبتهمش الخدمة و الّي كانو يستنّاو في حاجة خير بياسر من هكّا. التحيّة كانت باردة ساردة، كاينّي أربعين موش مسرحيّة

في الوقت الّي الفاضل الجعايبي مكسّر الدّنيا بخدمة صحيحة، مع ممثلين صحاح، و العروض الكلّ تتعمل قدّام صالة متكّمة بالعباد و يلزمك تعربن قبل بثلاثة أيام باش تلقى بقعة...، توفيق الجبالي قاعد يحاول في محاولات يائسة مع جماعة خلواضة يهزّو و يسبطو، قال شنوّة هانا نعملو في المسرح.... مسهلو

على كلّ الشيء هاذا الكلّ من اختيارو، حدّ ما ضربو على يديه و قالّو اخدم مع جماعة بو دورو

ان شاء الله توفيق الجبالي يلقى طريقة باش يلقف بيها روحو، على خاطر هكّا أكيد مأكّد أنّو باش ياكل كبّوط عمرو ما راه

و ان شاء الله زادا يكون الّي عملو هذا ما يكون كان كبّوط برك، و موش عمليّة... انتحار

Photographie en Tunisie : miroir de la non-intégrité intellectuelle ?

2010-04-11T23:57:00.006+01:00

Je me souviens toujours du scandale qui, il y a plusieurs années, a bouleversé la Tunisie lorsque l’opinion publique a découvert le plagiat commis par Jelila Hafsia qui a copié plusieurs passages de deux romans étrangers pour son livre « Cendres à l’aube »

Je me souviens que lorsqu’on m’a raconté cette histoire (parce que le livre était sorti avant que je ne sois né) on m’avait fait comprendre que ce que venait de commettre Jalila Hafsia était une erreur impardonnable et que cet épisode l’entacherait pour le restant de ses jours.

Malheureusement ce qu’on remarque ces dernières années, et notamment à travers la photographie, c’est que certaines valeurs changent. Certains interdits ne le sont plus, ou alors pas beaucoup, ou peut être pas assez pour en parler.

Pourquoi la photographie ?

La photographie est un art accessible à tout le monde. Tout le monde peut se procurer un bon appareil et prendre autant de clichés qu’il désire.

En plus avec l’avènement du numérique, sa pratique est devenue plus aisée et moins couteuse, d’où sa popularisation et sa propagation en masse dans les milieux artistiques.

Le coté technique de cet art (contrairement à la peinture par exemple) est devenu très accessible et tout le monde peut utiliser son appareil avec peu de soucis. Il ne reste donc que les idées !!!

Et ça, tout le monde n’en a pas…

L’art de la photo est donc basé en majeure partie sur les idées et les inspirations du photographe.

Et comme tout le monde n’a pas forcément les bonnes idées, on s’est mis à piquer celles des autres ou alors carrément leurs photos.

J’imagine que tout le monde a entendu parler du légendaire Amine Boussoffara qui s’est servi sur flickr pour faire une expo personnelle, et qui s’est défendu comme un malade en sortant à chaque fois une excuse plus ridicule que sa précédente.

Il y a aussi Zouheir Ben Amor, un « illustre » photographe qui n’a pas hésité à « s’inspirer » de la campagne de Amnesty International pour son expo personnelle en 2OO8 et dont voici les images :

(photo d'origine signée Amnesty International)

(Photo signée Zouheir Ben Amor)

Je me souviens que lui aussi s’est justifié par des explications abracadabrantes et dont la dernière était qu’il allait porter plainte contre Amnesty International qui lui a piqué son idée !!! (ça s’est pasé sur facebook en 2008)

Je cite aussi Zied Ben Romdhane, jeune photographe de talent, mais qui s’est aussi approprié l’idée d’un autre photographe pour son propre compte

(Photo d'origine signée Andrea Jessop)

(Photo signée Zied Ben Romdhane)

J’ai fait exprès de citer ces exemples là, parce que je viens de voir que le fameux Boussoffara et Zouheir Ben Amor participent à une exposition de groupe à Ezzahra comme si rien ne s’était passé. (l'évènement est ici)

Je ne sais pas qui a le courage de proposer son espace à des plagiaires et des voleurs, mais en tout cas il ne doit pas avoir beaucoup de scrupule et surtout d’égard envers l’intégrité intellectuelle en général.

Permettre à des tricheurs d’exercer sous son propre toit, c’est d’abord avaliser leur malhonnêteté et aussi y participer.

Un Boussoffara qui, avec tout le culot du monde, expose des photos quelques semaines après s’être fait choper la main dans le sac, n’a l’air de gêner personne.

C’est pour cette raison que je me mets à croire que l’intégrité intellectuelle est une valeur dépassée en Tunisie. Voler les idées des autres est devenu un geste banal et même béni ! puisque celui qui dénonce ce vol sera certainement accusé d’agaçant, de vouloir mettre les bâtons dans les roues, de jalouser « l’artiste », etc…

Mais ce que je crois par-dessus tout, est que ces pratiques nuisent colossalement à l’art et à la culture en Tunisie.

Il y a des jeunes qui font du super bon travail (on peut en voir des exemples à la galerie aire libre à El Teatro en ce moment) et qui commencent à être sérieusement salis par ces histoires de plagiat et de vol. Les galeristes se méfient, les acheteurs redoutent de se faire arnaquer…

A travers la photo on comprend que les valeurs qui existaient dans le temps sont en train de s’évanouir.

L’alarme doit être sérieusement tirée pour ce sujet là et l’éveil aux valeurs culturelles doit être imminent.

La solution ne sera certainement pas les lois et les tribunaux, mais surtout le regain d’une conscience perdue dans cette folie numérique et cette culture éparpillée qui a parfois du mal à retrouver ses attaches.

Un conte de faits: Le petit Anas méritait mieux...

2010-04-09T11:45:00.009+01:00

Un film à voir certainement, mais qui nous laisse sur notre faim.

Le parcours extraordinaire d'un enfant surdoué de la musique a été raconté d'une manière un peu bâclée, on aurait dit que le cinéaste s'ennuyait pendant le tournage.

Le film suivait l'ordre chronologique des faits certes, mais il a négligé les courbes émotionnelles que provoquait le fabuleux parcours du gosse et de son père, en les entrecoupant par des épisodes caricaturaux ou par des scènes qui engageaient des sujets à mille lieues de la musique et de l'histoire du petit Anas!

Dès le départ, le documentaire filmé avec la manière la plus conventionnelle et insignifiante, décrivait l'univers où vivait le petit virtuose, mais en méprisant un peu le principal intéressé (c'est à dire Anas) au profit de sa famille, du serveur du café, du mezoued dans un r'boukh, etc...

Du coup, on sort un peu frustré en regrettant que la merveilleuse éclosion d'un tel prodige ne soit pas répertoriée de la manière qu'il méritait et qu'on attendait de Hichem Ben Ammar.

Beaucoup de déchets et de maladresses qui ont gâché toutes ces années de travail qui ont été nécessaires au film.

Un deuxième montage s'impose. Peut être dans quelques années, pour tracer la suite de ce fabuleux destin du petit Anas, mais pourvu qu'il nous fasse oublier ce gâchis.

L'auteur de "Ennjoum fil kaila", un des meilleurs documentaires au monde, pouvait certainement réussir beaucoup mieux!

ـ"كان يا مكان... عطرية"ـ : فيلم وثائقي يحمل أكثر من بعد

2010-04-03T01:47:00.004+01:00

فيلم وثائقي تونسي متاع مخرج إسمو لسعد الدخيلي تعرض اليوم في مسرح الفن الرابع

فيلم مصوّر في وسط عطّار في جندوبة، و يحاول يفهم حياة العباد غادي من خلال علاقتهم بعطّار الحومة

علاش قلت الفيلم هاذا عندو أكثر من بعد، على خاطر يدخل مباشرة في حياة العباد من داخل، في خناخشهم...، معناها يحكي على حكاياتهم الكلّ من غير ما يستحقّ لكثر حديث

الأبعاد الّي يظهّرهم الفيلم (بالعاني و الاّ موش بالعاني) ينجّمو يفسّرو المشاكل الإجتماعية الكبيرة الّي نعيشو فيها، و الّي بالطبيعة ماهو مستعرف بيها حدّ

البعد الأوّل

البعد الأوّل الواضح، و الّي ما يستحقّش برشة كلام، هو كيفاش الحوانت الصغار ما عادش لاقين رواحهم في وسط شركات التوزيع الكبار، كيف مونوبري و كارفور و الأخرين

برشة حوانت قاعدين يسكّرو و الناس ما عادش لاقية باش تاكل الخبز مع ها الغولّة الّي بدّلو قوانين التجارة و فرعسو حياة الناس المتوسطين، الزواولة، العيّاشة.... و خاصة الزواولة و الّي باش نحكي عليهم في البعد الثاني

البعد الثاني

البعد الثاني هو الإنقسام الطبقي الّي نعيشو فيه في المجتمع التونسي، و الّي قاعد يكبر بصفة رهيبة

علاش قلت هكّا، على خاطر الفيلم يظهّر حياة بلاد كاملة. و ماهاش بلاد صغيرة زادا: جندوبة ولاية كبيرة و شيء طبيعي أنها تمثّل البلاد بطريقة أو بأخرى

في وقت الّي تشوف الناس في تونس تحوّس في كراهب سومهم 600 و 700 مليون، و الّي يدخّل كرهبة تسوى مليار في حيط، من غدوة بوه يشريلو أختها، تشوف ناس واحلة في سوم زوز باقات و الا كيلو سكّر. و الدليل الّي الناس تجي تكردي قضية بـ 350 و 400 ملّيم

السيّد الّي يدخل للعطّار كيف الذليل، الّي ما يعرفش كان طرف الصرف الّي في مكتوبو باش يخلّطو على خمسة سواقر و الاّ لا، الّي فطورو كسكروت بالسردينة و قازوزة على شكارة في تركينة، الّي ما يخلطش على دبّوزة زيت بـ 900 ملّيم.... زعمة السيد هاذا شكون يتفكّرو؟ زعمة يجبدو عليه في مجلس النواب وقتلّي يخطّطوا لبرنامج الدولة؟

على كلّ... الشيء هاذا موجود، و واضح للناس، و عين الشمس ما يغطّيهاش الغربال. و الناس الكل قاعدة تشوف في الغنيا يزيدو يستغناو و الفقراء يزيدو يفقرو

الطبقيّة ولاّت شيء ظاهر...، أما الناس بالطبيعة ما يهمهمش و الضربة في غير جنبهم كاينّي في حيط

في الإنتظار، الليلة ألف في الميا فمّا شكون في تونس يسوق في كرهبة تسوى حقّ 100 هكتار في جندوبة، كيف ما فمّا شكون ما فوقوش حقّ عشاه

البعد الثالث

البعد الثالث ما عندوش علاقة بمحتوى الفيلم، لكن بالناس الّي عملو الفيلم. و كيف ما فمّا انقسام طبقي (الي حكيت عليه في البعد الثاني) فمّا انقسام آخر، ما لقيتش كيفاش نسمّيه، لكن للأدب باش نسمّيه إنقسام ثقافي

الشباب.... الشباب الّي يعمل أفلام كيف هاذي، و الّي يسمع صوت العباد و يسمّعو، و الّي بفنّو و بعلمو يوصّل التصويرة الصحيحة، ما ينجّم كان يعزّ عليك، و يخلّيك تحسّ أنّي البلاد مازالت تخرّج في الرجال

على خاطر وقتلّي تقعد عام أثناش، سبعة أيام في الجمعة و انت تشوف فيا هاك الطحّانة يزويوا و يتبّعوا كي القرودة، تقول: هاذم رجال باش ينفعوا البلاد؟؟؟

أما في الأخر، حتى كانهم قلال... تونس مازال فيها رجال. و شباب تونس ماهوش هاك الي يحكيوا عليه في التلفزة و الي لابس كرافاتات موف و يلحّس و يهز في قفف ماهي قفف...، شباب تونس هو هاذا، الّي يحسّ ببعضو، الّي يسأل على أحوال بعضو، الّي ما يدوّرش وجهو على الّي طايحة بيهم الدنيا، و الّي يعرف أحوال البلاد و ما يخبّيهاش

البعد الرابع

البعد الرابع يعمل برشا مشاكل، و برجولية الي يحب يفهمو يمشي يشوف الفيلم وحدو

بين "التساوي في الحظوظ" المعلن و سياسة المظهر

2010-03-30T09:14:00.005+01:00

ما فمّاش مقال و الاّ خطاب، رسمي و الا موش رسمي، ما يحكيش على "التساوي في الحظوظ" و "رفض الإقصاء" و هاك الكلام المزيان الّي استانسنا بيه توّا مدّة

أما كيف تجي تغزر بعينيك، آش تشوف؟

تشوف مثلا الدولة تبني في قناطر و كاياسات و هيلمان كبير في عين زغوان، بما قيمتو 9 مليارات و الاّ أكثر... معناها موجّهين لناس المزمّر فيهم شاري برطمان بـ 160 مليون

في نفس الوقت تشوف أولاد و بنات صغار في أحواز القصرين يضربو 6 و الاّ 7 كم على ساقيهم باش يخلطوا للمكتب... على خاطر نفس الدولة ما عندهاش فلوس باش تبنيلهم 4 أقسام يقراو فيهم، الّي كان خلات يتكلّفو 50 مليون

زعمة عندهم نفس الحظوظ الولد الّي يسكن في عين زغوان و الّي الدولة تكمّل تفرشلو كاياس بـ 9 مليارات، و هاك الطفل الّي ساقيه حفات من المشي و ما لقاش مكتب يقرى فيه؟؟؟

تشوف الّي بوه واصل تستنّاه الخدمة من قبل ما يكمّل قرايتو، و لا صفّ لا مطالب لا شيء

في نفس الوقت تشوف زادا الناس بايتة تحت القناطر يستنّاو باش يعدّيو مناظرة و يعرفوا مليح الّي هوما موش باش ينجحوا... على خاطر ولد سي فلان و بنت سي فلتان حجزو البلايص و هوما راقدين في الدار

و الدليل هوما الـ 35 و الاّ 45 ألف مترشّح الّي قدّموا مطالب للمناظرة متاع الضمان الإجتماعي

زعمة زادا عندو نفس الحظوظ السيد الّي يخدم سوجيقات و هو عندو إجازة في الحقوق و يجري من مناظرة لمناظرة، هو و ولد سي فلان الّي راقد في الدار و يختار آش يحبّ يخدم؟؟؟

موش معناها ما نبنيوش قناطر و ما نحسّنوش الكاياسات...لا، أما شويّة توازن في توزيع ثروات الدولة... على خاطر ما فمّاش علاش باش الغنيّ تزيد الدولة تبشبش بيه و تصرف عليه، والّي ما في حالوش تكمّل تكبّلو سعدو و تستخسر فيه طرف كاياس باهي و الاّ دار ثقافة باهية، و الاّ حتّى جرد مكتب يقرّي فيه صغارو

و الاّ زعمة كلامي موش صحيح؟

ـ 19 مارس / 6 نوفمبر ... و الوطنيّة

2010-03-19T15:46:00.005+01:00

للّي ما لاحظش، الأيّامات هاذوما قاعدين نعيشو في درس خشين ياسر من دروس الوطنيّة، الّي الدّولة قاعدة تقرّيلنا فيهم توّا مدّة

يا إمّا مباشرة في التّلفزة، و الاّ على طريق الأنترناتيّين الوطنيّين كيف ما يسمّيو في رواحهم

اليوم يا ناس 19 مارس...، معناها مازال نصّ نهار على عيد الإستقلال

ما فمّاش حدّ ما فطنش الّي ما فمّا حتّى شيء في الشارع يدلّ على أنّي هاذي بلاد تحضّر في روحها باش تحتفل بعيد الإستقلال متاعها

توّا العشيّة فين ريت أوّل مظهر من مظاهر الإحتفال، و الّي هوما عبارة على 5 شرايط معلّقين فوق الرّمبوان: زوز قصار حمر، فيهم علم تونس...، و ثلاثة موف فيهم تصويرة (مالأوّل مشى في بالي تصويرة بورقيبة و الاّ مصباح الجربوع و الاّ واحد مالّي صنعو الإستقلال...)، ياخي طلعت غالط

حاسيلو... لا علينا

قلنا امّالا النّاس الّي تعطي في دروس الوطنيّة، ما نعرفش فين مشات الوطنيّة متاعهم نصّ نهار قبل اليوم الّي الوطن تسمّى فيه "وطن" و الّي دمومات الوطنيّين (الّي بالحقّ موش المضرّحين متاع الأنترنات) مشات على خاطرو سواقي؟؟؟

(بربّي تفكّرو معايا نهار 6 نوفمبر في العشيّة (الّي هو يجي نصّ نهار قبل حفلة "وطنيّة" أخرى

و الاّ زعمة الوسّادة غلبت الولاّدة، و بنت 23 طيّحت على للاّتها بنت الـ 54؟؟؟

حاسيلو... محلاها الوطنيّة، و محلاهم النّاس الّي يقرّيو فينا في الوطنيّة

نحّي كسرتك من على للاّتك... يا عمّار

2010-02-25T00:06:00.007+01:00

مدوّنة "بنيّة تونسيّة" وقع حجبها

http://nightclubbeuse.blogspot.com/

إن كنت تعتقد بأنّك سوف تجفّف قلمها و تسكت صوتها بضربة مقصّك الصّدئ...، فإنّي أبشّرك يا أغبى من أنجبت الشّبكة:

لن تهدأ أذناك من صراخ الأصوات المنادية بالحقّ...، و اعلم أنّ اليوم الذي سوف نفرغ في فمك مثاناتنا يقترب مسرعا. فعجّل و أكمل ما تبقّى لك من جهد في محاولاتك اليائسة، لأنّ التاريخ لن ينتظر طويلا قبل إلقائك في قعر مزابله.

شكرا لينا... و مبروك الوسام

معرض الصّور "أمين بو صفّارة": سارق و في يدّو... فليكر

2010-02-14T18:48:00.018+01:00

يرحمهم ناس بكري، قالو: الّي فاضحو ربّي، ما يستروش العبد....

إي موش الأيّامات هاذوما فمّا إيكسبو (معرض) متاع تصاور إسمها

...لسي أمين بوصفّارة.AFRICA OLIM APHRODISIUM

معرض هايل الحقّ... تصيورات مزيانين يعملو الكيف، ما عندي ما نقول

أما ماو ناس بكري يقولو زادا: بين الكشفة و السّترة محطّ صبع...، و يا ويح من تلهات بيه العينين!!!

اي عاد و أنا نربش في أنترنات، نلقى تصيورة مالّي شفتهم في المعرض على "فليكر"!!!

هاذي التصويرة المعلّقة في المعرض

و هاذي الّي لقيتها على فليكر "هنا"؛

الحقّ ما جاش لمخّي مالأوّل الّي الواحد تنجّم توصل بيه البهامة باش يعمل عملة كيف هكّا...قلت لعلّ فرد شبّاك، عاود خذاه و صوّرو... موش يقولوا الشكّ طريق إلى اليقين؟

خديت الزوز تصاور و حطّيتهم فوق بعضهم على فوتوشوب، طلعو بالظبط فرد تصويرة

زدت بربشت شويّة...، نلقى تصويرة أخرى... و وحدة أخرى...، و وحدة أخرى... و عمّال نقدّم عمّال تلقى في التصاور

مثلا هاذي... هاو الرابط متاعها "هنا"
و هاي الّي مصوّرها بيدّي في الإيكسبو اللّوطى

أهيكا ببسكلاتها، بزبلتها الملوّحة في القاعة بما عطاها ربّي

و هاذي ...؛

و هاذي...، و برشا أخرين ما انّجمش نحطّهم الكلّ

حاسيلو مختصر الحديث، الإيكسبو الكلّ عاملها بتصاور سارقهم من فليكر!!!!

طلع السّيّد يتيليشرجي في التصاور... ضريبتين فوتوشوب (هاو نحّى الألوان، هاو غمّق شويّة، هاو قصّ منها طرف، الخ...) و يعدّيهم للطّبعان...، و من بعد يصحّح من تالي و يبيع

و يزيد من فوق يفيّش و يدزّ في صدرو، و يجغجغ عالعباد بالفرنسيس و كذا... حاسيلو فكّرني في كلمة تقولها ممّاتي ساعات: "بصّاصة و عزيزة نفس"

هاو هنا مثلا يبوزي مع تصاورو "المفلكرة"؛

عيب كبير!!!!!

عيب، على خاطر يتمنيك على الناس الّي كيفي مشاو يتفرّجو و يشجّعو فيه و حاسبينو عبد

عيب، على خاطر يتمنيك على الناس الّي عاطينو رواق باش يعرض فيه وقتلّي فنّانين بالحقّ ما لقاوش فين يعلّقو خدمهم

عيب على خاطر الّي يحبّ يخدم و يعمل إسم، موش بالسرقة و الكذب و اللّقمة الباردة

أما تعرف الّي المتغطّي بالأيّام عريان يا سي أمين.... المرّة هاذي هاك عدّيتها عالعباد و زكّمت منهم برشا. أما في قالب كذبة و لهفة و الله أعلم أش من مرض آخر عندك في نفسك، هاك حرقت روحك و حطّمت مستقبلك... و برّا فركس توّا في أنا بلاد تنجّم تعمل معرض....

و آخر الحديث: إذا لم تستحي، فأفعل ما شئت...؛
__________________________________
Ps: Le reste de l'histoire est ici chez Al Mitra, qui a découvert amèrement la supercherie

حكم التّلهيم... شرعا

2010-01-30T17:52:00.003+01:00

ما عرفتش، نبكي...، نضحك...، نتغشّش...، نتلّف....

معناها شوف الواحد فين طاسة مخّو تنجّم توصّلو!!؟؟؟

الديمقراطية كيف الهريسة...، الي موش مستانس بيها تعملّو أحيّة في كرشو

2010-01-22T10:12:00.005+01:00

عشرة تلامذة ألمان محصورين في البيوت الضيقة متاع صبيطار آوسبورغ، و جوفهم تجري، و حالهم يكرب.

علاش؟؟؟

على خاطر كلاو هريسة حارّة تونسيّة، و هوما موش مستانسين بيها.....

الهريسة تخلقت للتوانسة، و ما ينجّموا يستعملوها كان التوانسة...، يمسّها حدّ آخر تعملّوا أحيّة في كرشو و في ترمتو...

عيب عليهم...، حاجة موش متاعك ما تدورش بيها

عشرة طلبة توانسة محصورين في بيوت ضيقة، أما موش في صبيطار، و جوفهم تجري زادا وحالهم يكرب

علاش؟؟؟

على خاطر حبّوا يستعملوا طرف ديمقراطيّة كيف الألمان و يعبّروا على رايهم، و هوما موش مستانسين.....

الديمقراطية تخلقت للألمان و الي كيف الألمان...، يمسّها حدّ آخر تعملّوا أحيّة في كرشو و في ترمتو و في ظهرو و في راسو و في برشا بلايص...

عيب عليهم زادا...، موش قلنا حاجة موش متاعك ما تمسّهاش؟

المسلمين في ماليزيا: قمّة الكلوف

2010-01-11T14:13:00.003+01:00

آخر ما صار في عالم الكلوف و شريان الشبوك:

المسلمين متاع ماليزيا عاملين حالة، و ضارب و مضروب، و حرقان كنيسيّات الخ...

علاش؟

على خاطر المسيحيّين كيف يصلّيوا، يستعملوا كلمة "الله" و هوما قال شنوّة ما عندهمش الحق. قالّك كان المسلمين عندهم الحقّ ينطقوها الكلمة!!!!

و برّا انت عاد، حاول افهم معاهم حاجة....

تي توّا انت ماك صلّيت و نظّمت أمورك و كذا...، آش مدخّلك فيهم يعيّطوا لشكون و بأنا اسم؟؟؟

تي ماو برّا اقصد ربّي تلهى في أمورك، و شوف آش ينقصك و آش يزيدك، و سيّب العباد تعبد الرّب الّي تحبّ عليه و تعيّطلو بالإسم الّي تحبّ عليه...، و الّي عندو شهوة يديرها في عشاه

أما لا...، كيفاش؟؟؟ يلزمني أنا نصلّي كيف ما نحبّ أنا، و الناس الأخرين يصلّيوا كيف ما نحبّ أنا، و العالم الكلّ يمشي على كيفي أنا، الخ...

حاسيلو أهيكا لاحمة غادي، و عاهدك بيها ولاّت مظاهرات و حروبات و قاتل و مقتول، و آش باش يحزّها...

و هاذي الأماريكان لا يدورو بيها لا يتلفّتولها على خاطر ما فيهاش طميعة: لا بترول لا غاز لا والو.... باش ترصّي لعمّك زين العابدين (متاعهم أراهو موش متاعنا) يهز في راسو و يسبط و يطلّع في الفتاوي و القوانين و النظريّات... و هاذا الكلّ علاش؟

على خاطر كل حدّ ما حبّش يتلهى في روحو، و يسيّب العباد تسرح على رواحها

و مختصر الحديث: ديما فين فمّا مشكلة، أراهم المسلمين طرف فيها... زعما هاذا الكلّ بالزّهر، و ديما مظلومين؟؟؟

ممكن... علاش لا؟

كل عام و.... هم بخير

2009-12-31T13:22:00.005+01:00

بطبيعة الحال، لا أحد منّا يعلم كيف ستكون السنة القادمة....

لا أحد يعلم كم ستحمل لنا من أفراح و أوجاع و خيبات و نجاحات....

لا نعلم ماذا سترسم لنا سنتنا الجديدة التي نستقبلها بالأفراح و المرطبات و النبيد و القبل....

طبعا، لا أحد منّا يعلم...

لكن هناك شيء نعلمه جميعا و ندركه شديد الإدراك

فإن كان كلّ فرد منّا يجهل كيف ستكون سنته...، فكلّنا نعلم كيف ستكون سنتهم....

سنة تشبه 62 سنة خلت....

ففي سنتهم الجديدة، ستمطر عليهم السماء قنابل، مثل 62 سنة خلت...

في سنتهم الجديدة، سيثـقب "القاليل" صدور أطفالهم، مثل 62 سنة خلت...

في سنتهم الجديدة، سوف تغتصَب أراضيهم، مثل 62 سنة خلت...

في سنتهم الجديدة، سيعمّ الدمار ديارهم، مثل 62 سنة خلت...

في سنتهم الجديدة، سوف تعانقهم الموت...، و تحتقرهم الحياة.... مثل 62 سنة مضت

حديث الشهوات في رواق التياترو

2009-12-16T14:43:00.005+01:00

حين تتملّص الشهوة من لحافها و تنفجر في نفوس الزائرين...، تتسارع الأنفاس و تغرق العقول داخل عطورها اللزجة الملجّنة.

فيتناسى العقل كلّ قيوده و تجوب العين كامل تضاريس الجسد لتحيي فيه كلّ أركانه و تضرم فيه نيرانا خمدت، تحت صقيع الأديان و جليد الأخلاق.

فحين تفوح رائحة الشهوات بين جدران الرواق...، يصمت اللسان، و يتعطّل العقل....، ليصرخ الجسد

ــــــــــــــــــــــــــــــــــــــــــــــــــــ
sexy art 2 معرض

من 15 ديسمبر إلى 18 جانفي بفضاء التّياترو

الرّابط

عاطف بن حسين و حسام الساحلي: زوز بانديّة جدد مسيبين في البلاد

2009-12-10T16:50:00.009+01:00

كيف ما يعرفوا الناس الكلّ، فمّا مسرحية جديدة تعرضت في المسرح البلدي نهار الثلاثاء إسمها "غلطة مطبعية"... و كيف ما سمعوا الناس الكل زادا على طريق الصحافة و الاّ المدوّنات و الا على طريق الكلام الي يتقال بين العباد، الّي المسرحيّة هاذي حموم، تعيّف، حالة حليلة، لا ساس لا راس، معناها بلغة أخرى: خرية أولمبيّة.

و بالطبيعة، الفنانين، خاصة كيف يتعرفوا شويّة هكاّ، و راسهم يكبر، و يزيدو يتلحّفوا مليح بالهندي كيف ما عاطف بن حسين، ما عادش يقبلوا النّقد، و يولّي الواحد يلزمو أما يلحّسلهم و يشكرهم و يقففلهم، و الاّ يسكّر فمّو إلى الأبد و يستحفظ برأيو لنفسو.

تقلّي انت: إي باهي، فينو بيت القصيد؟

بيت القصيد يا جماعة هو أنّو سي عاطف بن حسين (ممثل) و سي حسام الساحلي (مخرج الخرية الأولمبية) و سي المنتج متاع الخرية، يهزّوا رواحهم اليوم الصباح، و يهدّوا على مقرّ جريدة "تونيسكوب" الإلكترونيّة و يقيموا فيها القيامة... يا سبّان، يا تهديد، يا عياط... و هوما يتعربدوا، و هاك الصحفيّين يرعشوا من ها الثلاثة غولّة الّي زدموا عليهم... و سي حسام الساحلي يصيح على طول صوتو: سيّبني عليها...، سيّبني عليها" .... و في يا بهيمة...، يا الّي ما تفهم شيء في المسرح...، آش مجيّبك للمسرح باش تكتب عليه...،الخ...

حاسيلو... شيء يحشّم، ينطّق، يطلّع الدّم....

و تقلّي توّا هاذا الكلّ علاش؟؟؟

على خاطر فمّا صحفيّة تخدم في تونيسكوب، خدمت خدمتها بكلّ أمانة و كتبت الّي المسرحيّة هاذي متوسّطة (و هي كيف ما قالوا الناس الكل بالإجماع، تتسمّى جاملتهم كيف قالت متوسطة)

و الّي يزيد يخرّج البشر من سينتو: هو أنّو المسؤولين في الجريدة (الّي حسب المظهر الخارجي ينتميوا لجنس الرّجال) كانوا حاضرين .....

الطفلة مسكينة حطّت مخّ راسها بالبكاء، و هي ترعش خايفة، و سعدها مكبوب...، و سي الرّجّال مولى الجريدة (و الا المسؤول و الا ما نعرفش شكون عندو المقص في تونيسكوب)، يمشي ينحّي المقال من الموقع!!! (اللهمّ بالزّهر يطلعشي تفسّخ وحدو) و هاذا شيء مفهوم على خاطرالمنتج متاع الخرية الّي هو ألكازار، يتعامل مع تونيسكوب.

تي أما أنا معاملات، و أنا بارتوناريا لعزيز؟؟؟ حتّى طرف همّة الزّح ما تكسابهاش؟

معناها كاينّو دخلّك مجرم لدارك، باش يستفعل في بنتك، و انت حلّيتلو الباب و قتلو: برّا خويا ريقل أمورك هاني الفوق

يا بوها، كان تحبّ تعمل الصحافة، يلزمك تدافع على مواقفك و على آرائك و خاصّة على الصحفيّين الّي يخدموا معاك... موش تخلّيهم هكّاكا يتبهذلوا و يتمرمدوا و انت تكمّل على مرمّتهم و تكسّرلهم شوكتهم.

الصحافي يا معلّم، سلاحو كلمتو و قلمو... كان تجي تنحّيهملو قدّام الّي يسوى و الّي ما يسواش، آش قعد فيها؟

و الاّ برّا أخطاك من كلمة "صحافة" و حلّ بيرو متاع إشهار و "كوم" و انت مرتاح... علاش هكّا بنات الناس؟

هاذي حاجة.... أما مازال الخير:

سي عاطف بن حسين، الممثل "الهنداوي" المشهور، و بصيفتو أستاذ متاع مسرح في "التياترو ستوديو"، تقرى عندو طفلة إسمها هدى (إسم مستعار بالطبيعة). للاّ هدى، تعمل هكّا و ترتكب جريمة لا تغتفر: تهبّط فقرة على الفايسبوك تقول فيها الّي المسرحيّة ما عجبتهاش.... و ياااااااا وليدي!!!!

اي ماو ولاّ عياط و زياط و تربريب... و الراجل يحبّ يطرّد الطفلة من الورشة متاعو....

حاسيلو ملاّ مستوى متاع ممثلين و متاع جرايد... كنّا عاطين فيها طرف ضوّ هالـ" تونيسكوب " ياخي طلعت كي المالطي كي سيدو

صحّة ليكم يا "هنداويّين"، جيتو في بلاد خاطيتها الصحافة، و جيتو مع عباد خاطيتهم الهمّة

ملاحظة:

وقعت بعض التغييرات على البوست، لأسباب فنّيّة

Les secrets (الدواحة) : nouveau caca du cinéma tunisien

2009-12-07T19:11:00.003+01:00

J’ai cru que le film n’allait jamais se terminer…

Le film est plein de bonnes intentions, certes, mais comme plein d’autres le résultat final est nul à chier !

Toute l’histoire se déroule dans un décor lugubre d’une villa délabrée et abandonnée.

Une femme et ses deux filles mènent une vie abracadabrante, qui ne peut appartenir à aucun âge ni à aucune société. Les évènements se suivent sans cohérence aucune, mais surtout deviennent de plus en plus loufoques et insensés: les trois nénettes vivent cloitrées dans un sous-sol crasseux qui ne conviendrait même pas à un rat, ensuite le gars vient vivre dans la maison du dessus, dégoutante, sale, sordide et s’y installe avec sa copine, organise des soirées, etc… comme si ne rien n’était.

Les trois femmes kidnappent la copine du gars (qui lui, va illico se taper une autre sans se poser de questions, ou alors très peu)

La femme kidnappée essaie de s’enfuir une ou deux fois, ensuite elle commence à vivre comme eux, s’essuie le visage tranquillement avec leur serviette sale, apprend à tricoter avec l’ainée, joue avec la benjamine, etc… Elle, l’étudiante qui est supposée être en stage et qui s’enfuit avec son copain, quand elle se trouve dans une situation pareille, elle s’adapte et vit sa nouvelle vie sans se faire trop de soucis !!!

Ensuite tout s’emmêle : plaisirs secrets, violences soudaines, inceste, infanticide, matricide, fratricide…, tout ça à la fois !!!

Trop d’évènements mal racontés et qui finissent par ennuyer le spectateur. D’ailleurs ça s’entendait dans la salle (qui était pleine à craquer) que vers la fin tout le monde s’emmerdait à mourir et se mettait à raconter des blagues, discuter, sortir, envoyer des sms, ou faire toute autre chose, sauf regarder le film.

Evidemment, comme tous ses précédents, ce film n’a pas manqué de présenter les trois ingrédients nécessaires à tout bon film tunisien : un gros mot (à savoir : قحبة), une scène de sexe et une femme nue dans son bain (l’innovation cette fois est que la jeune femme est super siliconée)

Un autre point très important et non moins énervant : l’actrice qui a le rôle principal (Hafsia Herzi) NE SAIT PAS PARLER EN ARABE !!! elle lance son texte comme elle peut, elle prononce les mots d’une manière bizarre, avec un accent à la limite du ridicule.

Le plus exaspérant dans l’histoire est que tout son texte tiendrait dans une seule page !!!! c’est vrai que c’est une bonne actrice, mais ils auraient pu prendre le temps de lui apprendre de bien prononcer ces deux mots qu’elle a à dire !!!

Une autre déception du cinéma tunisien…

Je ne sais pas quand est-ce que ces réalisateurs comprendront qu’il ne suffit pas d’avoir de bonnes idées pour faire un film.

Je l’ai déjà dit (ici) et je le redis encore une fois : brabbi, brabbi, brabbi, quand une idée de film vous frôle l’esprit… ; communiquez-la à une personne qui sache faire des films !!! Ne vous inquiétez pas, votre nom sera en gras sur l’affiche, mais faites uniquement ce que vous savez faire, et laissez le reste pour ceux qui le maîtrisent.

Au secours les Bouzid, Zran, Boughdir, et cie… le cinéma que vous avez tant soigné est de nouveau malade !

... حكايات قديمة

2009-12-03T22:03:00.004+01:00

فمّا حكايات قديمة، فمّا أيّامات ما يتعاودوش ديما، أيّامات قصار، أما ليهم في القلب قيمة.

صحيح فيهم الفالصو و فيهم البريمة، و فيهم الّي تحسّ روحك مجنّح و فيهم الّي تتحبس على كليمة. أما رغم المرارة و العزارة و سوء الدبارة، كيف تتفكّرهم، وجهك يصوّر تبسيمة و تقول: عالأقلّ العمر ما مشاش خسارة.

أما تعرف.... الأيام فيسع يدورو و كيما فيهم الغالي، فيهم الّي بو دورو، تنسى معاهم الوجيعة و الدمعات الّي كانو في اللّيل يثورو، و تقول: الّي باعك بالفول بيعو بقشورو، أما... ما تنجّمش

ما تنجّمش على خاطر فمّا حاجات ياسر قويّة، لا يفهمهم عرّاف و لا طبيب قاري في الكلّيّة. حاجات... حاجات كيما ضحكة على حكاية ذهبيّة: من داخل يمكن قبيحة و فيها برشا عوج في النيّة أما كي تثبّت مليح، تلقاها صافية نظيفة و نقيّة... و الاّ كيما دولاشة بين زناقي الكتب و الكلمات المنسيّة، و قتلّي تمسح الغبرة على عنوان فوق ورقة مرميّة، تسمع ضحكتو و تحرقك غزرتو و يقلّك: ما تحقرنيش، أقرب بحذايا شويّة، مازال عندي ما نحكي، توحّشتكم...، عنّقني بيدّك القويّة.
و الاّ كيف تدخل لظلام المدينة و تاقف قدّام تصويرة و الاّ تحت صبّاط وقت الشتاء (المطر) الغزيرة و تسأل روحك بين يقين و حيرة... "كيفاش انّجّم ننسى؟"

ما تنجّمش زادا على خاطر وقتلّي يحضر العيب، و يتقالّك كلام للهمّ يجيب... كلام يفسّخ الضحكة و يزرع البكاء و النحيب و يخلّيك تقول: يا عالي ماصاب أجلي قريب. وقتها تحسّ روحك عليل و تشوف راسك نبت فيه الشّيب، من صاحب عطيتو جنبك و طلعلك غدّار خدّاع كيف الذيب... أما بعد ما تهزّ و تحطّ و تخلّي الفكرة تطيب، تعرف الّي ماهو إلاّ بشر، و البشر بالطبيعة يخطا و يصيب، و تقول نعرف الّي العقل يحضر و يغيب و خلّي عالأقلّ قلبي صافي، أبيض كيف لون الحليب.

أما تعرف الّي فمّا فرق و الّي الناس الكل موش كيف كيف...، فرق بين الّي بايت وحدو و الّي معنّق الحبيب، بين الّي بجنبو أمّو و بين الّي تربّي ربيب، بين الّي بوه يكنس و بين الّي بوه طبيب، بين الّي العالم بلادو و بين الّي في بلادو غريب، بين الّي عامو بلاطة و بين الّي عامو خصيب، و بين الّي بايت شبعان و بين الّي صغارو بالشّر و هو يدعي يا ربّي يا منيب

عيدكم مبروك...، لكن ما ننساوهمش

2009-11-27T08:19:00.002+01:00

وقتلّي تحطّ صحن اللّحم و الكبدة قدّامك، خمّم فيهم حتّى دقيقة من زمان قبل ما تبدى تاكل

و ان شاء الله عيدكم مبروك

زعمة علاش هزّينا كاس افريقيا؟؟؟

2009-11-08T22:15:00.004+01:00

بربّي منتخب 1978 متاع الأرجنتين كيف عمل حاجة في كاس العالم،... زعمة كان من فضل بورقيبة زادا؟؟؟ و الاّ الملاعبيّة كوّرو و تكتكو و جابوها بساقيهم و أكاهو؟

سؤال و برّا، على خاطر ما نثبتش مليح وقتها... و زيد كيف نشوف قناة 7 تحكي على "الأسباب" الّي خلاّتنا نهزّوا كاس افريقيا 2004، نولّي نشكّ

الحرّية لك يا فاطمة

2009-11-07T01:15:00.006+01:00

يا ابن الوطن الظالم

يا من أراقت دُموعَنا مساوِئُهْ

يا من هانت عليه دمائنا

و يا من غُرست في ظهورنا مخالِبُهْ

ذلك الذي جهل أنّ مطالبنا

تطاله و كما تساعدنا تساعِدُهْ

يعادي برصاصه أحلامنا

و تهدم مطامحنا أصابِعُهْ

يطال مجالسنا و يكبّل أجسادنا

أمّا إذا ابتاعنا الحرّية فلا نساومُهْ

لن يكسر بالعصا أقلامنا

حتّى و إن كلّت من الضّرب مفاصِلُهْ

و لن يجفّف بالقهر دمائنا

فلسنا بحياة الذلّ نبادِلُهْ

بأصواتنا نعلى على سجونكم

كما تعلو على الحقل سنابِلُهْ

قضبانكم وسام على صدورنا

و خزي على جبينكم، تعايِرُهْ

لفاطمة شرف مظالمكم

و لكم قذارة التاريخ و مزابِلُهْ

فبقلمها تخاطب الكون

و بأعلى صوتها تجاهِرُهْ

في حين تسلكون أحلك أزقـّته

أين نبرات ذلّكم تهامِسُهْ

الحرّية لك يا غاليتنا

فقاع النّفق سوف يبان آخِرُهْ

درب الحياة لنا يا غالية

أماّ جلاّدك فحتما هاجِرُهْ

الحرّية لك يا غاليتي

فالحقّ لا محالة غالِبُهُ

فلا خاب من عاش حرّا

و لا ظلّ عن الحقّ آمِلُهْ

FREE FATTOUMA....

2009-11-06T08:04:00.002+01:00

كلب مات في زبّالة

2009-10-17T11:03:00.007+01:00

معمل طاح على راس الخدّامة الّي تكلت على سعدها الّراقد... 10 موتى، عايلات تيتّمت و مئات العباد تقطعتلها خبزتها...؛

ـ 45 ثانية في الأخبار، كلمة لا في "لابراس"، 8 أسطرة في "لوطون"، و اڤلب... كلب مات في زبّالة

الفيضانات هزّت شطر الرّديّف رحّلتها، كيف كيف: عايلات تيتّمت و عشرات الموتى والّي تحت الأرض أكثر ملّي فوقها، و كيف كيف زادا... كلمتين و قصّ في الجريدة، 30 ثانية في الأخبار (و بعدهم درجين عالفيضانات في البرازيل و أستراليا) و أكاهو

أما هاك الطّحّانة الّي يزويوا مالصباح و يصفّقوا على كلام ماهم فاهمين من أمّو حنّى كعبة...، آه لا هاذوكم نخصّصولهم نصّ ساعة كاملة و هوما يتهزّوا و يتنفضوا قدّام الكاميرا و يساندوا و يثمّنوا و يرفعوا في التّحدّيات (و في حاجات أخرين زادا)؛

معناها آما تلبس لبسة الطحين و تمسح وجهك بخرية قبل ما تخرج الصباح مالدار و تهبّط السّروال و تمارس التّلحيس الأعمى من غير ادّخار أيّ جهد، و الاّ راك ما عندك حتّى قيمة عند حتّى حدّ: لا دولة و لا صحافة و لا حتّى شيء

و من بعد يقولوا شبيهم التوانسة يحرقوا؟؟؟

يحرقوا على خاطر يحشموا من جنسيّتهم و من دولتهم و من سمعتهم و من لون بطاقة تعريفهم..... لون الكارت سيجور أقرب لإنسانيّتهم

في بيرسا: معلّم يكسر يد تلميذته لـ"تأديبها"...؟؟؟

2009-10-04T20:40:00.003+01:00

من غير تقديم و لا صياغة لغويّة و لا تركيب للنّص و لا شيء:

المعلّم هاذا إسمو "الصّادق الغمري" و يقرّي في المدرسة الإبتدائيّة متاع قرطاج بيرسا. تقرى عندو تلميذة إسمها إيناس.

كيف ما التّلامذة الكلّ، إيناس شوّشت في القسم، و الاّ يمكن ما تبّعتش مليح الدّرس و الاّ حاجة هكّا، و كيف ما المعلّمين الكلّ، سي الصّادق هاذا يلزمو يعاقبها.

ياخي سي الصّادق باش يعاقبها، آش عمل؟

نزل على الطّفلة بعصا حتّى كسّرلها يدّها !!!

إي نعم!...، كسّرلها يدّها، و شويّة لا سقّطها. على خاطر حسب ما قال الطّبيب: كيف ضربها، فمّا عظم تقلب و كان ينجّم يمسّ علبة إذا تضرّت صعيب باش ترجع كيف ما كانت.

(صورة للمعلّم المتوحّش، وقتلّي كان يقرّي فيّ عام 88)

كيف سإلت عايلتها شكيتو و الاّ لا، قالولي: لا، فكّ علينا مالمشاكل، و زيد مرتو جات تطلب في السّماح، الخ...

الحقّ، شدّيت صحيح باش يشكيوا، و ياخذوا حقّ بنتهم و حقّ الصّغار الكلّ الّي يمكن من بعدها هي ينجّمو يتضرّو كيفها و الاّ يمكن أكثر منها...، قالولي لا، شيء، أخطانا مالشّوَه و تو تبرى البنيّة و لاباس.

أما السّؤال الّي مهبّلني: توّا كيف عايلتها ناس ملاح ياسر و حشموا باش يشكيوا، و الاّ خافوا و الاّ الله أعلم،

المدرسة الّي عندها وجوب حماية التّلامذة الّي في وسطها، فيني وقتلّي معلّم يعتدي على تلميذة بالطّريقة هاذي؟

يلزمنا نقعدو نستنّاو حتّى لين معلّم يقتل تلميذ و الاّ يخرّجلو عينو و الاّ يخلّيه على كرسي باش نردّو الفعل؟

و الطّبيب الّي عملّلها الجّبيرة فينو؟ ما يلزموش يعلم السّلطات وقتلّي تجيه بنيّة صغيرة يدّها مقسومة في ثنين بسبب المعلّم متاعها؟

ياخي المعلّم دَوْرو باش يربّي الصّغار و الاّ باش يقسملهم عظامهم؟

و شنوّا ها المعلّم هاذا الّي يهبط بكلّ قوّتو على تلميذة صغيرة حتّى لين يكسّرلها كرايمها؟ شنيّة تركيبتو النّفسانيّة؟ باش ينجّم يحسّ وقتلّي يلقى روحو قدّام بنيّة طولها ميترو و عشرة باش يوصل يعتدي عليها بالطّريقة هاذيكا؟

الحقيقة شيء يخرّج البشر من سينتو... إلى متى باش نقعدو ساكتين على الوحشيّة الّي تتمارس ضدّ الأطفال و أحنا ساكتين؟

السّؤال يقعد مطروح...!!!؟؟

الحُمصة تنحّي الحَمصة، و موسى يقعد حياتو كاملة ما يولّيش حاج

2009-09-22T21:29:00.004+01:00

في تعليق على البوست الإخراني، قالتلي أمال: "شي يأسف!! و يحبونا ننتخبوا؟!! بالله شكون بش ننتخبوا بعدلّي موسى الحاج... حاج موسى"

لا يا للاّ.... أنا نقول لا...، انّجمو ننتخبوا، علاش لا؟

يا خويا ماو أحنا نمشيو ننتخبو موسى...، و بالطبيعة ماهوش باش ينجح، على خاطر باش ينجح الحاج

و هاذا بالطبيعة شيء نعرفوه، على خاطر الحاج أكبر عمر و قدر و موش باش يجي موسى، ببّوش بو مصّة، باش ينحّي بلاصة الحاج... عيب!

و هو لا محالة كيف ما قالت آمال، موسى الحاج و الحاج موسى كيف كيف،.... تي أما.... تي الحاج بيدو يمشي و يوصّي عالإنتخابات... و تحبّنا ما ناخذوش بخاطر الحاج؟

أما أحنا أهوكا زعما زعما في بالنا الّي موسى و الحاج ماهمش فرد لون، و الّي موسى موسى و الحاج الحاج...، و قمنا بواجبنا و انتخبنا موسى، و نهار الأحد العشيّة نتغشّشوا زعما هكّة، و نعملوا فيلم قال شنوّا الدّيمقراطيّة ما اتطّبقتش مليح...، أما هي في الحقيقة اتطّبّقت!!!

اتطّبقت على 2 و الاّ يمكن حتّى على 4، و حطّها الحاج في مكتوب البدعيّة متاعو...

و بالطبيعة الكلّنا في بالنا في أنا مكتوب محطوطة الدّيمقراطيّة

أما شكون ها الّي بڤلبو و يقرّب يدّو للبدعيّة متاع الحاج؟ هاذا موش موسى و الاّ ثنين... على خاطر بدعيّة الحاج بكلّها امّاس... و ماضين زادا، آش لزّ حمّة يغنّي يا خويا؟ (آه، سامحوني... موسى موش حمّة، على خاطر حمّة عندو مدّة ماعادش ينجّم يغنّي)

حاسيلو...

هو لا محالة بكلّنا طامعين باش في تطبيسة مالتّطبيسات الحاج يطيّح هاك الدّيمقراطيّة من مكتوبو، على خاطر على ماهو يطبّق فيها (كلّ مرّة، هكّا يخرّجها من مكتوبو في اللّيل، يطبّقها مرّة و الاّ مرّتين و يرجّعها) ما قعد فيها شيء، ولاّت قدّ الحُمصة و تنجّم تطيح في كلّ وقت على غير رادة

قلت حُمصة أراهو، موش حَمصة...، حُمصة بضَمّ الحاء! أيوااااه!!!... ما تقوّلونيش في شيء قلتوش

على خاطر الحَمصة شيئ مخطر ياسر و يمكن ياسر تولّي مرض... موش معدي برشة لا محالة، أما ينجّم يتنـقّل

أما الباهي في الحَمصة، الّي وقتلّي تمشي لواحد، تتنحّى من عند غيرو... آآآآه امّالا؟؟؟

علاش قتلتكم الّي الحَمصة مخطرة؟

هي بيناتنا توّا الحَمصة ما جاتش للحاج، اللّطف عليه...، و لا لموسى زادا (هاذاكا ينجّم يعيش 400 سنا و ما تجيهش الحَمصة...، قلبو ماكلو و خاريه من هاك العام)

على خاطر الحَمصة توّا تعرفوها عند شكون؟؟؟؟

هاهاهاهاها..... هاذاكا هوّ!

الحَمصة توّا عندها مدّة راكزة عند حمّة!!!.... علاش هو ماعادش ينجّم يغنّي؟

أما دواه ساهل أراهو... ساهل ياسر!

دواه هي هاك الحُمصة الّي في محتوب الحاج!!!!

ههههههههههه... شفتو كيفاش؟

معناها مختصر الحديث: الحُمصة تنحّي الحَمصة، و موسى يقعد حياتو كاملة ما يولّيش حاج

!!!... هاي المعارضة و الاّ لوّح

2009-09-20T20:30:00.004+01:00

هاي المعارضة الرّسمي، الصّحيحة، متاع الرّجال قلوب الجمال، الصّناديد، الشّجعان... الّي يعرفوا آش يحبّوا و الّي يتحمّلوا مسؤوليّة أفكارهم و الّي كيف عندهم ما يقولوا يعبّروا بكلّ شجاعة على آرائهم و على وجهات النّظر متاعهم!!!!

أقراوا سيادكم كيفاش يدافعوا بكلّ رباطة جأش و بسالة و جسارة على الدّيمقراطيّة و على مكاسب البلاد

شفتوا ماو؟؟؟

و النّاس تهزّ و تنفض، و تكتب، و قال شنوّة نضال و لاعبينها عمّ الصّيد، و ريسك متاع حبوسات و فيسك و محاكم و كذا....

تي شبيكم يا ناس؟؟؟ فيقوا!!!

من هنا فصاعدا، الّي يحبّ يعارض، يتبّع عمّو اسماعيل و يتفكّرني.... توْ تشوفوا كيفاش تحلّ في وجهو.... كلمة من عند ولد بيرسا

هنيئا لنا بعيدنا... و تبّا لهم بكفرهم

2009-09-20T09:45:00.003+01:00

في حين تفيض قماماتنا ببقايا الغلال و خيرات البرّ و البحر، و في حين تنتفخ بطوننا ممّا وضع فيها من حلويّات و مشروبات، و في حين تمتلأ رؤوسنا كذبا ممّا رويَ لنا من أساطير العبادة و تقليد أفعال الرّسول، و في حين نهيم نشوة بكوننا أحسن و أذكى و أطيب من أنجبت الأرض،.... يتخلّى الكفّار عن طباعهم الشّنيعة الّتي ذكرت في كتبنا و يجوبون العالم بحثا عمّن أدارت لهم الحياة ظهرها و غمرهم النّسيان.....

فعيدا سعيدا يا إخوتي المسلمين....

ففي حين يسلب بعضنا الحياة من مالكيها بإسم ديننا...، هناك منهم من يعيدها لأهاليها طوعا و مجّانا

هنيئا لنا بعيدنا... و هنيئا لنا بديننا... و تبّا لهم بكفرهم

PS vs RCD... c'est qui le plus moche???!!!!

2009-09-17T10:58:00.007+01:00

Les français sont dépités (voir ici) à cause de la mocheté du site "Désirs d'avenir" créé par Ségolène Royal pour son association qui porte le même nom.

Ce site qui, évidemment, a beaucoup plus à voir avec la politique et son appétit insatiable pour le pouvoir qu'avec toute autre idée associative ou sociale.

Je ne sais par quel moyen tordu, mon esprit zinzin et siphonné avait fait le lien avec notre cher site national, qui porte les mêmes couleurs, certes..., mais qui, au moins, n'a pas la malhonnêteté de se dissimuler derrière le masque d'une quelconque association.

Par contre, coté esthétique!!! le site de Royal est une véritable œuvre d'art à coté de ça:

Les votes sont déclarés ouverts!!!

:-D

غزالة الصّحراء... غزالة الشّجرة

2009-09-14T14:54:00.004+01:00

أهبط... ردّ بالك تزلق

حياتي كاملة نخالط في القطاطس...، نعرف كيفاش نطيح

أما انت ماكش قطّوسة... انت غزالة كيفنا...، و بلاصتك هوني، بحذانا، في الصّحراء

زيني هاذا الكلّ متاع صحاري؟ هاني خلّيتهالكم، توسّعوا فيها...

هي مازالت ما كمّلتش كلامها و يتكسّر بيها العرف... طاحت ما في عينها بلّة
حدّ ما حبّ يعطيها الدّم.....، ساعة و نصّ بعد، صاحب الأمانة هزّ أمانتو

حتّى قطّوس ما جاء للدفينة ...الغزلان ردّو عليها اللّحود في طرف الصّحراء و روّحوا

العام الأوّل قعدت أمّها ساعة ساعة تتفكّرها و تهبّط دمعة و الاّ ثنين.... و من بعد، حدّ ما عاد يتفكّر هاك الغزالة الّي.... طاحت من فوق الشّجرة

موش كان الواحد يولّي يحكي معاه كان هو خير؟

2009-09-01T14:31:00.005+01:00

تنبيه: الّي يعرف روحو يتشوكى (يتصدم) من الإيحاءات الجنسيّة و الّي روح الدّعابة متاعو ما تسمحلوش باش يدوس على القيم النّبيلة متاعنا، موش لازم يحلّ البوست هاذا

و من أنذر فقد أعذر(كيف ما يقولوا العدول المفّذين)
------------------------------------------

باهي.... أما توّا كيف جيت نخمّم، قلت و اللّه السّيّد "رادني" هاذا عندو الحقّ...

كيف تشوف العباد كيفاش ولاّت تحكي، و تشوف مستوى النّقاشات الّي قاعدة تدور، تقول حلال الواحد يدور يحكي معاه هو خير.... يمكن يفهمني أكثر من بعض العباد

و تحيا بلادنا، بلاد التّرح الدّائم...؛

تدوينة بيضاء... هكّاكا، وحدي

2009-08-29T09:28:00.009+01:00

على خاطرني مازلت نغلي على ميات ألف حاجة في البلاد...

على خاطر ما نسيتش أهالي الحوض المنجمي...

على خاطر اليوم التّاريخي متاع 26 أوت 2009 ما تعدّاليش حتّى لتوّا...

على خاطر عمّار مازال خاري علينا و أحنا نتفرّجوا...

على خاطر حرّيّات البشر في بلادنا ما قعد من جدّ بوهم شيء...

على خاطر هاذا الكلّ، اليوم قرّرت باش نعمل تدوينة بيضاء وحدي... هكّاكا، كي المهبول

تدوينة بيضاء (أو شبه بيضاء)... ماني باش نقول فيها شيء، أما ألف في الميا كلّ شيء باش يتفهم

توريست: مرحبا.... عربي: حنك الباب! ممنوع

2009-08-28T08:39:00.009+01:00

بحكم خدمتي الّي تستوجب أنّي نتنقّل برشا، قمت نهار الاربعاء الصباح، على أساس باش نمشي لمدنين و نرجع (معناها باش نعمل حكاية 1000 كيلومتر فرد نهار)

خرجت السبعة متاع الصباح مالدار و شدّيت الثنيّة: طرف موسيقى باهية...، و الأوتوروت

خلطت لصفاقس، حسّيت بروحي ترهوجت شويّا و مانيش ياسر في فورمة...
تكّيت في البيياج، عملت نصيّف ساعة نوم و قمت. قلت توّا واحد يعمل قهيوة و يكمّل.

قعدت نثبّت فمّاش قهوة محلولة... بالطبيعة لا... و كان باش ندخل نفركس على وتيل باش نضيّع برشا وقت...

كيف خلطت للمحرس، بعد البلاد نشوف في كيران التوريست واقفين، و أبناء عيسى يشربو في الڤازوز و ياكلو في الڤلاس (هاذي نقطة تو نرجعلها مرّة أخرى، على خاطر الطريقة الي هوما يشربو بيها في الڤازوز و الّي ياكلو بيها في الڤلاس عمري ما ريتها...، حتّى في أفلام الرّعب) حاسيلو...

أيّا قلت سلكت...

دخلت للقهوة: السّلام، السّلام

خويا باللاّهي قهوة

غزر لصاحبو... شفتو جاوبو براسو معناها: لا

قالّي: لا خويا، قهوة لا

شنوّة لا؟ علاش لا؟

قالّي: ڤيد انت؟ تابع التّوريست؟

قتلو: لا خويا، مانيش تابع التّوريست... تابعك انت، تونسي كيفي كيفك

قالّي: سامحني خويا، قهاوي للعرب لا

خرجت.....

100 ميترو بعد، فمّا قهوة أخرى (لاصقة منطقة الحرس) كيف كيف، تفغّم بالتوريست. وقّفت الكرهبة و هبطت

السّلام، السّلام... خويا قهوة

قعد يغزرلي شويّا، و من بعد دار للماكينة باش يعمل القهوة. جاه صاحبو يجري، درا آش وتوتلو، و تلفّتو شيرة الباب و من بعد جاوني يغزرولي بكلّ أسف

قالّي: سامحني صاحبي، ممنوع

ممنوع؟؟؟

قالّي: ممنوع منعا باتّا باش نسربيو قهاوي للعرب... منبّهين علينا، الّي يبيع لواحد عربي يتحمّل مسؤوليتو

ملاّ حكاية!!! باهي و دبّوزة ماء؟ ممنوع زادا و الاّ مسموح؟

قالّي: شيء.... الله غالب. ماذابيّا أنا نبيعلك و نخدم على روحي، أما و راس خويا لا انّجّم

معناها توّا أنا قايم السّتّة متاع الصباح، عامل يجي 300 كيلومتر، و مازلت باش نعمل 700 أخرين، و ممنوع عليّ باش نشرب قهوة نحلّ بيها عينيّ، في قهوة محلولة و تخدم، و تسربي في التّوريست في بلادي و أنا نتفرّج؟؟؟

قالّي: الله غالب

قتلو خويا ربّي يعينكم، و خرجت

و أنا خارج (و وقتها فهمت علاش هوما تلفّتو للباب) نلقى واحد حرس هاكلّي زعما زعما سيفيل، شادد جنب الباب و يڤردحلي، و قعد يتبّع فيّ بعينيه حتّى لين شقّيت الكاياس و ركبت في الكرهبة و مشيت.

ممنوع جديد تزاد للممنوعات الّي نعرفهم الكلّ: ان شاء الله بالعمار و طول العمر في بلاد الفرح الدّائم

أما زعما توّا كان الواحد يمشيلهم لبلادهم هاك التوريست... فمّاشي حتّى ربع امكانيّة باش تلقى روحك متمتّع بحاجة ممنوعة عليهم هوما؟؟؟

و أحنا حتّى شربة الماء ممنوعة علينا في بلادنا

.... عمّ محمد صبح عازقو

2009-08-24T14:07:00.006+01:00

صحّة شريبتك عمّ محمّد

صحّة شريبتك ولدي

أيّا تفضّل أقعد

لا لا باش نعمل كاس تاي بالواقفة و ماشي

شبيك لا باس؟ شبيك عارق و سوريتك محلولة و كذا؟

تي ماو المرا داختلي مع شقّان الفطر...

أه؟ لا باس؟؟؟

إي، هي دوب ما هزّت مغرفة الشربة باش تحطّها في فمّها، و هي طاحت عالطاولة. رصّاتلي في صبيطار خير الدّين، و تحاليل و سيروم... ولّيت خلّيت بخذاها الولد في الصبيطار و هاني ماشي نجيبلها طرف حوايج و كرني الدواء مالدار

آآآه... و آش قالّك الطّبيب؟ آش عندها؟

براس بوك آش باش يطلع عندها؟ ماو مالصيام... مالصباح و هي تكلت في الكوجينة، و الدنيا شاعلة فيها النار، و هي صايمة، أكاهو... طاحلها السكر و الاّ الدم و الاّ ما نعرفش على بوها آش طاحلها جات ما في عينها بلّة

أيّا ان شاء الله لاباس امّالا عمّ محمّد

عيش ولدي، يعيّشك....،
........................،
بفففففففففف......، لا لا ما عادش صايم أنا... آش الهمّ هاذا؟

وسّع بالك عمّ محمّد، تو فيسع تصحّ المادام و ترجع للدار

أيوااااه !!! يعيّش ولدي.....، لا عمّ محمّد، لا عمّ السّما... قتلك ما عادش صايم معناها ما عادش صايم.

و حتّى حدّ لا عاد باش يصوملي في الدّار زادا، لا المرا لا الولاد... الواحد باش يولّي يلعب بصحّتو زادا؟ لا و الله حلو...

أيّا خلّي نمشي توّا، نشوف ها المصيبة الّي عندي... شدّ خلّص القهواجي يعيش ولدي ما عادش وقت

باهي برّا على روحك عمّ محمّد، و سلّم على خالتي عيشة، قلّها قالّك ولد بيرسا ان شاء الله لاباس

يبلغ...

صوت من تالي: استغفر الله يا ربّي...، عمّ محمّد جهِل فرد جهلة

صوت آخر من تالي: و الاّ يمكن توّا مازال فين رجعلو مخّو... الله أعلم

ـــــــــــــــــــــــــــــــــــــــــــــــــــــــــــــــــــــــــــــــــ

قصّة حقيقيّة وقعت البارح في اللّيل....،

عمّ محمّد صبح عازقو اليوم،

خالتي عيشة مازالت في الصبيطار...، قالو تخرج اليوم

Casse-toi "PAUVRE" con...

2009-08-19T03:21:00.006+01:00

AH NON ???

C’est toi ? C’est bien toi ? Le pauvre ???

Mais qu’est ce que tu fais ici ?

Ignores-tu donc que c’est la place des riches ici ?

Ne me dis pas que tu as perdu to chemin…, ce n’est pas ton genre quand même !

Qu’est ce que tu veux prouver ?

Que tu veux nous ressembler ? Que tu veux être comme moi ? Moi le riche ???

Mais tu sais bien que c’est impossible, espèce de petit ridicule !!!

Tu sais bien que, quoi que tu fasses, tu ne m’arriveras jamais à la cheville !!!

Parce-que tu vois, toi « le pauvre »…, tu n’as aucun moyen de te mesurer à moi, de te comparer à ton Sidi, de te hisser au rang des « grands » auquel j’appartiens…

Tiens ! Je vais te donner un petit exemple :

Tes livres à la con que tu tiens sous ton bras là ??? Tu en es fier, non ?

Avoue que tu en es fier ! Tu crois que ça va te donner de la valeur et de l’estime !

Hahahaha, quel con !!!

Eh bien moi cher ami…, tes livres je m’en fiche ! Je m’en contrebalance ! Il me suffit de payer le prix et j’aurai le diplôme que je veux… tu sais bien comment j’ai obtenu mon diplôme de pilote d’avion : ça c’est du grand art !!!..... : six mois de stage aux states, 40 mille dinars, et hop ! Le diplôme est dans la poche.

Et mon master de finances, management, logistique, GRH, gestion, stratégie, machin, etc… ?

Il m’a couté à peine quelques liasses de billets verts et quelques mois de « غُربة » à Los Angeles !!!

C’est de l’insensé pour toi tout ça, je le sais. Je sais que tu ne peux pas comprendre.

Mais tu vois, si tu avais compris, tu ne serais pas là maintenant à me gâcher la vue.

Pour toi, mon ami « le pauvre »…, regarder un documentaire sur Les Seychelles ou regarder Star Wars, c’est la même chose ! Ça te fait passer les mêmes émotions, c’est du rêve, de la science fiction…, c’est de l’impossible tout simplement !

Pour moi, ces destinations dont tu n’oses même pas rêver, je les connais toutes. Ça ne dépend que de moi si je veux y aller ou pas. Que de Moi…

Hahaha…. Oui, je vois bien tes yeux qui commencent à briller et ta bouche qui commence à trembloter…, tu as les larmes aux yeux espèce de petit envieux !!!

Tu es jaloux, non ? Avoue ! Tu es jaloux Ducon…, tu m’envies n’est-ce pas ?

Tu es jaloux de toutes ces filles qui papillonnent autour de moi sans que je bouge le petit doigt.

Elles sont belles, oui je sais. D’ailleurs je peux même dire qu’elles sont les plus belles.

Elles s’arrachent la place qui est juste à coté de moi, elles s’entre-déchirent, elles se font des coups bas pour obtenir mes faveurs…., alors que toi… !!!!

Tu en es où de tout ça toi ?

Toi, tu es obligé d’apprendre par cœur toutes le blagues du monde pour essayer d’en attirer quelques unes…, tu passes des nuits et des jours à essayer d’apprendre comment approcher telle ou telle fille, tu apprends toutes les mimiques possibles et imaginables, و مڤطّع روحك comme on dit chez vous pour essayer de conquérir même la plus moche d’entre elles… alors que moi, Ducon, il me suffit de raconter n’importe quelle blague pourrie pour qu’elle se plient de rire…, même en racontant l’histoire de "Paf le chien", elles me trouvent marrant…, des fois, même moi je ne comprends pas pourquoi elles rigolent, mais bon…, l’essentiel est que j’arrive à obtenir ce que je veux…, c'est-à-dire : ELLES !!!

Donc tu vois, « le pauvre »…, tu n’es pas le bienvenu ici !

Ici on n’accepte pas tout le monde… tu as beau croire en ton intelligence et en la justice d’un monde parfait, mais la réalité est toute autre cher ami… cette vie est la nôtre et tu n’as rien à faire là dedans.

Je te le dis donc, gentiment و من غير مطرود !!!

Casse-toi « PAUVRE » con !

في نطاق هجرة الأدمغة: طبيبي ڤطّع الرّباط

2009-07-22T18:47:00.004+01:00

أنا في الحقيقة الطّبيب متاعي عندي معاه علاقة خاصّة شويّة... من ناحية ولد حومة و صحاب و حباب و كذا. و من ناحية أخرى نزورو برشا...، خاصّة في الصّيف.

علاش...، على خاطر أنا مالنّاس الّي ناكل كلّ شيء، و خاصّة نشرب كلّ شيء...، لذا شيء طبيعي أنّي نمرض بكلّ شيء
هاذاكا علاش علاقتي معاه تبلورت، و ولّينا نتقابلو برشا و نحكيو برشا

(طبيبي هاذا، كيف 99 % من الطّبّة الخواصّ، لا باس عليه: زوز ديار بالبيسين، يسافر هو و عايلتو عالأقلّ مرّتين في العام، قاعة الإنتظار متاعو ما تفرغش... حاسيلو أمورو في الجبن)

الجمعة الّي فاتت، قابلتو في مطعم، وقفت نسلّم عليه: لاباس؟ شنحوالك؟ شنيّة الدّنيا؟

قالّي راني نهار الأربعاء طالع لكندا

أيّا باهي، و الله قلت الحقّ، برّا بدّل الجّو شويّا و تفرهد

قام يضحك... قالّي لا لا موش هكّا...، باش نهجّ

شنوّة باش تهج؟؟؟ تي يزّي بلا هدرة متاعك قالّي تهجّ

و الله كيف ما نحكيلك. أنا و المرا و الصّغار

عجب؟؟؟ معناها باش تهاجر جملة؟ و حياتك هوني، توّا 50 سنا؟

قالّي الدّيار و الكراهب بعتهم، المرضى فرّقتهم على الزّملاء و عندي أنا، هوني كلّ شيء وفى

و خدمتك؟ و صغارك؟ و عايلتك؟ و بلادك؟

قالّي هاذي بلاد يستحيل باش انّجّم نضمن فيها مستقبل أولادي و ما عادش قاعد فيها

قتلو: يا خويا آش باش نقلّك؟ ربّي معاك، سايس روحك و حظّ سعيد

قالّي و الله كان تعمل كيفي خيرلك

قتلو لا يعيّشك، أما أنا راني أنا عندي مشكل كبير: ها البلاد هاذي ما انّجّمش نبعد عليها... الله غالب... مبلي بيها، نحبّها
بخمجها، بمشاكلها، بهمّها، بميزيريتها، نحبّها

أيّا هيهيهي هاهاها، شاهية طيّبة، شاهية طيّبة...، نشوفوك...، الله يبارك، امّالا لا... و رجعت قعدت

قلت: الزّح، الرّاجل عايش في وضع يحسدوه عليه العباد، و ماشي هكّاكا للمجهول، علاش؟

و زيد أولادو صغار، في أوّل المراهقة، باش يتبدّل عليهم الجّوّ و يدخلو بعضهم والله أعلم كيفاش باش تولّي حالتهم...، معناها في أحسن الحالات تنجّم تقول نوفي و الاّ قرعة...، وقتلّي كانو لهنا 100% نوفي

رأي يحترم... ألف في الميا خمّم مليح قبل ما ياخذ القرار هاذا

موش ساهل باش الواحد يبدّل 50 سنا هكّاكا في لحظة، خاصّة من النّاحية الإجتماعيّة

خويا ربّي معاك، و هاو سطيّل ماء وراك... حتّى كان ماكش ناوي ترجع

!!! أزنافور طلع أصلو يهودي تونسي

2009-07-21T23:27:00.004+01:00

إي... شبيكم تغزرولي هكّا؟؟؟

أزنافور طلع أصلو يهودي تونسي... و بالأمارة المرا الّي كانت قاعدة بحذايا في القهوة تأكّد فيها و تعاود!!!!

دارت لصاحبتها، قالتلها:
عرفتو شكون الّي يغنّي اليوم في الفستيفال؟

إي، ماو هاك الّي داخلينلو بسبعين ألف و الاّ قدّاش... مشهور ياسر

أزنافور إسمو... أزنافـــور

هاذاكا هوّ

ماو يهودي تونسي

آآآه.... صارا؟؟؟

إي، امّالا! يهودي تونسي، آخر عمرو جاي زعما زعما يتفكّر في بلادو... منعولة تهزّو

هاهاهاهاهاها.... هيهيهيهيهيهي

محلاها ثقافتنا...، و محلاها بلادنا...، و محلاهم نسانا... و محلانا حاسيلو الكلّنا في قالب بعضنا قدّاشنا كي ×××× "بـيـيـيـيـيـيـيـيـب" ... آه سامحني...، زلقت، و الله موش بالعاني

Lettre publicitaire :-S رسالة إشهاريّة

2009-07-08T16:01:00.006+01:00

توّا كيف يجيك جواب هكّا، شنوّا تنجّم تخمّم؟؟؟

مع العلم الّي هاذا جواب اشهاري... معناها السّيّد الّي بعثو، كتبو في أحسن حالاتو النّفسيّة و الفكرية...، بحيث هو مقتنع شديد الإقتناع بالشيء الّي كتبو

معناها كان جاء متغشّش و الاّ موش في صحنو كيفاش يكتبو؟؟؟
_____________________

الجواب هاذا حلّيتو بعد ما كنت نحكي مع واحد، قالّي: القراية ماعادش يلزمها تكون بلاش... يلزم الواحد يولّي يخلّص على أولادو 60% من شهريتو باش يقرّيهم... يلزم نولّيوا كيف أمريكيا، كلّ شيء بالفلوس.

قلت، يا رسولاّه... جاء بربّي بلاش القراية...، امّالا كان تولّي بالفلوس؟؟؟

الفاتح من جويلية 2009... يوم المدوّن التّونسي ضدّ الحجب

2009-07-01T14:33:00.003+01:00

c'est magnifique التّعذيب في تونس؟؟؟

2009-07-01T11:51:00.008+01:00

الجمعة الّي فاتت تفاهمت أنا و واحد صاحبي باش نعملو قهوة في تونس.

أيّا خلطت قبلو، قعدت، حلّيت فنايكي، لبست مرايات شمس و قعدت نمارس في أهمّ جانب من جوانب هويّتي التّونسيّة: اللّهوة.

هاني رميت عين عاليمين... عين عاليسار... نشيّع هاذا بعينيّ حتّى لراس النّهج... نبتبت علّي قاعدين بجنبي فاش يحكيو (خاصّة كيف يبدى كوبل ظاهر جديد، و يبدى الطّفلّ يبصّ عالطّفلة، الّي يسمع يقول رمبو في زمانو...، أنا نعمل كيف)... حاسيلو...؛

و على ذكر اللّهوة بلّي قاعدين بجنبي، فمّا زوز رجال قاعدين، يعمل عمرهم في الأربعين و الاّ أكثر شويّة، ظاهرين مذخمين، لابسين بالڨدا هكّا، و ظهرولي يحكيو في حكاية مهمّة شويّة، على خاطر يوشوشو... كسّرت وذنيّ الحقّ...، علاش الكذب؟ و هاو الحديث الّي سمعتو بيناتهم:

دار الأوّل، قال: ياخي انت شنوّة خدمتك بالظّبط؟

متاع الموقوفينje supervise le transport قالّو: أنا

؟Tu supervises شنوّا

معناها نتفقّدهم قبل ما يطلعوا في الكماين، لا باس عليهم، ماهمش مضروبين، في صحّة جيّدة، الخ...

؟؟؟ تحكي بالرّسمي؟AH BON

Ah oui

ما تقلّيش ما عادش فمّا ضرب في تونس!!!؟؟؟

ما عادش برشا... كان البوليسيّة البهايم مازالو يضربو

علاش؟

شنوّا امّالا، تهزّ واحد للقاضي سنّتو مكسّرة و الاّ وجهو أزرق؟ تحبّ هاك المحامين المعارضين يقلبو عليك الدّنيا؟؟؟

تي إي، باهي... أما ماو لازم حتّى شويّة باش واحد يقرّ

لا لا يا راجل... ساعات يمكن هكّا، بوليس يتنرفز يعطي لواحد كفّ و الاّ زوز، أما فمّا طرق أخرى باش الواحد يقرّ

شنوما الطّرق الأخرى؟

!!! c’est magnifiqueبانو الماء مثلا...،

شنوّا هاذا بانو الماء؟

بانو ماء يبدى قدّامو، و انت تغطّسلو راسو و اتطلّع... يبدى يشوف في الموت
et sans laisser de traces

آآآه، كيف هاك الّي ورّاوها وقت الألعاب الأولمبيّة متاع الشّنوة

c’est extraordinaire !!! و الاّ عندك زادا كاوتشو الماء

شنوّا هاذا زادا؟

هاذا، تشدّ واحد...، تحشيلو كاوتشو في ترمتو و تحلّ السّبّالة...، تبدى كرشو تتنفخ قدّامو و هو يحسّ روحو باش يتطّرشق...، ما ينجّمش ما يتكلّمش

هههههه، هايلة هاذي، ما نعرفهاش (حتّى أنا هاذي، أوّل مرّة نسمع بيها... نعيشو و نتعلّمو)

و يعمل هكّا و يجي صاحبي الّي نستنّى فيه...، ما لقيت وقتاش تجي يا كازي؟ قتلو

قالّي سامحني، بطيت ما لقيتش فين نڨاري

باهي السّماح، السّماح، اقعد ترصّ بركا، شنحوالك؟.... آش تحكي؟.... شنيّة الأمور؟.... و دخلت في باب آخر من أبواب اللّهوة.....
_________________________________

أهوكا كان غبت عليكم شويّا، افهمو الّي تلقاه عمّار قوّد بيّ لجماعتو، و الّي يمكن راني كوتشو في ترمتي، و أنا نعيّط...؛

هل صُنع من ريح؟؟؟

2009-06-23T21:08:00.002+01:00

هل نفذت أحلامه؟ هل تلقّى كلّ الهدايا التي يستحقّها؟ هل بقي بين كفّيه بعض ما يدير رقابهم؟

صداقته لم تعد تعني لهم شيئا... محبّته نحوهم صارت عدما و عقما... صراخه الذي امتلأ حبّا و شغفا لم يعد يصل آذانَهم...

آذانُهم...

آذانُهم التي امتلأت صخبا و ضجيجا لم تعد تشعر بهمسات ألحانه، لم تعد تطرب لموسيقى عواطفه

أعينهم لم تعد ترى من جسمه شيئا...، فكأنّه صنع من ريح أو من ظلام...يخترقونه دون أن يشعروا بوجوده

كلّ أحاسيسهم تكمّدت خلف ذلك السّتار الأسود، الذي كلّ ما زاد زينة و ألوانا لحلّته، كلّما زاد حلكة و عتما لباطنه

ألمح طيفه من بعيد و قد بان لي منحنيا، ذابلا، ملتوي الأطراف، متجعّدا

يلتفت ورائه علّه يرى خيالهم أو يسمع أحرف اسمه تخرج من شفاههم

لا شيء يحرّك أجسامهم نحوه... لا شيء منه يجعلهم يشعرون بوجوده... لا شيء

سرعان ما يعود لبيته المظلم، علّه يجد فيه ركنا يضع فيه شموعه و فوانيسه قبل انطفائهم

يحيط الشموع بكفّيه... تحرقه بعض ألسنتها...

يلعق يديه لخفض آلامه، ثمّ يعيدها حيث ما كانت... فشموعه عزيزة جدّا على نفسه...؛

"Le Monde" في بلادنا، "الحدث" تسوى أكثر من

2009-06-19T19:51:00.004+01:00

اليوم الصباح و أنا واقف في حانوت جاري، نتجاذب معاه في أطراف الحديث قبل ما نطلع للبيرو، دخل واحد صاحبو قالّو: عندكشي جريدة بالسّوري؟

قالّو: لا ماك تعرفني ما نستعملهمش...، أما استنّى استنّى... هاي جريدة خلاّها "ماتياس" البارح (ماتياس هاذا جارنا مالكنڤو، يخدم مدير في الباد، و يحلّڨ معانا ساعة ساعة بعد الخدمة، نضحكو شويّة قبل ما نروّحو)

قالّو: هات برك، خير من بلاش

طبّس جاري للمرفع ماللّوطى، جبد "لو موند" و مدّهالو... و خلّى رزّة جرايد هي بيدها مرصّفين على بعضهم: شويّة "الحدث" على شويّة "الإعلان" على ضريبة "البيان" و طبعا للاّتهم الكل، هاك الّي ما تتسمّاش و الّي يعيّطولها "الضّريح"

خرج السّيّد، تلفّت لجاري، قتلو: ياخي الحبيّب ما يقراش بالعربي؟ و الاّ يتبّع في اللاّموضة زعما؟؟؟ ماي دالجة ياسر هاذي حكاية "أنا ثقافتي فرانساويّة" و "نقرى ياسر بالسّوري ياخي نسيت العربي" و "بربّي فكّرني كيفاش نقولو بنجور بالعربي" و كذا...

قالّي: تي لا، شبيك ياخي؟؟؟ هاذاكا وجه قراية براس أمّك؟؟؟ خذا الجريدة باش يمسح بيها البلاّر و برّا

قتلو: آآآآآه داكوردو، داكوردو... امّالا البلاّر هو الّي ما يفهمش بالعربي؟

قالّي: يزيّتش بلا تـ××××× متاع ××× توّا؟ الجريدة يلزمها تكون بالسّوري، على خاطر عيب باش يمسح البلاّر بجريدة بالعربي، يطلعشي فيها كلام ربّي و الاّ حاجة هكّا

قتلو: آه برجوليّة هاذي عمرها ما جات على مخّي... نعيشو و نتعلّمو يا بوها

قالّي: اسمع... يزّي مالبلادة... حكاية احترام و برّا... موش لازم تكبّش كي قرقنة

أيّا كمّلنا حكينا كلمتين، و من بعد طلعت وحدة وحدة في الدّروج و أنا نتمتم وحدي... قلت: إي نعن بو الوقت... "الحدث" و الإعلان" ولّى عندهم قدر أكثر مالجرايد الّي بالحقّ... الّي كيف تقول اسمهم العالم يرعش... ولّينا "الأخبار" و "الأنوار" نخمّلوهم في قجر، و"لو موند" نمسحو بيها البلاّر

الجريدة الّي تشدّ العالم تفتّقو من بعضو، مالإقتصاد، للسياسة، للرّياضة، للثّقافة، للتّكنولوجيا، نشولقوها و نريّشوها، و الجريدة الّي كيف تحلّها تلقى هاو فلان يداوي السرطان بالماء، هاو فلتان ينحّي التّابعة بالجّنون، هاي فلتانة تداوي القعم بالحيّة و الميّتة، نستحفظو عليها و نقدّروها و كان لزم بعد ما نكمّلوها ندفنوها في مقبرة إسلاميّة باش تحافظ عالهيْبة متاعها و القدر و الوقار الّي تستحقّهم

و ربّي يدوّم النّعمة في بلاد الفرح الدّائم

زعمة انّحّي الفولارة؟؟؟

2009-06-12T14:16:00.005+01:00

هي: ما تعرفش عيش خويا شكون ينجّم يخدّمني؟

هو: آش تعرف تعمل؟

هي: نكتب عالأرديناتور و نعمل الفاتورات عالإيكسال

هو: و الله آش باش نقلّك... نشوفلك

هي: اسمع... و الله ولّيت نخمّم باش انّحّي الفولارة

هو: آآآآآ.... علاش؟

هي: تي فدّيت، الدّنيا سخانة و زيد الّي نمشيلو على خدمة بالفولارة، يقلّي لا، لازم مظهر لائق... و عندهم الحقّ زادا، نعرف

هو: و انت علاش لبستها مالأوّل الفولارة؟

هي: و الله هكّاكا... عملة عملتها و ندمت... نتبّع في البنات

هو: دبّر راسك، آش باش نقلّك.... انت و فاش تلقى راحتك

هي: ماني شاورت أمّي زادا، قالتلي على كيفك، بينك و بين مولاك... و انت آش قولك زعما؟

هو: تي نحّي عليك الكازي امّالا... هالعذاب الّي عاملتّو لروحك؟

هي: بفففففف....شفت بربّي؟ ملاّ وحلة... تي أما نورمال، تو نزيد نفكّر

هو: آكاهو.... امّالا تو نشوف و نقلّك

هي: باهي يعيّش خويا، يعيّشك... و اسمع، الفولارة موش مشكل، كان لازم انّحّيها تو انّحيها

هو: باهي يا للاّ، باهي ... تهنّى

هي: شوف... بيناتنا؟ الفولارة كبّرتني زادا... ولّيت كاينّي عمري 50 سنا

هو: (بكلّ تربية) تي لا و الله لا... شكون قالّك؟ أنا نعطيك 26... 28 سنا بالوافي

هي: بربّي يزّي بلا تمنييك يا شسمك.. تي أغزر الزّح، الّي يشوفك بحذايا يقول ولدي و أحنا بيناتنا 4 و الاّ 5 شهر

هو: هههههه مبلدك يا سوسو، ديما هكّا؟ ملّي مع بعضنا في المكتب و انت النهار الكلّ تنكّت.... ههههه

هي: باهي باهي.... ماك ديما تتمقعر انت... ايّا شوفلي خدمة عيش خويا، فدّيت مالقعدة في الدّار

هو: تهنّى، و راسك انت تو نبتبتلك

هي: أيّا باهي، شعلت بالسخانة توّا، خلّي نطلع نفرهد حالتي و نلبس روبة كي العباد و نقعد نتنسّم شويّا بحذا الشّباّك

هو: داكوردو... أهوكا بيناتنا تاليفون امّالا

هي: شاهية طيّبة...، عيّش خويا

هو: بالسّلامة

الطّحين الرّياضي التّونسي

2009-05-24T01:09:00.004+01:00

أيّا برحمة والديكم قولولي: آش كان باش يصير كان ما هديتوش البطولة لسيّد "الرّاعي"؟؟؟

آش كان عليكم كان هديتو البطولة لأمّكم و الاّ لبوكم و الاّ خاصّة للجمهور الّي ريقو شاح و هو يشجّع فيكم؟

أما شيء يا ولدي... بلاد طحيـــــــــــن
(بالرّغم من أنّي مكـشّخ في الدّم) أما برجوليّة شيء ينطّق

أيّا أهوكم هديتولو البطولة، و تو بقدرة ربّي تخراو فيه بهزّان القفّة متاعكم

... مائة يوم

2009-05-22T13:47:00.008+01:00

مائة يوم مرّت.....

صامتة، هادئة، حزينة....

فكما عشت بهدوء و صمت، رحلت بهدوء و بصمت... فلا صخب و لا ضوضاء و لا صراخ رافق سفرك نحو العدم.

مائة يوم لم تحرّك سكونها سوى بعض الذّكريات و الدّموع الّتي تمتلكني حين أجد آثار رسومك بين أوراقي أو بين أدراج مكتبي.

فتجدني أخاطبك و أسألك كأنّك لم تغادر....

مائة يوم...

مائة يوم، قضيت بعدها بأن أترك حزني و أعود لطريقي...، أسيرها كما وعدتك.

هذه آخر كلماتي نحوك يا معلّمي... فلن أخاطبك بعد اليوم

و لكنّي لن أنقطع عن محبّتك و عن ذكراك...

سوف أؤدّي طقوسنا كلّ ما مررت بمدينتك...

سأذكرك كلّ ما مررت بين شوارعها، و لن أتردّد في زيارة معبد "القيصر" أو معبد "مرّاكش" لأنّ هالة نفسك لم تغادر جدرانهم

مائة يوم مرّت، لتنضب كلماتي و دموعي... و مائة عام لن تكفي لمحو ذكراك منّي

تونسي يصنع أكبر سروال في العالم..... مزعمنا في الحاجات الّي ما تصلح لشيء

2009-05-20T11:38:00.008+01:00

إي موش فمّا واحد تونسي ستيليست صنع أكبر سروال في العالم؟

إي، إي بالمجد...

قالّك جاوَه جماعة الغيناس بوك، و وافقولو باش يقيّدوه في السّجل متاعهم... اي، لا و الله عملة....

سي العربي بو ڤمحة هاذا، عمل سروال طولو 50 ميترو و عرضو 36 ميترو و كلا 2400 م² قماش

معناها شطر ملعب متاع كورة

لا يعطيك الصّحّة سي الشّباب... و مبعّد؟؟؟

إي هاك عملتو السّروال، و مبعّد؟ باش استنفعت، و باش نفعت النّاس؟

حــــتـّــــــــــــــــــــــــى شــــــــــــــــــــــــــــــــــــــــــــــــــيء

والــــــــو.... النّسمة و حلق الواد

أما الفازة فاش؟ .... الّي السّيّد هاذا علاش صنع ها السّروال؟؟؟؟

على خاطر سمع الّي في البيرو، فمّا واحد صنع سروال طولو 40 ميترو...، ياخي قال و الله الاّ ما نطيّح عليه

عناد في عناد معناها...، و ماو يقلّك "كان موش الحكّ ما تولد السّلايف".... آه امّالا

و الله كان عملو لغاية فنّيّة باش يوصّل بيها فكرة، و الاّ باش يساهم في أعمال خيريّة، و الله نقولو...

أما هاذا، هكّاكا... حرق دمّ قلبو باش يقيّدولو اسمو و يقولو: يااااا، ملاّ سي بو ڤمحة

الزّحّ، النّاس مقيّدة رواحها في أطول حفلة متاع غناء، في أسرع عازف، في أكبر ستوديو متاع أفلام، في أكبر لوحة، و كذا...

و أحنا: هاي أكبر عصبانة، هاو أكبر كسكسي، هاو أكبر سروال،...

معناها حاجات ما تصلح لشيء... كان الرّيق و البلادة

أيّا يا خويا هاك صنعتو السّروال.... ان شاء الله فرحة الأولاد...؛

...سبحان الله

2009-05-04T15:26:00.007+01:00

شوف ها التّعاليق هاذي الكلّ على خاطر ضربة فوتوشوب!!!!!!

سبحان الله...!!!
معظم شانو...

و هاو القروب هنا للّي يحبّ يزيد يتمتّع و يولّي "فان" بسبحان الله

لهذه الأسباب أنا ... تجمّعـفوبي

2009-05-01T10:25:00.007+01:00

لأنّي لم أحتمل أن أرى مئات الحافلات تحشد آلاف "المواطنين" لتصفّق في استعراض الرّئيس و قد تُرك العاملون و الطّلبة بدون وسيلة نقل لمدّة يومين كاملين... أنا تجمّعُـفوبي.

لأنّي كرهت أن أرى سيّارة حكوميّة (تحمل رقم 02) و التي ندفع ثمنها غاليا عن طريق الضّرائب تُخصَّص مع وقودها مجّانا... لمساعد الكاتب العام للجنة التنسيق... أنا تجمّعُـفوبي.

لأنّي لم أعد أحتمل أن أرى كلّ مواطن يرتعش خوفا كلّ ما أباح له فكره انتقاد النّظام... أنا تجمّعُـفوبي.

لأنّي أرفض أن ينسب التجمّع لنفسه مرحلة استقلال البلاد و تأسيسها... أنا تجمّعُـفوبي.

لأنّي لم أعد أحتمل أن أرى قيمة بطاقة اشتراك في التجمع تفوق قيمة شهادة الدّراسات المعمّقة في سوق الشّغل... أنا تجمّعُـفوبي.

لأنّي لم أعد أحتمل رؤية شعارات بنفسجيّة مضحكة تحلّي شوارع البلاد و تثير سخرية زائريها... أنا تجمّعُـفوبي.

لأنّي لا أزال أحلم بالحرّيّة و لأنّي أؤمن بأنّ الحرّيّة حلم سهل الإدراك... أنا تجمّعُـفوبي، ... أنا تجمّعُـفوبي، ... أنا تجمّعُـفوبي، ... أنا تجمّعُـفوبي.

هذه سبعة أسباب لتبرير "تجمّعـفوبيّتي"... و ربّما لو بحثت مليّا داخل نفسي لوجدت سبعة آلاف سبب آخر، أو ربّما سبع و سبعين ألفا...، أو ستّ مائة و ثمانين ألفا، أو ملايين آلاف الأسباب...

لا يهمّ العدد....

لا يهمّ الشّكل، بقدر ما تهمّ الفوبيا ذاتها....

فأنا تجمّعـفوبي، تجمّعـفوبي، تجمّعـفوبي، تجمّعـفوبي...

أقولها أربعا..... لا سبعا، و لا ثلاثا، و لا أجهش بالبكاء

أقولها أربعا...، و أصمت